Modimo o ruta Jona go gaugela batho
1Jona, yena tša mmefela ka gogolo, a kgarametšega. 2A rapela Modimo a re: Joo, Morena! A ga se sona se ka nago ka se bolela mola ke sa le ga gešo, se ke bego ke tšhaba sona ge ke re ke tšhabela Tarasisi? Ka gobane ke be ke tseba ge o le Modimo wa mabobo le yo kgaugelo, wa go se fele pelo, wa botho bjo bogolo; o a thiša ge o boletše bošula. 3Morena, bjale a ko tšee bophelo bja ka, gobane go kaone ge nka hwa, ke se hlwe ke phela.
4Morena a re: A o re o dira gabotse ge o befelwa?
5Jona a tšwa motseng a dula a lebane nawo thoko ya bohlabela; a ikagela leobjana, a dula moriting wa lona, a re: Ke tlo bona se motse o tlogo dirwa sona. 6Morena Modimo a mediša mokhure, wa okamela Jona, ya ba moriti wa hlogo ya gagwe, wa go okobatša dipefelo tša gagwe. Mme Jona, mokhure woo a o thabela ka lethabo le legolo. 7Fela, ka moswana, ge mahuba a hlatloga, Modimo a tliša seboko, sa fehla mokhure woo, wa pona. 8Ya re ge letšatši le hlaba, Modimo a tsoša moya o fišago wa bohlabela, letšatši la fiša Jona hlogo, a ba a tepelela, a ikgopelela go hwa, a re: Go kaone ge nka hwa ke se hlwe ke phela!
9Modimo a bolela le Jona a re: A o re o dira gabotse ge o befelwa ka tša mokhure wo? --
Jona a re: Ke dira gabotse ge ke befetšwe, ge ke re ke hwe.
10Ke mo Morena a itšego: Wena o kwela mokhure bohloko, wo o sa kago wa o dira, wo o tšweletšego ka bošego bo tee, wa napa wa senyega ka bošego bo tee. 11Bjale nna a nka se kwele Ninife bohloko, e lego motse o mogolo, o nago le batho ba ba fetišago dikete tše lekgolo le dikete tše masome a mabedi, tša ba ba sešogo ba tseba go hlaola letsogo le letona le la ntsogošo, le diruiwa tše ntši?
