JOBO 38

₁Bjale gwa fetola Morena, a bolela le Jobo a le ledimong, a re: ₂Ke mang eo a širago dikelelo ka polelo di se nago tlhaloganyo? ₃Itleme letheka senna; ke tlo go botšiša mme wa nthuta. ₄O be o le kae mola ke thea lefase? -- Bolela ge o tseba. ₅Monaganakelo ya lona ke mang? -- Ke be ke re o a tseba. -- Motheametheo ya lona ke mang? ₆Dithekgo tša lona di tsemilwe kae? Motheamathekgadikhutlo tša lona ke mang? ₇Ke tša mola go hlalala naledi tša meso tšohle, go gobela bana bohle ba Modimo. ₈Ke mang a ageletšego lewatle ka maforo, mola le hlaga, le etšwa mo le tswetšwego? ₉Mola ke sa le apešitše maru, ke sa le phuthetše ka leswiswi le legolo; ₁₀ka le beela magomo mo ke bego ke go rata, ka le beela meswiko le magoro; ₁₁ka re: O tlo tla o goma fa, wa se fetele pele; gona fa ke mo go tlogo phohlela boikgogomošo bja maphoto ago. ₁₂Mola o phelago a o kile wa laola moso? A o kile wa laetša mahuba madulo? ₁₃Gore a sware morumo wa lefase, go hlohlorwe ba babe ba go lona; ₁₄la fetoga bjalo ka letsopa ge le bopša, la itlhopha eke ke matsaka; ₁₅ya ba go tima lebone la babe; ya ba go roba tsogo le le bego le akgilwe? ₁₆A o kile wa ya kua go lego methopo ya lewatle? Wa itshepelela kua tlasetlase madibeng a lona? ₁₇A o kile wa bulelwa kgoro tša lehu, wa bona kgoro ya thiti ya lehu? ₁₈Bophara bja lefase a o bo lemogile? -- Bolela ge tše ka moka o di tseba. ₁₉E kae tsela e yago kua go dulago seedi? Bodulo bja leswiswi bo go kae? ₂₀Gore o kgone go yo di tšea gona kua mellwaneng ya tšona, ka go tseba mmila wa motseng wa tšona. ₂₁Aowii, o a di tseba! Gobane ke tša mehla o šetše o tswetšwe. Ehlale o le wa matšatši! ₂₂Kua matlolong a leswela a o kile wa fihla? Dišego tša difako a o di bone? ₂₃Tšona ke di boloketše mehla ya tlaletšo, mehla ya tlhabano le ya ntwa. ₂₄E kae tsela e yago kua go abaganywago seetša, mo go tsogago phefo ya bohlabatšatši, ya tšea lefase ka moka? ₂₅Ke mang a thulelago pula tša mafula mmila? Mme tladi ya medumo a e bulela tsela? ₂₆Gore pula e ne mafaseng go sego motho, mahanateng mo go sa dulego batho. ₂₇Gore go nošetšwe nagatshehla le masodi, go tle go mele bjang bjo bofsa. ₂₈A fa pula e na le tatayo? Marotholodi a a phoka a tswalwa ke mang? ₂₉Mmagomeetsemagatsela naa ke mang? Ke mang a belegago tšhwane ya godimo? ₃₀Meetse a gatsela a etša letlapa, sefahlogo sa bodiba sa thatafa. ₃₁A ke wena o kago kgokaganya Selemela? Goba wa tlemolola tlemo tša boMagakgala? ₃₂A ke wena o kago tsoša molokoloko wa dinaledi? A ke wena o kago gapa Thutlwa le Thutlwana? ₃₃A o tseba melao e beetšwego magodimo? A ke wena o a fago maatla a go buša fase leno? ₃₄A lentšu la gago le ka fihla kua marung, wa bitša lefula la meetse la go ribegela? ₃₅A o ka roma dikgadima tša sepela, tša tla tša go rera tša re: Ke rena ba!? ₃₆Ke mang a beilego bohlale diphiring? Ke mang a neilego dilo tša leratadima tsebo? ₃₇Ke mang wa go hlalefa go ka bala maru? Ke mang a tšhololago meeta yeo ya godimo? ₃₈Ke tša mohla mobu o omile, e le makokota, o bopagane ka makoloboto. ₃₉A ke wena o tsomišago tau phoofolo, wa horiša ditawana dimpa? ₄₀Ka gobane di patlame matšabeng a tšona; di lalela di utame mo sekgweng. ₄₁Ke mang a fago magukubu dijo, ge bana ba ona ba llela Modimo mohla ba timetše ba se ne sa go ja?