JEREMIA 51

₁Morena o re: Tsebang! Motse wa Babele, le ba agilego moo pelong ya ba ntsogetšego, ke tlo ba tsošetša dimo le lešoro. ₂Babele ke tlo go romela bafeferi. Ba tlo o fefera; ba tlo swiela naga ya ba fela; ba tlo o dika thoko tšohle mohla woo wa dikotsi. ₃Mmetši wa bora o tlo lebanya mmetši le mokgantšhakotse. Le se ke la tsebafela masogana a gona; dira tša gona le di fedišetše ruri. ₄Nageng yeo ya Bakaladea a go kaname ditoto; ba ba hlabilwego a ba rapalale mekgobeng ya gona. ₅Gobane Isiraele le Juda ga se bahlolagadi; ga ba hlalwa ke Modimo wa bona Morena wa mašaba; mola naga ya bao, e na le molato o mogolo go Yena Mokgethwa wa Isiraele. ₆Tšhabang le tšweng Babele, mang le mang a tšhabiše bophelo bjagwe, le se tlo senyegela bokgopong bja gona; gobane ke lona lebaka la tefetšo ya Morena; o go dira di go lebanego. ₇Hee Babele! O be o le senwelo sa gauta atleng sa Morena; lefase ka moka la tagwa ka sona. Ditšhaba di nwele sedila sa Babele, ya ba go hlakana hlogo. ₈Babele o tšhoga a wile, a robegile. Mo lleleng, le nyake sehlare sa ntho ya gagwe, mohlomongwe a fole. ₉Babele re mo alafile a se fole! Mo tlogeleng, re ikele bohle magaeng, gobane kotlo e mo lebanego e fihlile kua magodimong, e goma ka maru.

₁₀Morena o re namoletše kahlolong. Tlang re yo bega kua Tsione tiro tša Morena Modimo wa rena.

₁₁Lootšang mesebe! Kgokelang dikotse!

Morena o hlohleleditše magoši a Meda, o logile maano a senya motse wa Babele. Ke yona tefetšo ya Morena; o lefetša se se dirilwego Ngwakomokgethwa wa gagwe. ₁₂Tsemang sefoka merakong ya motse wa Babele, le se tseme le tiiše; le bee bahlapetši, le tlatše balaledi; gobane tše Morena a di rerilego, o a di dira.

O dira tše a boletšego tšona a era baagi ba Babele. ₁₃Hee wena moaga meetseng a mantši, wena mokgobamahumo, bjale o gomile, go ripša bohodu bja gago. ₁₄Morena wa mašaba o enne ka bophelo bjagwe, a re: Le ge ke atišitše batho bago boka tšie, ba tlo go hlabela mokgoši. ₁₅Modiralefase ka maatla a gagwe, Mothekgalegohle ka bohlale bjagwe, Moalamagodimo ka tlhaloganyo yagwe, ₁₆Mafula a legodimo o a beetše modumo; maru o a tsoša kua mafelong a lefase; o direla pula dikgadima; o ntšha ledimo mo a bego a le bolokile. ₁₇Motho mang le mang, ge a sa di hlathe, a ba lešilo. Mmetli wa medimo o hlonama swantšho sagwe e le maaka, se se ne bophelo. ₁₈Ke tša lefela dilo tšeo; di nyatšiša beng ba tšona mohla ba otlwago. ₁₉Ge e le yena wa Jakobo, ga a etše tšeo; ke yena Modiratšohle. Isiraele ke moloko wa batho ba gagwe. Ina la gagwe ke Morena wa mašaba.

₂₀O noto ya ka. O sebetša sa ka sa tlhabano. Ka wene ke pšhatla ditšhaba. Ka wene ke senya mebušo. ₂₁Ka wene ke pšhatla dipitsi, le banamedi ba tšona. Ka wene ke pšhatla koloi, le banamedi ba tšona. ₂₂Ka wene ke pšhatla banna le basadi. Ka wene ke pšhatla bagolo le bafsa. Ka wene ke pšhatla tshogana le methepa. ₂₃Ka wene ke pšhatla modiši le mohlape. Ka wene ke pšhatla molemi le dipholo tšagwe. Ka wena ke pšhatla magoši le babuši.

₂₄Bjale gona ke lefetša Babele le baagi ba la Kaladea bohle, bobe bja bona bohle, bjo le bonego ba bo dira fa Tsione. O realo Morena. ₂₅Ke nna e! Ke lwa nago, wene Thabatshenyi. O realo Morena. Wene mosenyanaga yohle, ke go emišetša tsogo la ka. Ke tlo go theola maribeng, ka go dira thaba e swilego, ₂₆Gore mo go wene go se sa tlo rwalwa swika le sekhutlo, le ge e le la motheo. O tlo ba lešope la go ya go ile. O realo Morena.

₂₇Tsemang sefoka mo nageng; le letše phalafala ditšhabeng. Laolang madira a bantle; Babele le go kgotheleng mebušo ya kua Ararate le kua Mini le kua Asekenase, le bee molaodi wa madira wa go lwa le wona; le tliše pitsi tša mobokobo, di ate boka tšie. ₂₈Rapang ditšhaba di lwe nawo, dikgoši tša Bameda, le babuši ba gona, le bakgoma ba gona, le naga ka moka ya mmušo wa bona. ₂₉Ke mo naga e go tlo tšhoga mme ya šišinyega, ge Babele go yo phethegelwa ke kgopolo ya Morena, ya gore naga ya Babele e fetoge lešope le le sa dulwego. ₃₀Bagolo ba Babele ga ba sa hlabana, ba gogetše dibong; ba feletšwe ke maatla, ba fetogile basadi; meago ya bona e swile, mapheko a robilwe. ₃₁Ba dimatlane ba kitima ba gahlana le ba gabo, motseta o gahlana le motseta; ke ba go botša kgoši ge motse wagwe o thopiwa thoko tšohle. ₃₂Ge madibogo a šwahletšwe, ge mehlaka e tšhumilwe, ge bahlabani ba nolega moko. ₃₃Gobane Morena wa mašaba Modimo wa Isiraele, o re: Ngwanenyana wa Babele o etša seboa mohla go folwago; lebaka la puno le tlo tloga le mo tlela. ₃₄Nebukadinetsara kgoši ya Babele o re lle; o re feditše wa go se šie selo mogopong; o re meditše wa mamokebe a tlala dimpa ka di bego di re natefela; rena a re raka. ₃₅Tše sehlogo tše a ntirilego tšona ge a ntlhaba, a di boele Babele! O realo moagi wa Tsione. Madi aka a a latwe go baagi ba la Kaladea! Ba realo ba Jerusalema.

₃₆Morena ke ka baka leo a rego: Ke nna e! Ke tla go namolela ka go lefeletša. Ke tla pšheša watle la bona; ke tla gopiša didiba tša bona. ₃₇Motse wa Babele o tlo ba mokgobo wa maswika, legae la phukubje, setšhošo le sekwero; go ka se dule motho. ₃₈Ge ba le mmogo, ba sa bopa boka tau; ba gahlola wa tawana. ₃₉E tlo re ge ba ekwa phišo, ke tlo ba noša senwewa sa bona ba tagwa, ba ipshina ba yo lala; ya tlo ba boroko bja go ya go ile; ba se sa tlo phafoga. O realo Morena. ₄₀Ke tlo ba iša tlhabong boka dikwanyana le diphoko le dikgapa.

₄₁Joo motse wa Sesake o thubilwe o thopilwe, wona moretwa wa lefase lohle. Joo Babele o bile setšhošo mo gare ga ditšhaba. ₄₂Babele o hlagetšwe ke lewatle, o ribegeditšwe ke boati bja mafula a lona. ₄₃Metse ya gona e bile marope, ke nagatshehla, ke lehanata; ga go dule motho; ga go ngwana motho e a kago feta ka gona. ₄₄Bele wa Babele ke tlo mo otla; mo ganong ga gagwe ke tlo ntšha tšohle tše a di meditšego; ditšhaba di se hlwe di tšhologela gona; le merako ya Babele e tlo wa. ₄₅Lena batho ba ka, tšwang moo, gore mang le mang a tšhabe le bophelo bjagwe gona moo go tlogo tuka kgalefo ya Morena, ₄₆Gore pelo tša lena di se tlo ferega, di se tlo tšhoga kgoane e tlogo kwala nageng, ge le kwa mabarebare a lenyaga, ge go tlo kwala a išago, naga ge e bušwa o šoro, babuši ge ba tsogelana. ₄₇Le tsebege gobane go tlo tla matšatši a ge ke tlo otla dipheko tša Babele naga yohle ya gona ya tlo šala dihlonyeng, babolawa ba gona bohle ba rapaletše moo. ₄₈Ke mo go tlogo hlalala legodimo le lefase, le tšohle tše di lego mo go lona, ge di bona se Babele o se dirilwego, ge ba o phušolanya ba o tletše ba etšwa leboa. O realo Morena. ₄₉Babele a a ušwe, a bušetšwe tša ge a uša babolawa ba Isiraele, tša ge babolawa ba naga tšohle ba ewa ka baka la Babele.

₅₀Lena ba phonyokgilego lerumong! Tlogang, le se ke la ema. Le se lebaleng Morena le le moo kgole. Motse wa Jerusalema a o tsoge dipelong tša lena. ₅₁Re be re le dihlonyeng, mola re ekwa dikwero, nyatšego e khurumeditše difahlogo tša rena, mola bantle ba tsene dikgethweng tša Ngwako wa Morena. ₅₂Bjale tsebang! O realo Morena. Go tlo tla matšatši, a ge ke tlo otla medimo ya Babele, mme nageng ya gona ka moka gwa tlo gokga ba ba gobetšego. ₅₃Le ge Babele a ka namelela kua legodimong, le ge a ka thekga sebo sagwe se phagamilego; ba ba phušolago ba tlo ba ba mo tlela ba romilwe ke nna. O realo Morena.

₅₄Kwang mokgoši wa Babele; ke wa mašegerepe a magolo a naga ya Bakaladea. ₅₅Morena o phušola motse wa Babele; mašata a magolo a wona, o a a kgaotša; gobane legoa la bona ba be ba le tšhela wa modumo wa mafula a magolo. ₅₆Maphušole o a tla, o tlela Babele. Bagale ba gona ba swarwa; bora bja bona bo robilwe. Ka kgonthe, Morena ke Modimo wa tefetšo, ga a lese go bušetša. ₅₇Kgoši Morena wa mašaba, yena mong a ina leo, o re: Bakgoma ba bona, le ba bohlale ba bona, le babuši ba bona, le matona a bona, le bagale ba bona, ke tlo ba noša ba tagwa; ba tle ba robale boroko bja go ya go ile ba se sa phafoga. ₅₈Morena wa mašaba o re: Merako ya Babele e metonatona e tlo thunthanyetšwa ruri; dikgoro tša gona tše phagamilego, di tlo tšhungwa ka mollo. Go bjalo: Mediro ya ditšhaba ke ya lefela; merafo e itapišetša mollo.

₅₉Le ke lentšu le moporofeta Jeremia a le laetšego Seraya morwa wa Maaseya, la mola a eya Babele a na le Tsedekia kgoši ya Juda ka ngwaga wa bone wa mmušo wa gagwe. Seraya e be e le molaki wa dintlo tša mošate. ₆₀Tša mabošula ohle a go tlo tlela Babele, Jeremia o di ngwadile pukung e tee, ya mantšu ao ka moka a a bego a ngwadilwe a era Babele. ₆₁Jeremia a bolela le Seraya a re: E tlo re ge o fihlile Babele, o bone gore o bale ditaba tše ka moka. ₆₂E be gona o tlogo re: Morena! Ke wene o boletšego motse wo, wa re o tlo o senya, go se hlwe go eba le moagi, le ge e le motho goba kgomo; mme e tlo ba lešope la go ya go ile. ₆₃E re ge o feditše go bala puku ye, o e tlemelele leswika, o e lahlele nokeng ya Forate, ₆₄o bolele o re: Le motse wa Babele o tlo nwela ka mokgwa o bjalo, o se sa tlo tsoga bošuleng bjo nna ke bo tlišago bja o wela. O ka se ke wa tsoga, le ge ba itapišitše.

Ditaba tša Jeremia di goma fa.