JOSHUA 11

₁Ya re ge Jabini kgoši ya Hatsora e ekwa tšeo, a roma batseta ba ya go kgoši ya Madoni, le go kgoši ya Simirone, le go kgoši ya Akisafa, ₂le go dikgoši tše di dutšego thoko ya leboa, dithabeng le melaleng e lego ka thoko ya borwa bja Genetsareta, le magoleng le mebotong ya Doro ya thoko ya bodikela, ₃le go Bakanana ba thoka ya bohlabela le bodikela, le go Baamoro, le go Bahethe, le go Bapherese, le go Bajebusi ba dithabeng, le go Bahefi ba ka tlase ga thaba ya Herimone nageng ya Mitsipa; ₄ba tšwa ba na le madira a bona, e le lešaba le legolo le le ka kago lešabašaba la lebotong le lewatle ka bontši, le dipitsi le dikoloi tše ntši. ₅Dikgoši tšeo tša kgobokana tša tla tša bokana letsheng la Meromo, e le gore di hlabane le Isiraele.

₆Morena a bolela le Joshua a re: O se ke wa ba boifa, ka gobane bosasa pakeno ke tlo ba rapalatša pele ga Isiraele e le ditoto. Dipitsi tša bona o tlo di kgaola mešifa; dikoloi tša bona o tlo di fiša ka mollo. ₇Joshua le batho ka moka ba bahlabani ba a bego a na nabo, ba tla ba ba šwahlela gona moo letsheng la Meromo, ba ba wela godimo. ₈Morena a ba gafela diatleng tša Isiraele, ba ba bolaya, ba ba rakediša ba ba fihliša Sidoni le Misirefothe-Majima, le go fihla molapong wa Mitsipa; ba ba fetša gwa se šadišwe motho wa bona. ₉Joshua a ba dira ka mo Morena a mmoditšego ka gona; dipitsi tša bona a di kgaola mešifa; dikoloi tša bona a di fiša ka mollo.

₁₀Joshua a boa ka lebaka leo, a thopa motse wa Hatsora, e bego e le wona mošate wa mebušo yeo ka moka. ₁₁Bohle ba motseng woo a ba fediša ka bogale bja lerumo, a ba dira segafiwamoka; ga a ka a šadiša se se bušago moya; motse wona a o fiša ka mollo.

₁₂Metse ka moka ya dikgoši tšeo, Joshua o e thopile, le dikgoši tša gona ka moka a di fediša ka bogale bja marumo, a di dira digafiwa ka mo go bego go laetšwe ka Moshe mohlanka wa Modimo. ₁₃Meste ka moka ye e bego e agilwe dithabeng, yona Baisiraele ga se ba o fiša; wo Joshua a o fišitšego ke wa Hatsora fela. ₁₄Dithebola ka moka tša metse yeo, le dikgomo tša gona, Baisiraele ba di thopile; ge e le batho, bona ka moka ba ba bolaile ka bogale bja marumo, ba ba fediša, ba se šadiše se se bušago moya. ₁₅Ya ba tše Morena a kilego a laela Moshe mohlanka wa gagwe; Moshe a laela Joshua ka mokgwa woo; gomme Joshua a dira ka mokgwa woo; a se hlaetše le setee sa tše Morena a di laetšego Moshe.

₁₆Naga yeo ka moka Joshua o e tšere ka mokgwa woo, ya dithaba le naga ka moka ya thoko ya borwa, le naga ka moka ya Gosene, le ya molala, le ya legola, le dithaba tša Isiraele le dihlaba tša tšona. ₁₇Go tloga ka dithaba tša magwete tše di rotogelago Seire, go goma ka Baaligada moeding wa Libanoni ka tlase ga thaba ya Herimone. Le dikgoši tša gona a di thopa, a di fetša a di bolaya. ₁₈Joshua o feditše matšatši a mantši a elwa le dikgoši tšeo. ₁₉Ga go a ka gwa ba le motse wo wa nago wa nyaka leago go Baisiraele, ga e se Bahefi bala ba ba bego ba agile Gibeoni; naga ka moka ba e thopile ka ntwa. ₂₀Gobane di be di etšwa go Morena ge dipelo tša bona di thatafala, tša rata go lwa le Baisiraele. E be e le gore ba dirwe digafiwamoka, ba se ke ba gaugelwa, ba nape ba fedišwe bjalo ka ge Morena a laetše Moshe.

₂₁Mehleng yeo Joshua o tšwile a fediša Baenaki dithabeng tša Heburone le Debiri le Anaba, le dithabeng tša Juda ka moka, le dithabeng tša Isiraele ka moka. Joshua a ba dira digafiwa le metse ya bona. ₂₂Mo nageng ya Isiraele gwa se ke gwa šadišwa Baenaki, ge e se fela ba Gasa, le ba Gathi, le ba Asidodo, bona ba šala.

₂₃Joshua a tšea naga ka moka, a phetha tšohle tše Morena a kilego a di botša Moshe. Joshua a e nea Baisiraele ya ba magae a bona ka dilete tša bona le ka meloko ya bona.

Gomme naga ya khutša dintwa.