JOBO 5

₁Gweletša! Wa go araba o gona naa? -- Mokgethwa ke ofe yo o tlo go lebana nae? ₂Lešilo le bolawa ke sebete; setlatla se hwa ka lehufa. ₃Ke bone lešilo le namile medu; ka tloga ke roga marope a lona. ₄Bana ba lona ba kgole le monamoledi; ba kataketšwe mo kgorong, go se na molwedi. ₅Mabele a bona a llwe ke ba tlala; ba a ntšha gare ga magora; matlotlo a bona a meditšwe ke ba nyorilwego. ₆Gobane madimabe ga a mele fase; mahlomola ga a hloge a etšwa mobung; ₇ke motho e a tswaletšwego mahlomola; o etša dihlase ge di tsoga le kgabo tša fofa. ₈Ge e ka be e le nna, fo iša mogopolo go Modimo; taba ya ka nka be ke e digela yena Modimo, ₉yena Modiri wa tše kgolo di sa latišegego, yena wa matete a a sa balwego. ₁₀Yena a romago pula, ya tla mo faseng, a tšhollela meetse melaleng; ₁₁ya ba go phagamiša babotlana; ba ba nyamilego, ya ba go ba tsoša ba phologa. ₁₂Merero ya ba maano o a e senya, diatla tša bona di se sa kgona selo. ₁₃Ba mahlale o ba tanya ka a bona maano, baipoti ba iphereketša ka mamenemene. ₁₄Ba gahlana le leswiswi mola go šetše go sile; ba phapharega wa bošego mola e le mosegare. ₁₅Ke tša mohla a efela mosenyegi marumong, le ganong la bona, diatleng tše maatla. ₁₆Ya ba la lehutšo la mmotlana; gwa homola wa makgopo. ₁₇Tseba ge; yo lešego ke mosolwakeModimo; se nyatše ge kgalemo ya Yomaatlaohle; ₁₈gobane o a gobatša, a be a tlemelele; o a hlokofatša, mme atla tšagwe di be di fodiše. ₁₉Ge a go namoletše tlalelong tše selelago, le go tše šupago o ka se welwe ke bošula. ₂₀Tlaleng o go efela lehu; ntweng o go efela boelo bja tšhoša. ₂₁Mohla wa kgati tša maleme o tlo khutša; mohla go tlago tšhwalalanyo o ka se ke wa šia. ₂₂O tlo sega tšhwalalanyo le ditlala; dibata tša naga o ka se di boife. ₂₃O tlo ba o lakane le maswika a šokeng; le dibata tša dinaga di tlo khutšišana nago. ₂₄Lapa la gago o tlo hwetša le na le molao, wa bona mo motseng wa gago go sa hlokwe selo. ₂₅Bana ba gago o tlo bona e le ba bantši, le ditlogolwana di atile boka mere lefaseng. ₂₆Lebitleng o tlo ya o tšofetše, o etša roto sa mabele lebakeng la gona. ₂₇Sedio, re di latišitše; le wena theeletša, o be le temogo.