Borapedi bja lefela bjo bo se nago therešo
1Lentšu le le tletšego Jeremia le etšwa go Morena, šele: 2Ema mojakong wa ntlo ya Morena; o le moo o goelele o re: Kwang lentšu la Morena, lena Bajuda bohle, ba le tsenago ka mojako wo le etla go lotšha Morena. 3Morena wa mašaba Modimo wa Isiraele o re: Ditiro le tsela tša lena le di lokišeng; ke mo ke tlogo le agiša felo fa. 4Le se ke la holofela polelo tša maaka, ge go fela go thwe: Ntlokgethwa ya Morena še! Ntlokgethwa ya Morena še! Ntlokgethwa ya Morena še!
5Ge le ka lesa go lokiša ditsela tša lena le mediro ya lena sa ruri, ge le sa latiše moahlolelo wa go loka ge le sekišana. 6Ge le sa lese go pateletša mofaladi le sešuana le mosadi wa mohlologadi, la lesa go tšholla madi a se nago molato felo fa, la lesa go itshenya ka go latela medimo e šele, 7Gona nka se le agiše felo fa nageng ye ke e neetšego botataweno mehleng yela, ka re e tlo ba ya bona neng le neng.
8Fela lena, le ba go holofela foko la maaka le sa holego selo. 9A ga go utswiwe? A ga go bolawe? A ga go otswiwe? A ga go eniwe ka maaka? A ga go thuntšhwe diorelo tša Baali? A ga go latelwe medimo e šele ye le sa sa e tsebego? 10Bjale le fela le etla le ema pele ga ka fa Ngwakong wo o bitšwago ka leina la ka, le re: Re a hlakodišwa! Mola go dirwa makgapha ao ka moka. 11A fa le re Ngwako wa ka ke legolo la bahlakodi? Wona wo go bitšwago ina la ka mo go wona. Ge e le nna, le tsebe gore ke di bone. O realo Morena. 12Yang le hlole felo ga ka fale Silo, mo ina la ka kgale ke bego ke le agišitše gona, le bone tše ke di dirilego gona ka baka la bobe bja setšhaba sa ka sa Isiraele. 13Gomme bjalo ke lefetša tiro tše tša lena tšohle, -- o realo Morena, -- ka gobane ke boletše le lena, ka fela ke boela ke bolela, mme la gana go kwa, ka le bitša le se arabe. 14Bjale ngwako wo, mo ina la ka le bitšwago gona, wo le o botilego, le felo fa ke go beetšego lena le botataweno, ke tlo go dira tšona tšeo, tše ke di dirilego Silo. 15Ke tlo le raka pele ga ka bjalo ka ge ke rakile bala babolena bohle, bala ba moloko wa Efuraimi ka moka.
16Gomme wena o se ke wa rapelela setšhaba se; o se ke wa hlaba mokgoši wa tliša diphapelo ka baka la sona; o se ke wa mphegelela, gobane nna nka se ke ka ba ka go kwa. 17A ga o di bone tše ba di dirago mo metseng ya Juda le mo mekgotheng ya Jerusalema? 18Bana ba rwalela dikgong; botatabo ba gotša mollo; basadi ba duba maupi a go apeela mohumagadi wa legodimo dinkgwanyana, le a didimo tša medimo e šele, e le gore ba nthumole. 19A ke gore ba rumotše nna? O realo Morena. A ga ke re ba ithumotše, ba iteša dihlong bona beng? 20Molato ke wona woo ge Morena Mong a bohle a re: Le tsebe gore felo fa le motse wo ke tlogo thenogela bogale bjaka le sekgoro sa ka, mo go batho le dikgomo le dihlare tša naga le dienywa tša mašemo; di tlo tuka di se time.
21Morena wa mašaba Modimo wa Isiraele o re: Le ka no hlatlaganya dihlabelo tša lena le didimo tša lena, la tsebo ja dinama. 22Nna mola botataweno ke ba ntšha nageng ya Egipita, ga nka ka laela dihlabelo le didimo. 23Lefoko le ke ba laetšego lona šele: Kwang se ke se bolelago, ke mo ke tlogo ba Modimo wa lena, mme lena la ba setšhaba sa ka. Tsela ye nna ke tlogo le laela yona, le sware yona fela; ke mo le tlogo letlwa. 24Bona ba gana go kwa, ba lesa go theetša; ba ya ka maithatelo le ka lonya la dipelo tša bona tše mpe; ba boela morago, ba se tšwelele pele. 25Ge e le nna, e sa le mola ke ntšha botataweno nageng ya Egipita le nankhono, ke fedile ke le romela bahlanka ba ka bohle ba baporofeta, ke se kgaotše go ba roma. 26Bona ba gana go kwa, ba lesa go theetša ba šataletše melala, ba phala botatabo ka go senya.
27Le ge o ka bolela nabo mantšu a, ba ka se ke ba go kwa. Le ge o ka ba bitša, ga ba arabe. 28Ke gona bolela nabo o re: Sese setšhaba se se sa kwego ge Morena Modimo wa sona a bolela; se gana go laiwa; therešo e senyetše, e ba tlogile melomong. 29Kuta moriri o o lahle, o yo thuntšha sello mebotong, gobane ba moloko wo Morena o ba hladile a ba lahla ba mmefetše.
30Gobane bana ba Juda ba dirile tše di mpefetšego! Morena o realo. Ba beile medimo ya bona ya makgapha mo ngwakong o bitšwago ka leina la ka, ya ba go o tšhilafatša. 31Ba bopile mmoto wa Thofethe moeding wa Bene-Hinomi, ba fiša barwa ba bona le barwedi ba bona ka mollo. Ba dirile tše ba sa kago ba botšwa ke nna, tše di sa kago tša ba tša rotoga pelong ya ka. 32Molato ke wona woo, Morena ge a re: Go tlo tla matšatši a go se sa tlogo bolelwa tša Thofethe le moedi wa Bene-Hinomi; go tlo bolelwa moedi wa polao; Thofethe e tlo ba mabitla ka go hloka felo fa go kago bolokwa bahu. 33Ke mo ditoto tša setšhaba se e tlogo ba dijo tša manong a mo sebakeng, le tša dibata tša naga, go se na le e a di rakago. 34Mo metseng ya Juda le mo mapatlelong a Jerusalema ke tlo kgaotša mantšu a tlahalalo le mantšu a thabo, le lentšu la monyadi, le lentšu la monyalwa. Gobane naga ye e tlo ba lehanata.
