JUDA 1

₁Juda Mohlanka wa Jesu Kriste ngwanabo Jakobo, o ngwalela babidiwa ba ba kgethilwego ke Modimo Tatawešo, ba ba boloketšwego Jesu Kriste.

₂Kgaugelo le khutšo le lerato a di ate mo go lena.

₃Ke be ke re ke tla rapa maatla, gore ke le ngwalele tša phološo ye re lego batee ka yona, ka hwetša go swanetše ge ke le ngwalela ka le kgothatša go hlabanela tumelo ye bakgethwa ba e filwego gatee ya ba moka. ₄Gobane go na le batho ba ba le khukhunetšego, bao ditaba tša bona di ngwadilwego kgale tša re ba tlo wela molatong woo, e le ba ba sa boifego Modimo, ba ba retollago tše Modimo wa rena a re gaugetšego ka tšona ba di dira tša maipshino, mme ba se dumele Modimo le Jesu Kriste Mmuši a nnoši Mong wa rena.

₅A nke ke le eletše ka tše le di tsebago tšohle, tša ge Modimo a thomile go phološa setšhaba nageng ya Egipita, mme a buša a fediša bao ba sa kago ba dumela. ₆Le Barongwa bala ba sa kago ba lotola bogoši bja bona mme ba tloga madulong a bona, o ba tlemile ka ditlemo tša neng le neng tša leswiswing, a ba bolokela kahlolo ya mohlamogolo. ₇Le Sodoma le Gomora le metse ya mathoko ao, ye e dirilego ka mokgwa wa batho bao ya otswa ya ba ya latela nama e šele, e dula e beetšwe go swantšhetša batho kotlo ya mollo wo o sa timego.

₈Le bona balori ba ba tšhilafatša mmele ka mokgwa woo, ba nyatša magoši, ba goboša tše e lego tša letago. ₉Hleng le Mikaele Morongwa e mogolo, mola a elwa le diabolo mola ba bakišana setopo sa Moshe a šiile go mmea molato ka leroga, a fo re: Morena o tlo go kgalema! ₁₀Mme batho ba ba fo goboša tšohle tše ba sa di tsebego; gomme tše ba sa di tsebego sebopego, tše di etšago diphoofolo di se nago tlhaologanyo, ba itshenya ka tšona. ₁₁Kotlo e tlo ba wela, gobane ba ile ka tsela ya Kaine, ba itahletše go forwa ke moputso wa Bileama, ba loba ka bonganga bja Kora. ₁₂Ke bona ba tlišago tšhila menyanyeng ya lena ya lerato, ge ba ja le lena ba gara ba sa šie, ba re: Re a fula. Batho bao ke maru a se nago pula a fefolwago ke diphefo; ke dihlare tša marega tše di se nago dienywa, tše di hwilego gabedi, tša medu ye e omegilego. ₁₃Ke maphoto a lewatle a go gašana a seloga a ntšha ditšhila tša ona; ke dinaledi tša didumaedi tše si sobeletšego leswiswing la go ya go ile.

₁₄Ke bona ba ba boletšwego ke Henoge monna wa go šupa go tloga ka Adama, ge a porofeta a re: Tsebang, Morena o etla a na le bakgethwa ba gagwe ba diketekete; ₁₅O tla go sekiša bohle; ba ba ba sa dumelego o tlo ba lahla bohle ka baka la mediro ya bona ka moka ya go se dumele, ye ba sentšego ka yona, le ka baka la dipolelo tše thata ka moka tše badiradibe bao ba mmoletšego ka tšona.

₁₆Ke batho ba go hlwa ba tsota, ke bagaladi, ba ba yago ka dikganyogo tša bona, mme melomo ya bona e bolela ka go ikgogomoša; ba reta motho a le gona, gore ba hwetše tše di ba holago.

₁₇Ge e lena barategi, le se lebale ditaba tše di boletšwego kgale ke baapostola ba Mong wa rena Jesu Kriste. ₁₈Ba le boditše ba re: Mabakeng a bofelo go tlo ba le bakweri, bao tsela ya bona e tlogo ya mo ba išwago ke dikganyogo tša bona tša go se dumele. ₁₉Ke bona ba go hlola diphapang, ba go ya ka maikutlo ba se na Moya. ₂₀Mme lena barategi le be ba ba ikagetšego godimo ga motheo wa tumelo ya lena e kgethwakgethwa, le rapele le le ba Moya o Mokgethwa. ₂₁Le dule le ipatile ka lerato la Modimo le letetše kgaugelo ya Mong wa rena Jesu Kriste ye e išago bophelong bjo bo sa felego.

₂₂Ge go na le ba ba dikadikago, le ba eletše, ₂₃le ba phološe bjalo ka ge le ubula motho mollong. Le ba gaugele le boifa. Le ila le seaparo se se tšhilafaditšwego ke tša mmele.

₂₄Gomme yena a nago le maatla a go le diša gore le se ušwe, e a kgonago go le emiša la lebana le letago la gagwe le se na bosodi le hlaletše, ₂₅Yena Modimo Rabohlale a nnoši Mophološi wa rena, letago ke la gagwe; le bogolo, le maatla, le pušo ke tša gagwe neng le neng, mehleng yeno le go iša mehleng yohle ya go ya go ile. Amene.