JOBO 21

₁Jobo a fetola a re: ₂Kwišišang se ke se bolelago; ke mo le tlogo ba le dikhomotšo. ₃Ntshwareleng, le nna ke bolele. E tlo re ge ke boletše, la kgona le nkwera. ₄Nna ge ke lla, a ke llela motho naa? Goba, ge go ka ba bjalo, nka se fele pelo naa? ₅Ntebelleng, le tšhoge le sware melomo. ₆Nna ge ke eleletša, ke a gakanega, mme mmele wa ka wa tšitšimologa. ₇Ke ka baka lang ge ba babe ba phela, ba ba ba tšofala, ba tia maatla ka go huma? ₈Ba bona bana ba bona ba tiile ba na nabo; ba bona le ditlogolwana. ₉Nywakong ya bona go thabilwe, ga go na se se ba tšhošago; ga go kgati ya Modimo ye e ba tlelago. ₁₀Poo ya gagwe e goela e sa hlaetše; mme kgomo ya gagwe e tswala e sa folotše. ₁₁Bašimanyana ba bona ba rongwa ka mohlape; mme bana ba bona ba a binabina. ₁₂Ba fela ba gobela ka meropa le makope, ba ithabela ge go lla dinaka. ₁₃Ba fetša matšatši a bona ka tše bose, mme felo ga bahu ba fologa go se thata. ₁₄Le ge go le bjalo ke ba felago ba re: Modimo a a tloge fa go rena; ditsela tša gagwe ga di re kgahle. ₁₅Ba re: Yomaatlaohle ke eng, ge re thwe re mo hlankele? Ge re ka mo rerelela go ka re holang? ₁₆Anthe, tše botse tše ba di bonago, ga di mo atleng tša bona. Gomme kakanyo ya ba babe e kgole le nna. ₁₇Lebone la ba babe ke gantši le tima; tshenyego e ba tlela, ge yena a ba nea kabelo ya mahloko a befetšwe. ₁₈Ba tlo swana le matšobe mohla wa diphefo; ba tlo etša moko ge o thopša ke ledimo. ₁₉Bana ba yo mobe, bošula bja tatabo ba bo boloketšwe ke Modimo. O tlo lefeletšwa mme a tseba. ₂₀A bona tshenyego ya gagwe ka mahlo, ge a nošwa dikgalefo tša Yomaatlaohle. ₂₁Tša mo lapeng la gagwe di ka mo thabiša bjang ge a ile, ge go šetše go fedile palo ya dikgwedi tšagwe? ₂₂A Modimo a ka rutwa tsebo, yena Moahlodi wa ba godimong? ₂₃E mongwe o hwa a humile ruri, a thabile a na le mahlatse, ₂₄kgamelo tša gagwe di tletše lebese, mašapo a gagwe a sa fela a tiile moko. ₂₅E mongwe o hwa a nyamile pelo, a sešo a natefelwa ke tše botse. ₂₆Bobedi bja bona ba ile go lala mobung, ba aparetšwe ke diboko. ₂₇Sedio; megopolo ya lena ke a e tseba, le maano a le ntakanego ka ona. ₂₈Ge le re: O kae motse wola wa lehumagadi? O kae ngwako wola wa go dula ba bokgopo? ₂₉A ga lešo la botšiša bafeti ba tsela, bao le sa ganetšego ge ba le hlatsela, ₃₀ba re: Yo mobe o phonyokgile mohla wa dikotsi; o efogile mohla wa kgalefo? ₃₁Ke mang a lebanago nae a sola tsela tšagwe? Ke mang a kago lefeletša tiro tšagwe? ₃₂O tlo ba a išwa lebitleng, mme phupung ya lona gwa hlapetšwa, ₃₃A yo natefelwa ke makokota a moeding. -- Gomme batho bohle ba a mo latela; le ba mo etilego pele ga ba balwe. ₃₄Bjale lena, le ka nkhomotša bjang ka dilo tša lefela? Phetolong tša lena go šala bohlanogi.