Lebollo. Monyanya wa Paseka. Pono ya Joshua
1E itše ge dikgoši ka moka tša Baamoro tša mošola wa Jorodane thoko ya bodikela, le dikgoši ka moka tša Bakanana tša thoko ya lewatle, ge di ekwa ka mo Morena a gopišitšego meetse a Jorodane ge Baisiraele ba fihla, gore ba sele, ka moka ba nolega moko, gwa hlokwa pelo ye e tiilego mo go bona ge Baisiraele ba fihla.
2Ka lebaka lona leo Morena o laetše Joshua a re: Itirele mefaka ya magakadibje, o buše o bolotše Baisiraele la bobedi. 3Jošua a napa a itirela mefaka ya magakadibje, a bolotša Baisiraele mmotong wa Arelothe. 4Taba ye Joshua a ba boloditšego ka baka la yona še: Batho ka moka ba ba tšwilego Egipita e le banna ba bahlabani, ba be ba hwile lešokeng mo tseleng ge ba rotoga ba etšwa Egipita. 5Banna bao ka moka ba ba tšwilego Egipita, bona ba be ba boloditšwe; fela, ba ba tswaletšwego lešokeng tseleng ya ge ba rotoga ba etšwa Egipita, ba be ba sešo ba bolla. 6Ka gobane Baisiraele ba be ba feditše nywaga e masome a mane ba sepela šokeng, mme setšhaba ka moka sa banna ba bahlabani ba ba tšwilego Egipita sa ba sa felela sa ruri, ka gobane se sa ka sa kwa se Morena a se boletšego; Morena a ba a se enela a re se ka se ke sa bona naga ye Morena a kilego a e enela botatabo a re o tlo ba nea yona, e lego naga e elago maswi le dinose. 7Barwa ba bona, bao Morena a ba tsošitšego legating la bona bala, ke bona ba Joshua a ba boloditšego, gobane e be e le mašoboro, ba be ba sešo ba bolotšwa tseleng.
8Ya re ge batho ba feletše go bolotšwa, ba fela ba dutše felo fao mešašeng, ba ba ba fola. 9Morena a rera Jošua a re: Bjale ke pshikološitše kgobogo ya Egipita ka e tloša go lena. Ke ka baka leo leina la felo fao le lehono e sa lego Giligala (Pshikologo).
10Gomme Baisiraele ba dula mešašeng gona moo Giligala, ba bina monyanya wa Paseka ka la lesome la metšo e mene ya kgwedi yeo ka mantšiboa, ba le melaleng ya Jeriko. 11Ka le le hlatlamago Paseka ba thoma go ja mabele a naga yeo, e le dinkgwa tše di sa omelwago le mašohlo, ba thoma ka tšatši leo. 12Gomme Manna ya fela ka tšatši le le hlatlamago leo la ge ba thoma go ja mabele a naga yeo; Manna ya se ke ya hlwa e eba gona mo go Baisiraele; ba ja dikenyo tša naga yeno ka ngwaga woo.
13Ya re ba sa le gona moo Jeriko, Joshua ge a lebelela a bona monna a eme a lebane le yena, a swere tšhoša a e retha ka seatla sa gagwe. Joshua a ya go yena, a re: A o wa gabo rena, goba o wa manaba a rena?
14Monna eo a re: Ke nna molaodi wa madira a Morena; bjalo ke tlile.
Joshua a napa a khunama, a inamela fase a lotšha a re: Mong a ka, o ne lefe la go botša nna mohlanka wa gago?
15Molaodi wa madira a Morena a re: Rola dieta tša gago dinaong tša gago, gobane felo fa o emego gona go kgethegile. Joshua a dira bjalo.
