Go ja tše kgethwa
1Morena o boletše le Moshe a re: 2Botša Arone le barwa ba gagwe gore, dineo tša Baisiraele, tše ba nkgethetšego tšona, ba di hlomphe gore ba se goboše leina la ka le lekgethwa ka tše Baisiraele ba nkgethetšego tšona. Ke nna Morena. 3O ba botše o re: Motho wa geno, le wa meloko ya lena, e a batamelago tše kgethwa, tše Baisiraele ba di kgethetšego Morena a na le ditšhila, motho e mobjalo a ripiwe, a tloge pele ga Morena. Ke nna Morena.
4Mang le mang wa barwa ba Arone, e a pherago, le e a edišago, a se ke a ja tše dikgethwa a sešo a sekega. Le e a kgwathilego tšhila, e ka ba ya mohu, e ka ba ya e a lorago a theletšwe, a se ke a di ja. 5Goba e a kgwathilego segagabi se se lego tšhila, goba motho e a tšhilafetšego ka selo mang le mang, a se ke a di ja. 6E a kgwathilego tše bjalo a be wa ditšhila go fihla mantšiboa, mme a se ke a ja tše kgethwa a sešo a hlapa mmele wa gagwe meetseng. 7Ge letšatši le diketše gona a ka ja tše dikgethwa, ka gobane ke dijo tša gagwe. 8Ge e le se se hwilego ka noši, le se se bolailwego ke sebata, a se ke a se ja, gore a se itšhilafatše ka sona. Ke nna Morena.
9Ba hlokomele tše ba ntlišetšago tšona, gore ba se wele sebeng ka tšona, mme ba hwa ka ge ba di gobošitše. Ke nna Morena e a ba kgethilego.
10Wa mohuta o šele a se ke a ja se sekgethwa, le ge a ka ba moeng lapeng la moperisita, le ge e ka ba mothwalwa; ba se ke ba ja tše dikgethwa. 11Fela, motho yo moperisita a mo rekilego ka tšhelete ya gagwe, yena a ka di ja, le e a tswaletšwego mo lapeng la gagwe; a ba je dijo tša gagwe. 12Ge morwedi wa moperisita a tšerwe ke monna wa mohuta o šele, yena a se ke a hlwa a eja dibego tše kgethwa. 13Ge morwedi wa moperisita e le mohlologadi, goba a hladilwe ke monna a se na bana, mme a boela ngwakong wa tatagwe, a je dijo tša tatagwe bjalo ka mola a sa le ngwana; fela o šele a se ke a di ja.
14Ge motho a ka ja se sekgethwa a sa tsebe, a se buše mme a ekeletše ka sa bohlano; a nee moperisita se sekgethwa. 15Ba se ke ba goboša tše kgethwa tša Baisiraele, tše Baisiraele ba di ntšhetšago Morena, 16gore ba se tlo oba molato ba sekišwa ka baka la mokgwa wo ba jago se sekgethwa ka wona. Ke nna Morena ke ba kgethilego.
17Morena o boletše le Moshe a re: 18Bolela le Arone le barwa ba gagwe, le Baisiraele ka moka, o re: Mang le mang e a lego wa leloko la Isiraele, le e a diiletšego go bona, e a tlišago sebego sa gagwe, e ka ba sa keno, goba sa go ithapa, e a fihlišago sehlabelo go Morena, 19a tliše se a kago thabelwa ka sona, e be sa pholwana, kgomo goba nku goba pudi. 20Le se ke la tliša se se nago le bosodi; ka gobane sona le ka se ke la thabelwa ka sona. 21Ge motho a ka tlišetša Morena sedimo sa seleboga sa go phetha keno, le ge e ka ba sa go ithapa, e ka ba sa kgomo le ge e le sa sehuswane, e be se se se nago bosodi, se a kago thabelwa ka sona. 22Se se foufetšego, goba se se robegilego, goba se se kutlegilego, goba se se tšwago maladu, goba sa sehloba, tše bjalo le se ke la di tlišetša Morena; le se ke la di dira tša mello ya Morena. 23Kgomo le ge e le sehuswane se se nago le ditho tše di fetanago, o ka se dira neo ya go ithapa; fela ge e ka ba sa keno, gona se ka se thabiše. 24Seruiwa se se fagotšwego ka go tenta, goba ka go kgatlela, goba ka go sega, se se bjalo le se ke la se tlišetša Morena; mo nageng ya geno le se ke la dira tše bjalo.
25Tše bjalo le se ke la di amogela seatleng sa o šele la di batametša la re ke dijo tša Modimo; ka gobane di na le senyalo, lebadi. Le ka se ke la thabelwa ka tšona.
26Morena o boletše le Moshe a re: 27Namane le kwana le putšane a e re ge di tswetšwe di fetše matšatši a šupago di na le bommatšo, Go tloga ka la seswai ke mo di tlogo kgona go thabiša ge di le sebego mellong ya Morena. 28Le se ke la hlaba kgomo le ge e le sehuswane ka tšatši letee le ngwana wa sona. 29Ge le tlišetša Morena didimo tša theto, le tliše se le kago thabelwa ka sona. 30Le se je ka lona tšatši leo; le se ke la šia molatša wa sona. Ke nna Morena.
31Hlokomelang ditaelo tša ka, le dire ka mo di bolelago ka gona. Ke nna Morena. 32Le se ke la goboša leina le lekgethwa la ka, gore ke be e Mokgethwa go Baisiraele. Ke nna Morena e a le kgethilego. 33Ke le ntšhitše mo nageng ya Egipita, gore ke be Modimo wa lena.
