JOSHUA 18

₁Phuthego ka moka ya Baisiraele e kile ya bokana motseng wa Silo; gona moo ba hloma Ngwako wa kgwerano. Ke mola naga e šetše e ahlame e bušwa ke bona. ₂Bjalo go be go sa šetše meloko e šupago ya Baisiraele ye e sešogo ya arolelwa naga. ₃Joshua a bolela le Baisiraele a re: Le tšwafelang go yo tšea naga ye Morena Modimo wa botataweno a le neilego yona? ₄Ntšhang banna bararobararo ka leloko, le ba rome ba ralale le naga, ba e ngwale ka mo e ka bago magae a lena, mme ba boele fa go nna. ₅Le kgone go ikarolela naga ya ba dikarolo tše di šupago. Ga e le Juda, yena o tlo dula mo nageng ya gagwe thoko ya borwa, le ba leloko la Josefa ba tlo dula nageng ya bona thoko ya leboa. ₆Bjalo lena dirang lengwalo la go sega naga e tšwe dikarolo tše di šupago, le le tliše fa go nna, ke tle ke le direle matengwa fa pele ga Morena Modimo wa rena. ₇Balefi bona ba ka se ke ba arolelwa naga le lena, ka gobane karolo ya bona ke boperisita bja Morena. Bagada, le Barubeni, le seripa sa Bamanase, bona ba šetše ba filwe magae a bona ka kua mošola wa Jorodane, kwa thoko ya bohlabela; ke ona a Moshe mohlanka wa Morena a ba neilego ona.

₈Banna bao ba tloga, ba sepela ba lailwe ke Joshua gore ba dire lengwalo la lefase, ge a re: Yang le ralaleng le naga. Le e ngwale, mme le boele fa go nna, gore ke le direle matengwa fa Silo pele ga Morena. ₉Banna bao ba ralala le naga ba e ngwala mo lengwalong ka metse ya yona, ba e arola ba dira dikarolo tše di šupago, ba tsebo boela go Joshua mešašeng ya Silo. ₁₀Joshua a ba direla matengwa gona moo Silo pele ga Morena, a arolela Isiraele naga ka dikarolo tša bona.

₁₁Tengwa la leloko la Benyamini la tšwa le naga ya dilete tša bona; mollwane wa bona o dikologilwe ke la ba Juda le ba leloko la Josefa. ₁₂Mollwane wa bona wa thoko ya leboa a tloga nokeng ya Jorodane, o rotoga o šika le motse wa Jeriko ka thoko ya leboa, o rotogela dithabeng o leba Bodikela wa yo kgotla le lešoka la Bethe-Abene. ₁₃O feta o leba Lusi, wa šika le Lusi (ke gona Bethele) ka thoko ya borwa, wa fologela Atarothe-Adara thabeng e bataganego le Bethe-Horoni wa tlase ka thoko ya borwa. ₁₄Mo thabeng yeo e bataganego le Bethe-Horoni ka thoko ya borwa mollwane o pota thoko ya Bodikela o leba thoko ya borwa; mafelelo a wona ke Kiryathe-Baali (ke gona Kiryathe-Jearima motse wa Juda). Ke yona thoko ya bodikela. ₁₅Lehlakore la go leba thoko ya borwa le thoma gona moo Kiryathe-Jearima; mollwane o leba bodikela wa goma ka letsha la Nefuthoa. ₁₆O fologela magomong a thaba e okametšego mogwere wa Beni-Hinomi e bataganego le molala wa Refaimi, o fologa ka mogwere woo wa Hinomi wa šika la Bajebusi ka thoka ya borwa wa fologela sedibeng sa Rogele, ₁₇wa leba leboa wa tšwela sedibeng sa Semese, wa tšwa moo wa tla Gelilothe go lebanego le mmoto wa Adumima, wa feta o fologela leswikeng la Bohani morwa wa Rubeni. ₁₈Wa leba leboa wa selela dithabeng tše di okametšego molala wa Jorodane, wa fologela molaleng woo. ₁₉O fetela motheogeng wa Bethe-Hogola o leba leboa; o yo felela magomong a lewatle la letswai a thoko ya leboa, mo noka ya Jorodane e felelago thoko ya borwa. Ke wona mollwane wa thoko e lebago borwa. ₂₀Noka ya Jorodane ke mollwane wa lehlakoreng la thoko ya bohlabela. Ke yona naga ya Babenyamini le mollwane wa bona thoko tšohle ka dilete tša bona.

₂₁Metse ya ba leloko la Benyamini ka dilete tša bona še: ke motse wa Jeriko, le wa Bethe-Hogola, le wa Emeke-Ketsitsi, ₂₂le wa Bethe-Araba, le wa Tsemaraima, le wa Bethele, ₂₃le wa Abime, le wa Para, le wa Ofura, ₂₄le wa Kefara-Amoni, le wa Ofini, le wa Gaba. Ke metse e lesome le metšo e mebedi le metsana ya yona. ₂₅Le wa Gibeoni, le wa Rama, le wa Beerothe, ₂₆le wa Mitsipa, le wa Kafira, le wa Motsa, ₂₇le wa Rekema, le wa Jiripiele, le wa Tharala, ₂₈le wa Tsela, le wa Elefe, le wa Jebusi (ke gona Jerusalema), le wa Gibeathe, le wa Kiryathe. Ke metse e lesome le metšo a mene le metsana ya yona. Ke ona magae a Babenyamini ka dilete tša bona.