LEFITIKO 3

₁Ge sebego sa motho e le sedimo sa seleboga, se a se ntšhago dikgomong, e ka ba tona goba tshadi, a hlaole ye e se nago bosodi, a e tliše pele ga Morena. ₂A a bee seatla sa gagwe hlogong ya sebego sa gagwe, a e hlabe mojako wa Ngwako wa Kgwerano; mme barwa ba Arone ba e lego baperisita ba fokele aletare ka madi a yona, ba dikologe nayo. ₃Mo go sedimo seo sa seleboga a ntšhe tša mollo wa Morena, lebipi le makhura a ka teng ka moka. ₄A tšee le dipshio ka dipedi, le makhura a tšona, le a moseko le sebetšana, -- a a tloše mo go dipshio. ₅Barwa ba Arone ba di tšhume mo aletareng godimo ga sehlabelo se se lego godimo ga dikgong mo mollong. Ke tša mollo wa monko o bose wa Morena.

₆Ge sebego sa gagwe se a se tlišetšago Morena e le sedimo sa seleboga se se tšwago dihuswaneng, e ka ba tona le ge e le tshadi, a e be e se nago bosodi. ₇Ge sebego sa gagwe se a se tlišago e le nku, a e tliše pele ga Morena, ₈a bee seatla sa gagwe hlogong ya sona, a se hlabe pele ga Ngwako wa Kgwerano; mme barwa ba Arone ba fokele aletare ka madi ba dikologe nayo. ₉Mo sedimong seo sa seleboga a ntšhe tša mollo wa Morena, makhura a yona, mosela ka moka, o kgaolwe thitong ya wona, le lebipi, le makhura ka moka a ka teng, ₁₀le dipshio ka dipedi, le makhura a tšona, le a moseko, le sebetšana, -- a a tloše go dipshio. ₁₁Moperisita a a di tšhume mo aletareng; ke sejo sa mollo wa Morena.

₁₂Ge sebego sa gagwe e ka ba pudi, a e tliše pele ga Morena, ₁₃a bee seatla sa gagwe mo hlogong ya yona, a e hlabe pele ga Ngwako wa Kgwerano; mme barwa ba Arone ba fokele aletare ka madi a yona, ba dikologe nayo. ₁₄Mo sebegong sa gagwe a ntšhe tša mollo wa Morena, lebipi le makhura a ka teng, ₁₅le dipshio ka dipedi, le makhura a tšona, le a moseko, le sebetšana, -- a a tloše go dipshio. ₁₆Moperisita a a di tšhume mo aletareng. Ke sejo sa mollo, ke tša monko o bose wa Morena. Makhura ka moka ke a Morena. ₁₇Molao wa ka mehla go iša ditlogolong tša lena, wa meagong ya lena ka moka, šo: Le se ke la ba la ja makhura le ge e le madi.