Jeremia o lla ka go bona bonganga bja dipelo
1A mola nka be ke na le bokhutšo lešokeng, nka be ke šia setšhaba sa gešo ka tloga; gobane bohle ke diotswa, ke lešaba la dihlola. 2Ba ngangile maleme a bona bjalo ka bora ka maaka. Ge ba tiile maatla mo nageng, ga se ka therešo; ba hlatlamanya dibe. Nna ga ba ntsebe. O realo Morena. 3Motho a a itote a phafogetše le wa gabo; a se ke a bota le ngwanabo; gobane le bana ba motho ba a forana; le ba bagwera ba a sebana. 4Ba botšana maaka, ga ba sa rereša; ba ruta maleme a bona go aka; ba itapišetša go loganya bobe. 5O dutše gare ga bafori; ke ka baka la bjona bofori, ge ba sa rate go ntseba. O realo Morena. 6Molato ke wona woo ge Morena a re: Ke tlo ba iša meubeng ka ba leka gona. Ngwanenyana wa setšhaba sa ka ke tlo mo dirang ge go šetše go le bjalo. 7Maleme a bona ke mesebe e boelo, a bolela maaka; wa gabo ka molomo ba mmolediša tša leago, mola mo pelong ba mo laletše. 8A tše bjalo nka di lesa ke sa di otle? O realo Morena. Setšhaba sa mohuta woo a nka lesa go itefeletša go sona. 9Sello ke se lla dithabeng. Ke hlaba fela sa mahloko mafulong a kua šokeng, gobane a senyetše ka go hloka motho wa go feta ka gona; ga go sa kwala mollo wa seruo. Dinonyana tša mo sebakeng le dikgomo di khudugile di sepetše. 10Jerusalema ke go dira felo ga marako, letšaba la phukubje. Le metse ya Juda ke e dira ya marope a sa dulego motho. 11Ke mang monna yo bohlale, e a kago hlatha dilo tše? A botšwa ke molomo wa Morena, a anegela batho a re: So molato o sentšego naga ye, ya oma boka lehanata, e se sa dula motho.
12Morena o boletše a re: Molato ke ge ba lahlile molao wa ka ke o beilego pele ga bona, ba se kwe lentšu la ka, ba se ye ka lona.
13Ba ya le bonganga bja dipelo tša bona, ba latela bo Baali ka mo ba rutilwego ke borrabo. 14Morena wa mašaba, Modimo wa Isiraele a ba a re: Ge e le nna, setšhaba se ke tlo se leša tše di galakago, ke tlo se noša mpholo. 15Ke tlo ba šwalalanya ba yo dula ditšhabeng tše bona le borrabo ba sa di tsebego; ka roma lerumo la ba šala nthago, la tlo ba la ba fetša. 16Morena wa mašaba o re: Lemogang, le bitše bahlabi ba dillo; ba tlo tla. Romang, le bitše basadi bomakgone ba tšona dillo; ba tlo tla.
17A ba hlaganele ba hlatloše dillo ba re lediše; mahlo a rena a šiphole megokgo; dintšhi tša rena di ele meetse.
18Gobane kua Tsione go kwala sello sa ba rego: Joo, re thubilwe! Joo, re šaraketšwe! Joo, re a khudušwa! Joo, meago ya rena e re hladile!
19Hee, lena basadi, kwang lentšu la Morena, ditsebe tša lena di tsenwe ke se molomo wagwe o se boletšego. Rutang banana ba lena dikoša tša go lla, Le rutane go bokolla.
20Gobane lehu le re tsene ka maroba, le tsene mo nywakong ya rena ya mošate, le bolaya bana mekgobeng, le fediša masogana dikgorong. 21Bolela o re: Morena o re, ditoto tša batho di tlo lahlwa wa morole mašemong, di tlo etša dingatana tše di beilwego ke babuni, mme tša hloka bakgobedi. 22Morena o re: Yo bohlale a se ke a itheta ka bohlale; yo maatla a se ke a itheta maatla; mohumi a se ke a itheta ka mahumo.
23E a ithetago a a ithete ka tše: Ka ge a hlalefetše go ntseba, nna Morena, ke dirišago kgaogelo le molao le go loka mo faseng, e le tšona di nkgahlago. O realo Morena. 24Morena o re: Le tsebe gore go tlo tla matšatši a ge ke tlo sekiša ba ba bolotšego e se be go bolla.
25Baegipita, le Bajuda, le Baedomo, le Baamoni, le Bamoaba, le ba phulago tlopo, le ba dulago lešokeng. Gobane bantle bohle e sa le mašoboro; mme ba moloko wa Isiraele ke ba bošoboro bja dipelo.
