LEFITIKO 16

₁Mehleng yela ge go šetše go hwile barwa ba Arone ba babedi, bala ba go hwa ba tlile pele ga Morena, Morena o boletše le Moshe, ₂a mmotša a re: Botša Arone mogolwago o re: A se ke a fo tsena ka mehla sekgethweng mo go širilwego ke lešira, mo go lego sekhurumelo sa go khurumetša polokelo, gore a se hwe, ka gobane gona moo sekhurumelong ke mo ke iponatšago ke le lerung. ₃Ge Arone a tsena sekgethweng, e be ka powana ya seloba le ka kgapana ya sehlabelo.

₄A tle a apere seaparo se sekgethwa sa leokodi, a tšwere sethema sa leokodi, a itlamile ka moketwana wa leokodi, a rwele kefa ya leokodi; ke tšona diaparo tše kgethwa. A di apare a hlapile mmele meetseng.

₅Mo phuthegong ya Baisiraele a tšee diphoko tše pedi; e be tša seloba, le kgapane e tee ya sehlabelo. ₆Arone a batametše powana ya seloba sa gagwe, a itirele poelanyo, le poelanyo ya ba lapa la gagwe. ₇A tsebo tšea diphoko tše pedi, a di emiše pele ga Morena mojako wa Ngwako wa Kgwerano. ₈Diphoko tše pedi tšeo Arone a di direle matengwa; tengwa le lengwe le ntšhe e lego ya Morena, le lengwe le ntšhe ye e lego ya Asasele. ₉Phoko yeo e tšwago le tengwa la Morena, Arone a e dire ya seloba. ₁₀Ye e tšwago le tengwa la Asasele, e tlišwe e eme pele ga Morena e sa phela; e direlwe poelanyo; e tsebo išwa lešokeng go Asasele.

₁₁Powana yela ya gagwe, Arone a e dire seloba, a itirele poelanyo; le ba lapa la gagwe a ba direle poelanyo; a hlabe powana ya gagwe, e be seloba. ₁₂Ke mo Arone a tlogo swara lebeana a olela magala a hlennego a aletareng e lego pele ga Morena; a tšee le diorelo tša monko o bose, tše di šitšwego; a di gamare ka diatla, a di iše mo go širilwego ke lešira. ₁₃Diorelo a di tšhele mollong pele ga Morena, gore muši wa tšona o aparele sekhurumelo se se khurumetšego melao, gore a se hwe. ₁₄A kgone go tšea madi a powana, a fokele sekhurumelo ka thoko ya bohlabela ka monwana, le ka mono pele ga sekhurumelo a fokele madi ka monwana gašupa.

₁₅Bjale a hlabe phoko yela ya setšhaba ya seloba. Madi a yona a a tliše gona moo go širilwego ke lešira; gomme le madi a yona a a dire ka mokgwa wa madi ala a powana, a a fokele godimo ga sekhurumelo le ka mono pela ga sona. ₁₆E be go direla sekgethwa poelanyo ka baka la ditšhila tša Baisiraele, le ka baka la diphapogo tša bona ka moka, le ka baka la dibe tša bona ka moka; ke tšona tše a tlogo di direla le Ngwako wa Kgwerano o lego mo gare ga bona, mo gare ga ditšhila tša bona. ₁₇Ge a tsena mo Ngwakong wa Kgwerano go direla sekgethwa poelanyo, go se ke gwa ba le motho e mongwe e a tsenago moo; a be a tšwe a feditše go itirela poelanyo, le go e direla le ba lapa la gagwe, le ba phuthego ka moka ya Baisiraele. ₁₈Ke mo a tlogo tšwela aletareng e lego mo pele ga Morena, a e direla poelanyo. A tšee madi a powana yela, le a phoko yela, a fetše dinaka tša aletare ka ona thoko tšohle, ₁₉a e fokele ka madi ka monwana, a dire gašupa, a e thakgafatše, a e kgethe, e tšwe ditšhila tša Baisiraele.

₂₀E re ge a feditše go direla sekgethwa le Ngwako wa Kgwerano le aletare poelanyo, gona a tliše phoko yela e sago phela. ₂₁Arone a bee diatla tša gagwe mo hlogong ya phoko yeo e phelago, mo go yona a bobolele melato ka moka ya Baisiraele, le diphapogo tša bona ka moka, le dibe tša bona ka moka; a di bee mo hlogong ya phoko yeo; e be gona a romago monna, a e iša lešokeng. ₂₂Phoko ye e tlo rwala makgopo a bona ka moka, ya a iša mo nageng ya lehanata; mme monna eo a e tlogele lešokeng.

₂₃Bjale Arone a tsene mo Ngwakong wa Kgwerano, a apole diaparo tša motwatwa tše a tsenego sekgethweng a di apere, a di tlogele gona moo. ₂₄A hlape mmele meetseng felo gokgethwa, a apare diaparo tša gagwe, a tsebo tšwela go fihliša sehlabelo sa gagwe, le sehlabelo sa setšhaba, a itirele poelanyo, le setšhaba a se direle poelanyo. ₂₅A tšhume makhura a seloba mo aletareng. ₂₆Le monna yola e a tšwilego le phoko ya Asasele, a hlape mmele meetseng; ke mo a tlogo kgona go boela mešašeng. ₂₇Ge e le powana yela ya seloba, le phoko yela ya seloba, tšeo madi a tšona a išitšwego sekgethweng a dira poelanyo, tšona di ntšhetšwe ntle ga mešaša; matlalo a tšona, le nama ya tšona, le mešwang ya tšona, ka moka di fišwe gona kua. ₂₈Mofiši wa tšona a hlatswe diaparo tša gagwe, a hlape mmele meetseng; ke mo a tlogo kgona go boela mešašeng.

₂₉Molao wa lena wa ka mehla šo: Ka la lesome la kgwedi ya go šupa le ikokobetše, le lese mediro, motho wa gae le e a diiletšego go lena. ₃₀Ka gobane ka tšatši leo le direlwa poelanyo, gore le thakgafatšwe, le hlatswiwe dibe tša lena ka moka pele ga Morena. ₃₁E be letšatši la lena la go khutša sa ruri; le ikokobetše. Ke molao wa ka mehla. ₃₂Poelanyo e dirwe ke moperisitamotlotšwa, e a beilwego modirong wa moperisita bakeng sa tatagwe; diaparo tša leokodi, diaparo tše kgethwa di aparwe ke yena, ₃₃mme a direle sekgethwakgethwa poelanyo, le Ngwako wa Kgwerano, le aletare; le baperisita ka moka, le setšhaba ka moka sa phuthego, bohle a ba direle poelanyo. ₃₄A e be molao wa lena wa ka mehla, wa go re: Baisiraele ba direlwe poelanyo ka baka la dibe tša bona ka moka gatee ka ngwaga.

Gomme Moshe a dira ka mo Morena a mo laetšego ka gona.