JOBO 39

₁Lebaka la ge kome e tswala a o a le tseba? Le la ge tholo e šokwa? ₂Dikgwedi tša ge di duša a o di badile, wa tseba letšatši la ge di tswala? ₃Ge di tswala di a kudupana, tša kgotlelela ge di šokwa. ₄Bana ba tšona ba a tia, ba golela lešokeng; ba tloga ba se hlwe ba boa. ₅Pitsi ya naga e leswa ke mang ya itshepelela? Yona yeo thagalekwara, ke mang a e hunolotšego? ₆Ke yona yeo ke beilego lešoka bodulo bja yona; lehanata ka re ke legae la yona. ₇Yona e nyatša mašata a motse; ga e rate go kwa dikgalemo tša mootledi. ₈Mafulo a yona e a nyaka dithabeng, e itsomela tše tala ka moka. ₉Nare, a e ka rata go ba mohlanka wa gago? A e ka lala lešakeng la gago? ₁₀Yona nare, a o ka e tlema ya latela tema? A e ka go šala nthago e phophotha makokota mohlakeng? ₁₁A o ka e bota ka ge e ne maatla a magolo, wa e gafela mediro ya gago? ₁₂A o ka e holofela wa re e goroše mabele a gago, wa re e a rwale seboeng sa gago, ₁₃Mpšhe e kgantšha diphego, go se lefego le le botegago, le ge e le lefofa. ₁₄Mae a yona e a šia mo mobung; a alamelwa ke lerole. ₁₅E lebetše gore a ka gatakelwa ka dihlako, a ka pšhatlwa ke diphoofolo. ₁₆Bana ba yona ga e ba ekelele, eke ga se ba yona. Le ge modiro wa yona o ka senyega, ga e belaele selo. ₁₇Gobane Modimo o e gakišitše tlhaologanyo, o e kunne temogo. ₁₈Fela, mohla e phurolla e taboga, e nyatša pitsi le monamedi wa yona. ₁₉A ke wene o neago pitsi maatla, wa hlama molala wa yona ka moetse? ₂₀A ke wene o e tlolatlodišago bokatšie, ge e tšhoša ka go letša dinko? ₂₁E gwaila mobu ka dihlako e kgantšha maatla a yona, ge e ya go gahlana le marumo. ₂₂E ila poifo, ga e tšhoge selo, ga e tšhabe ge e lebana marumo, ₂₃ge kgotlopo e ka kgwelakgwehla dibetša e le mo go yona, ge go phadima tšhoša le lerumo. ₂₄E roromela ka sehutla, e nyatša molala; ga e sa dumela ge e kwa leparapatla. ₂₅Ge go lla kwadi ya marumo e tlo re “Agee!” E kwa monkgo wa tlhabano e le kgole; e kwa dikgalemo tša matona le mekgoši. ₂₆Nong ge e fofa, a ke ka tlhaloganyo yago? Ge e phurolla diphego mme ya leba borwa? ₂₇Ge lenong le akalala, a le romilwe ke wena? Ge le aga sehlaga sa lona makalakaleng? ₂₈Le dula mantsweng, le lala maribeng, kua dintlheng tša dithaba. ₂₉Le le gona kua le hlola dijo tša lona; mahlo a lona a bona tša kgole. ₃₀Bana ba lona ba monoka madi. Mme mo go lego setoto, le lona lenong le gona.