JOBO 24

₁Yomaatlakamoka, mabaka a reng a sa bewe ke yena? Le ba ba mo tsebago ga ba bone matšatši a gagwe. ₂Batho ba šuthiša mellwane, ba thopa mehlape ba e fudiša. ₃Ba gapa pokolo ya motho wa sešuana; ba swarelela ka dipholo tša mohlologadi. ₄Ba šušula badiidi tseleng; bahumanegi mo nageng ba utama bohle. ₅Sebao, ba tšwela medirong ya bona bjalo ka pokolo tša lešoka, ba tsogetše go yo sela; lešoka le ba nea bogobe bja bana ba bona. ₆Mabele ba buna nageng, ba budutša morara e sego wa bona. ₇Ba lala ba hlobotše ba hloka dikobo; ga ba na seaparo mohla wa maruru. ₈Ba newa ke dipula dithabeng; ba imanne ka magaga ka go hloka mo ba kago khuta. ₉Sešuana ba se tloša letsweleng, mmotlana ba mo swarelela ka se a se aperego. ₁₀Ba ba lesa ba sepela ba hlobotše, ba rwele dingata ba swerwe ke tlala. ₁₁Ba hlotla makhura gare ga merako; ba fotla morara ba nyorilwe. ₁₂Motseng go gokga ba ba hwago; ke mekgoši ya meoya ya babolawa; mme Modimo ga a di bone molato. ₁₃Bona bao ke bahloi ba seedi; ga ba tsebe ditsela tša gagwe; ga ba tle mebileng ya gagwe. ₁₄Senokwana se tsoga ge go esa; se yo bolaya mmotlana le modiitšana. O dira tša bohodu e le bošego. ₁₅Leihlo la seotswa le letela lesothwana; o re ke se bonwe ke leihlo, a pipetša sefahlogo ka lešela. ₁₆Nywako ba e bula ka leswiswi, mosegare ba itswalelela. Seetša ga ba se tsebe. ₁₇Bona bao bohle ke ba go re: Go sele, ge go le leswiswi, ka ge ba tlwaelane le tše di šiišago tša leswiswi. ₁₈E mongwe šolee, o rwelwe ke lewatle; motse wa gabo mono faseng o šala o lahlilwe; ga go sa bonwa tsela ya go tšwela mašemong. ₁₉Molete wa bahu o metša basenyi, boka komelelo le letšatši ge di metša meetse a sefako. ₂₀O lebalwa ke motswadi, o natefela poko, ga a sa gopolwa; bokgopo bo robja boka legong. ₂₁Ke yena wa go ja moopa a sa belegego, wa go se setše mosadi wa mohlologadi. ₂₂Ke yena a beago ba bagolo ka maatla a gagwe, ba tsoga mola ba šetše ba hutšologile go phela. ₂₃O ba gafela go iketla ba thekgilwe; mme mahlo a gagwe a bona ditsela tša bona. ₂₄Ge ba godile, ke tša lebakanyana fela; mme go hwetšwa ba se gona, ba sobetše, ba lobile boka bohle, ba ripilwe bjalo ka diako. ₂₅A ga go bjalo? -- Ke mang a kago re ke boletše maaka, a nyatšiša taodišo ya ka?