JOBO 40

₁Morena a botšiša Jobo a re: ₂Motšeakgang le Yomaatlaohle a o sa re ruta? Mmega-Modimo a a fetole! ₃Jobo a fetola a re: ₄Ge e le nna, ga ke motho wa selo. Nka fetola kang? Ke swara molomo ka seatla. ₅Ke boletše gatee, ga ke sa fetola. Ke boletše la bobedi; ga ke sa boeletša.

₆Morena a le ledimong a fetola a re: ₇Itleme matheka senna, ke go botšiše o nthute. ₈A o sa re ke fošitše, wa re go šaeditše nna, wa re e a se nago molato ke wena? ₉A o ne letsogo le le kakago la Modimo? A o ka dumiša medumo bjalo ka yena? ₁₀Gona apara bogolo le borena, o tšhepe ka phadimo le ka letago. ₁₁Tšholla magaba, o uše tšohle tše o bonago di ikgodiša. ₁₂Tšohle tše o bonago di ikgodiša o di inamiše; ba babe o ba gatakele mo ba lego gona. ₁₃Bohle o ba fihle leroleng; difahlogo tša bona o di iše mo di sa hlwego di bonwa. ₁₄Ke mo le nna ke tlogo go reta, ge tsogo la gago le go namoletše. ₁₅O ko bone kubu, ye ke e dirilego, boka le wena ke go dirile, -- e fula bjang wa kgomo. ₁₆O ko bone maatla a nokeng tša yona, le a ditšhika tša mpeng ya yona. ₁₇E otlolla mosela wa etša phata ya morokwana; mme dipotongwane tša dirope tša yona di rarakane. ₁₈Marapo a yona a etša dikota tša mphiri, dikgopo tša yona di etša mapara a tshipi. ₁₉Ke yona ketapele ya ditsela tša Modimo; Mmopi wa yona o e file lerumo. ₂₀Dithaba di ipega go yona ka dijo; diphoofolo tša lešoka di bapala gona moo. ₂₁E hutama moriting wa dihlašana; e khuta ka lehlakanoka mehlakeng, ₂₂Dihlare di e ukametše ka meriti; e boba mo megokareng ya noka. ₂₃Le ge noka e ka tlala, ga e tšhabe; le ge noka e elago e ka tšhologela leganong la yona, ga e tšhoge. ₂₄A e ka swarwa e sa bona? A e ka thulelwa mogala? ₂₅Kwena a o ka e goga ka kgwega? A o ka e tlema mohlagare ka lenti? ₂₆A o ka e tsenya mogala nkong; a o ka phula mohlagare wa yona ka letsolo. ₂₇A o re e ka ba ya go rapela, ya bolela nago ka boleta? ₂₈A o ka lakana nayo, wa e dira mohlanka wa gago ka mehla? ₂₉A o ka e bapadiša bjalo ka nonyana? A o ka e tlema wa e tliša go banenyana bago? ₃₀A e kile ya bapatšwa ke mmapatši, bareki ba segelwa nama ya yona? ₃₁A o ka thulakanya tlalo la yona ka tšhoša? Hlogo ya yona a o ka e goga ka matsogo? ₃₂E iše letsogo, o tsebe tlhabano; o ka se ke wa boeletša.