JOBO 19

₁Jobo a fetola a re: ₂Le tlo kgaotša neng go hlokofatša pelo ya ka le go ntshetlaganya ka dipuo? ₃Ke la lesome bjalo le nkgoboša, le mphotlela le se ne dihlong. ₄Ge e ka ba ruri ke fošitše, gona phošo ya ka e tlo ba taba ya ka. ₅Ge ka kgonthe le ikgodišitše mme la nnyatša, gona ntaetšeng mo ke ikgobošitšego. ₆Le tsebe ge Modimo a nthobile, ge a ntharile ka malokwa agwe. ₇Le ge ke hlaba mokgoši ka re ke a katwa, ga ke kwewe; le ge ke tsoša lentšu, ga ke namolelwe. ₈O thibile tsela gore ke se fete, le ditselaneng o mpeetše swiswi. ₉Bogolo bja ka o nkapotše, o nkamogile mphapahlogo. ₁₀O nkatakile thoko tšohle; ke a tloga. Kholofelo ya ka e tomotšwe bjalo ka sehlare. ₁₁Nna o ntuketše bogale, o ntshema lenaba la gagwe. ₁₂Madira a gagwe ohle a ntikile, a thutše tsela ya go nkwela, a rakeletše motse wa ka. ₁₃O nkamogile bana bešo a ba iša kgole; ba ke bego ke tsebana nabo ba a ntlhanogela. ₁₄Ba leloko lešo ba ntahlile; mme bagwera ba ka ba ntebetše. ₁₅Ba lapa la ka le balata ba ka ba ntshema lethoko, ba mpona ke le wa ntle. ₁₆Ka re ke bitša molata, a se arabe; ge e se go mo rapela ka molomo wa ka. ₁₇Mosadi wa ka o selekwa ke mohemo wa ka; le bana ba mme ba re ke a nkga. ₁₈Le bašimanyana ba a nnyatša, ba a ntshega ge ke re ke a tsoga. ₁₉Bagwera ba ka bohle ba bohloko ba a ntlhaswa; le ba ke bego ke ba rata ba nkemetše ka le šele. ₂₀Mašapo a ka a tatetšwe ke letlalo la ka le mešifa; se se ntšhaletšego ke marenene a meno. ₂₁Hle ntšhokelweng! Hle ntšhokelweng, lena bagwera ba ka, gobane atla sa Modimo se nkotlile. ₂₂Le reng le ntlhomarela bjalo ka Modimo, le sešo la khora, nama ya ka e le bjalo. ₂₃A mola go ka be go ngwalwa tše ke di bolelago! A mola nka be di bolokwa ka lengwalo. ₂₄A mola di ka be di tlokwa ka tšhipi morodung, tša dula di betlilwe leswikeng. ₂₅Ke tseba gobane Molopolodi wa ka o a phela; yo a tlogo šala a eme godimo ga lerole ke yena. ₂₆Ke tlo ba ka bona Modimo, le ge go senyegile tlalo la ka, dilo tše, ke se sa na nama ya ka. ₂₇Ke yena yo ke tlogo mmona, e le nna, e le mahlo a ka, e se a o šele, a a tlo go mmona. -- Pelo ya ka e goletšwe mo teng ga ka. ₂₈Ge le re: Re mo hlomarela bjang? -- mme modu wa taba o le mo go nna, ₂₉gona boifang lerumo; gobane lehloyo ke molato wa lerumo. Le tsebe ge go sa na le kahlolo.