JOSHUA 3

₁Joshua a tsoga e sa le bosasa, a na le Baisiraele ka moka, ba tloga Sithima, ba tla nokeng ya Jorodane, ba lala gona moo ba sešo ba sela. ₂Ge go fetile matšatši a mararo balaodi ba thetha le mešaša, ₃ba laela setšhaba ba re: E re ge le bona polokelo ya kgwerano ya Morena Modimo wa lena e rwalwa ke baperisita ba Balefi, gona le lena le tsoge le latele. ₄Fela, le lese ba sepele sebaka sa meelo e dikete tše pedi, e be gona le latelago. Le se ke la batamela; gore le kgone go bona tsela ye le tlogo e sepela, ka gobane tsela yeo ga le ešo la ba la e sepela.

₅Jošua a botša setšhaba a re: Ikgetheng, ka gobane ka moswana Morena o tlo dira mohlolo mo go lena. ₆Baperisita a ba botša a re: Rwalang polokelo ya kgwerano le ete setšhaba pele. Ba e rwala mme ba eta setšhaba pele.

₇Morena a botša Joshua a re: Lehono ke tlo thoma go go godiša mo go Baisiraele, gore ba tsebe gobane ke ema le wena, bjalo ka ge ke be ke ema le Moshe. ₈Baperisita ba ba rwelego polokelo ya kgwerano wena o ba laele o re: Ge le fihla magomong a meetse a Jorodane, le eme.

₉Baisiraele Joshua a ba bitša a re: Batamelang mo, le tle le kwe se Morena Modimo wa lena a se bolelago. ₁₀A bolela le bona a re: Se le tlogo tseba ka sona gore e a nago le lena ke Modimo e a phelago, le gore: Bakanana, le Bahethe, le Bahefi, le Bapheresi, le Bagirigasi, le Baamoro, le Bajebusi, o tlo ba raka ge le fihla: ₁₁Sese: Le tlo bona polokelo ya Mong wa lefase lohle ge e sela noka ya Jorodane e le etile pele. ₁₂Bjale ntšhang banna ba lesome le metšo e mebedi mo melokong ka moka ya Baisiraele, leloko le lengwe le le lengwe monna o tee. ₁₃E tlo re ge dinao tša baperisita ba ba rwelego polokelo ya Morena Mong wa lefase lohle, di gata meetse a fologago a etšwa tletlolo, a tlo kgaolwa a ema bjalo ka leboto letee.

₁₄Gomme setšhaba sa hlahlamologa sa tšwa mo mešašeng ya bona gore ba sele noka ya Jorodane. Baperisita ba eta setšhaba pele ba rwele polokelo. ₁₅Ya re ge barwadi ba polokelo ba fihla nokeng ya Jorodane, mme maoto a baperisita ba ba rwelego polokelo ge a gata mo meetse a gomago ntshe -- ka gobane noka ya Jorodane lebakeng la go buna e e tlale e khurumetše maboto a yona thoko tšohle -- ₁₆Ke mo meetse a fologago a etšwa tletlolo a emego, a hlophologa, a ba bjalo ka leboto letee, a fihla kgolelele motseng wa Adama wo o bataganego le Tsarathane. Ga e le meetse a fologelago lewatleng la molala, e lego lewatle la letswai, a gopa; gomme setšhaba sa sela se lebane le motse wa Jeriko. ₁₇Baperisita ba ba rwelego polokelo ya Morena ba be ba eme mo go omilego mo gare ga noka ya Jorodane. Baisiraele ka moka ba sela ka mo go omilego; setšhaba sa sela ka moka ga sona.