1Elihu a iša pele a re: 2Lena ba bohlale, kwang polelo ya ka. Lena bomaitse, ntlhwaeleng ditsebe. 3Gobane tsebe ke ya go kwa puo, boka magalapa a ekwa go tsefa ga dijo. 4A re ikgetheleng se e lego go loka, re tsebe se e lego botse. 5Gobane Jobo o re: Ga ke ne molato, o re: Modimo o nkamoga se se ntshwanetšego. 6O re: Ke dirwa moaketši mola ke lokile, ke hlabilwe ke mosebe wo o sa felego, ke se ne phapogo. 7O kae monna e a etšago Jobo, a hupa maroga boka meetse, 8a wela tsela ya go kwana le badirabobe, a swara ya batho ba ba sa lokago? 9Gobane o itše: Go kwana le Modimo ga go hole motho selo. 10Bjale lena batho ba bohlale, kwang ge ke re: Modimo o kgole le bokgopo; Yomaatlaohle o kgole le go foša. 11O bušetša motho ka mo go lebanego tiro tšagwe, mme monna o mo hwetšiša tša tsela ye a e swerego. 12Ka kgonthe, Modimo ga a šaetše; Yomaatlaohle ga a hlaole kahlolong. 13Ke mang a mmeilego a re a buše lefase? Mme thetebudi ya lona ka moka ke mang e a e theilego? 14Ge a ka dira ka go ithata, ge a ka gomiša moya wagwe, mohemo wa gagwe, 15nama yohle e ka loba, batho ba boela leroleng. 16Ge o na le tlhaologanyo, theeletša tše, o sekegele lentšu la polelo ya ka tsebe. 17Mohlaolakahlolong a ka buša bjang? O reng o lahla yena Moloki. Yena Yoomaatla? 18E a kago ra kgoši a re: Ga o tsebalege! A ra bakgoma a re: Le disenyi! 19Yena eo ga a bebe difahlogo tša dikgoši, ga a setše lehumagadi a lahla babotlana; gobane bohle ke babopša ba diatla tšagwe. 20Ga ba thata go hwa, le bošegogare; le setšhaba se ka šišinyega sa široga; le ba maatla o ba tloša a sa ka a iša seatla. 21Gobane mahlo a gagwe a bona ditsela tša motho; o šetša dikgato tša gagwe ka moka. 22Ga go leswiswi, le thiti ya lehu ga eyo, mo badiradibe ba kago ikuta gona. 23Gobane ga a hlwe a šeditše motho, gore a tsebe go mo iša kahlolong. 24O pšhatla ba maatla, ba sešo ba sekišwa, a nea ba bangwe madulo a bona. 25Ke gona go tseba mediro ya bona; o ba uša bošego, a ba šilakanya. 26O ba otla magoeng ka ge e le disenyi, 27e le ka gobane ba mo hlanogetše, ba lahla ditsela tša gagwe ka moka. 28O dira bjalo gore dillo tša mmotlana di tlišwe go yena, gore a kwe kgoeletšo tša badiidi. 29Ge yena a khutšiša batho, a kago mo sola ke mang? Ge a ka šira sefahlogo sagwe, o sa tlo bonwa ke mang? E ka ba setšhaba, e ka ba motho o tee, go dutše bjalo. 30Gore go se ke gwa buša motho e mošoro, a se be moreo wa setšhaba. 31A go swanetše ge Modimo a ka re: Ke fošitše? Goba a ka re: Nka se senye gape? 32Goba a ka re: Ntshebele se ke sego ka se bona; ge ke šaeditše, nka se boeletše? 33A o re Modimo a lefeletše motho a romilwe ke wena? Ke realo ka gobane o a nyatša. A go kgethe wena, e sego nna. Bolela se o se tsebago. 34Batho ba tlhaologanyo le banna ba bohlale ba ba ntheetšago, ba tlo mpotša ba re: 35Jobo o boletše a sa tsebe selo; o boletše a sešo a eleletša. 36A Jobo a lekwe go ya go ile, ka ge a fetola boka bathobabe. 37O hlatlaganya dibe tšagwe le tlhanogo; o tsota a le makgatheng a rena; o rumola Modimo ka se a se bolelago.
