JOHANE 15

₁Ke nna sehlare sa morara wa makgonthe; molemi ke Tate. ₂Lekala lefe le lefe mo go nna le sa enywego dienywa, o a le ripa; lefe le lefe le le enywago, o a le thenela gore le atiše dienywa. ₃Lena le šetše le thenetšwe ka lentšu le ke le boditšego lona. ₄Dulang le le mo go nna, ke le go lena. Boka lekala, ge le sa kgone go enywa le le noši, le sa dule sehlareng sa morara, le go lena go tlo ba bjalo, ge le sa dule mo go nna.

₅Sehlare sa morara ke nna, makala ke bolena. E a dulago a le mo go nna, le nna ke le go yena, o tlo enywa dienywa tše ntši, gobane ge le se ne nna, le ka se ke la kgona selo. ₆Motho ge a sa dule a le mo go nna, o lahletšwe ntle bjalo ka lekala ge le omeletše; motho a le topa a le lahlela mollong la swa. ₇Ge le dula le le go nna, le mantšu a ka ge a dula a le mo go lena, gona le tlo kgopela se le se ratago, la se hwetša. ₈Se Tate a tlogo retwa ka sona, ke ge le enywa dienywa tše ntši, le eba barutiwa ba ka. ₉Ke le ratile bjalo ka ge Tate a nthatile. Dulang le le leratong la ka. ₁₀Ge le lotola melao ya ka, ke gona le dulago le le leratong la ka, bjalo ka ge ke lototše melao ya Tate, ke dutše ke le leratong la gagwe.

₁₁Ditaba tše ke le boditše, gore lethabo la ka le be gona mo go lena, gore lethabo la lena e be le le tletšego. ₁₂Molao wa ka šo: Ratanang bjalo ka ge nna ke le ratile. ₁₃Ga go e a nago le lerato le le fetišago la eo a gafago bophelo bja gagwe ka baka la bagwera ba gagwe. ₁₄Lena le bagwera ba ka, ge le dira tše ke le laelago tšona. ₁₅Ga ke re le bahlanka; gobane mohlanka ga a tsebe se mong wa gagwe a se dirago. Lena, ke re le bagwera, ka gobane ke le boditše tšohle tše ke di kwilego go Tate. ₁₆Ga se lena le ntlhaotšego; ke nna ke hlaotšego bolena, ka le bea gore le ye le bee dienywa; mme dienywa tša lena di dule di le gona, gore se le kago se kgopela go Tate ka leina la ka, a le nee. ₁₇Se nna ke le laelago sona ke gore le ratane.

₁₈Ge lefase le le hloya, le tsebe gore le thomile go hloya nna. ₁₉Ge le ka be le le ba lefase, lefase le ka ba le rata ba e lego ba galo; gomme le le hloile ka ge le se ba galo, ka ge ke le hlaotše lefaseng. ₂₀Gopolang lentšu le ke le boditšego lona ka re: Mohlanka ga a fete mong wa gagwe. Ge nna ba ntlhomere, le lena ba tlo le hlomara. Ge la ka lentšu ba le lototše, le la lena ba tlo le lotola. ₂₁Gomme tše ka moka ba tlo le dira ka baka la leina la ka, e a nthomilego ba sa mo tsebe. ₂₂Ge nka be ke se tle ka ba botša, ba ka be ba se na molato. Gomme bjale ga ba na sa go ipata ka sona bakeng sa sebe sa bona, ₂₃E a hloilego nna, o hloile le Tate. ₂₄Ge nka be mo go bona ke se dire mediro ye e sešogo ya dirwa ke motho ba ka be ba se na sebe; bjale gomme ba e bone, moka ba nthloya, le Tate ba mo hloya. ₂₅Fela, ke gore go phethege lentšu le le ngwadilwego molaong wa bona, la re: Ba fo nthloya.

₂₆E tlo re ge go tlile yena Molwedi, yo ke tlogo re ke le go Tate ka mo roma a tla go lena, wona Moya wa therešo, e tlo ba yena hlatse ya go mpolela. ₂₇Gomme le lena le dihlatse ka gobane le be le na le nna go tloga mathomong.