JOBO 26

₁Jobo a fetola a re: ₂Mohlokamaatla o mo thušitše kang? Letsogo le le sa tiago o le namoletše kang? ₃Mohlokabohlale o mo eleditše kang, wa mo ruta bohlale ka botlalo? ₄Ditaba tša gago o di anegetše mang? Mme ke moya wa mang o tšwilego molomong wa gago? ₅Kua tlase meetseng diriti di a roromela, ga mmogo le ba agilego gona. ₆Pele ga gagwe le bodulabahu bo a utologa, sekoti se khurumologile. ₇La leboa o le adile ka mašoka; lefase a le fega go se ne dithekgo. ₈O phuthela meetse mo marung a gagwe, gwa se be le leru le le gagogago fao. ₉Sedulo sa gagwe o se šira ka go ala leru lagwe mo go sona. ₁₀O beetše meetse magomo thoko tšohle, gona kua go gomago seetša le leswiswi. ₁₁Dithekgo tša leratadima di a šišinyega, di roromela ge a kgalemela. ₁₂O hudua lewatle ka maatla a gagwe; sehlogo sa lona o se ukubatša ka bohlale bjagwe. ₁₃Ka moya wa gagwe legodimo le apara swana; seatla sa gagwe se hlaba noga e tšhabago. ₁₄Sedio, ke yona merumo ya tsela tša gagwe, mme tše rena re di kwago ke tša go sebasebja fela. Modumo wa maatla a gagwe, wona ke mang a kago o kwa?