JOBO 42

₁Jobo a fetola, a bolela le Morena a re: ₂Ke tseba gobane o Mokgonatšohle; ga go na se o kago rata go se dira mme sa go palela. ₃Ge o re: Ke mang eo a širago dikelelo ka polelo di se nago tlhaologanyo -- ke nna ke boletšego ke sa hlaologanye mehlolo ye e mpalelago; ke be ke sa tsebe. ₄Ge o itše: Ntheetše ke bolele; wa re: Ke tlo go botšiša mme wa nthuta -- ₅Go kwa ka ditsebe ke be ke ekwa; bjale gona mahlo a ka a go bone. ₆Gomme bjalo ke a inyatša, ke a itshola ke le lerole le molora.

₇Ya re Morena a boletše le Jobo ka mokgwa wo, a bolela le Elifase wa Thema, a re: Bogale bja ka bo tuketše wena le bagwera ba gago ba babedi bao, ka gobane ga la ka la etša Jobo mohlanka wa ka la mpolela ka mo go swanetšego. ₈Bjale yang le tšee dipowana tše di šupago, le diphokwana tše di šupago, le tle go Jobo mohlanka wa ka, le hlabe sehlabelo sa lena. Gomme Jobo mohlanka wa ka a le rapelele, ka gobane e tlo ba go setša yena, ge ke sa le dire ka mo go swanetšego bošilo bja lena; gobane lena ga la ka la etša Jobo la mpolela ka mo go swanetšego.

₉Gomme Elifase wa Thema, le Bilidada wa Sua, le Tsofara wa Naama ba ya ba dira ka mo Morena a boletšego; gomme Morena a dumela ge Jobo a ba rapelela.

₁₀Morena a hunolla Jobo ditlemo mola a rapeletše bagwera ba gagwe, a buša a mo nea lehumo, la etša lela la pele ge le balwa gabedi. ₁₁Gwa tla bana babo ka moka, le dikgaetšedi tša gagwe ka moka, le bohle ba a bego a tsebana le bona mohlamonene, ba ja le yena lapeng la gagwe, ba lla nae ba mo homotša ka lebaka la mahlomola ala ka moka a Morena a bego a mo rwešitše ona. Bohle ka o tee ba mo nea ditseka le palamonwana ya gauta.

₁₂Morena yena a šegofatša Jobo ka tše di tlilego bjale; tša fetiša tša mola pele; a rua dinku tše dikete tše lesome la metšo e mene, le dikamela tše dikete tše di selelago, le dipholo tša dijoko tše sekete, le sekete sa dipokolo tša ditshadi. ₁₃Barwa ba gagwe ya ba ba ba šupago; barwedi ya ba ba bararo. ₁₄Morwedi wa pele a mo rea leina la Jemima, la wa bobedi a re ke Ketsia, la wa boraro a re ke Kerene-Hapuka. ₁₅Gomme nageng ka moka go be go sa bonwe basadi ba ba swanago le barwedi ba Jobo ka botse, mme tatabo a ba arolela lefa gotee le dikgaetšedi tša bona.

₁₆Jobo a phela, a buša a fetša nywaga ye lekgolo le masome a mane a le gona, a bona bana le bana ba bana ba gagwe go fihle molokong wa bone. ₁₇Jobo o hwile a tšofetše, a khoše bophelo.