JEREMIA 49

₁Leela Amoni.

Morena o re: A Isiraele ga a sa na bana? A goba ga a sa na mojabohwa? -- Ke go reng ge Malikomo a eja bohwa bja ba gaGada, metseng ya bona gwa dula setšhaba sa Malikomo? ₂Molato ke wona woo, ge Morena a re: Tsebang, go tlo tla matšatši a ke tlogo kweša motse wa Raba wa Baamoni mokgoši wa ntwa, wa tlo ba dithotobolo tša marope. Le dinakana tša wona di tlo tšhungwa. Ke mo Isiraele a tlogo ja bohwa bja ba llego bja gagwe. O realo Morena. ₃Hee Hesiboni! Golola, gobane Ai go thubilwe. Llang, lena banana ba Raba! Le apare mankgeretla, le dikologe le merako le tšama le lla; gobane Malikomo o išwa bothopša, le bomphamodimo bagwe, le bakgoma bagwe. ₄O reng o kgantšha mehlaka ya gago ya dinokana, wene ngwanana wa senganga, wa bota matlotlo, mme wa re: Nka hulwa ke mang? ₅Tseba ge, ke tlo go tlišetša dipoifo, tše di tlogo go dika. O realo Mong a bohle Morena wa mašaba. Ke tlo le tšitlanya wa go se sa peka; gwa hlokwa wa go botha batšitlani.

₆Fela, go tlo tla lebaka le ke tlogo buša mathopša a Baamoni. O realo Morena.

₇Leela Edomo. Morena wa mašaba o re: A kua Themana ga go sa ne bohlale? A maano a tlogile bomatsebe? A ba boletšwe ke bohlale? ₈Tšhabang, baagi ba Dedane! Le lebiše difahlogo go yo khuta dikoting; gobane Esau ke mo tlela le dikotsi ka lebaka la ge a tlo otlwa ke nna. ₉Ge bafudi ba morara ba etla go wene, a ga ba šadiše matopana? Mahodu ge a tla bošego, a ga a thube go a lekanego fela? ₁₀Ge e le nna, ge ke fenyeka Esau, ke mo ntšha mo a utamago, a se sa kgona go boba. Bana ba gagwe, le ba gabo le baagišani, ga ba sa le gona. ₁₁Tlogela dišuana tšago; di tlo phedišwa ke nna, le bahlologadi bago a ba bote nna.

₁₂Gobane Morena o re: Hleng mpholo o nošwa le ba ba sa o swanelago; a o re wene o ka hlokosolwa? O ka se tšwe o sa otliwa, o sešo wa nwa. ₁₃Gobane ke enne ka nna mong, o realo Morena, ka re Botsara go tlo ba setšhošo, le segoboga, le lešope, le leroga; le metse ya gona ka moka e tlo ba marope go ya go ile.

₁₄Ke kwele kgowane e etšwa go Morena; motseta o rometšwe go bantle, o re: Rapang, re šwahlele Edomo, re go tšwele dira! ₁₅Tseba gore ke go dira e monyane gare ga ditšhaba, monyatšegi gara batho. ₁₆O iphora ka go re: Ke a šiiša! Ka go ipota ga pelo ya gago o dutše magageng a mariba, o gomaretše dintlha tša dithaba. Le ge o agile sehlaga makalakaleng wa lenong, ke tlo go fološa gona moo. O realo Morena.

₁₇Gomme Edomo e tlo ba lešope; bohle ba ba ba tlogo feta ka gona, ba tlo tlabja, mme ba tšhoga ka ge a otlilwe gakaakaa. ₁₈Bjalo ka Sodoma le Gomora ge go ribegetšwa, le dinakana tša gona. Le gona mo Edomo go ka se hlwe go dula motho; go ka se be le ngwana motho wa go tlo diilela gona.

₁₉Tsebang, o rotoga boka tau ye e tšwago lesoding la Jorodane, ge a šwahlela metse ye e tiilego. Ba tlo tšhoga ke ba lelekile, ke ba beetše mohlaolwa a ba buša. Gobane ke mang e a etšago nna? Ke sekišwa ke mang? Modiši ke ofe a kago lwa le nna? ₂₀Kwang gee, morero wa Morena a era Edomo, le kgopolo yagwe a era Themane. Ruri, ba tlo gogwa wa kwanyana tše nyenyane, meraka ya bona ya šala e tšhogile tše ba di dirwago. ₂₁Naga e tlo šišinyega ka modumo wa go wa ga bona; kgoa ya mokgoši e tlo kwewa kua Lehlakawatle. ₂₂Soolee, o fofa boka nong. O a kgouloga; diphego tša gagwe di akaletše Botsara. Dipelo tša bagale ba Edomo mohla woo di tlo etša pelo ya mosadi pelegong.

₂₃Leela Damaseko. Hamathi le Arapadi ba wetše hlonyeng. Ba kwele kgoane e mpe, mme ba gakanega. Go tlaletšwa boka lewatleng, le le sa kgonego go homola. ₂₄Damaseko go nolegile moko, ke ga motšhabo, ga dithoromelo, go šonopega ga mosadi pelegong. ₂₅Joo, motse wo ba bego ba o reta o faletše, lona legae la lethabo la ka! ₂₆Morena wa mašaba o re: Ruri mohla woo masogana a gona a tlo rapalatšwa mekgobeng; banna ka moka ba bahlabani ba tlo fedišwa. ₂₇Merakong ya Damaseko ke tlo tšhuma mollo o tlogo fiša nywako ya mošate wa Beni Hadada.

₂₈Leela Kedara le mebušo ya Hatsora ya go fenywa ke Nebukadinetsara kgoši ya Babele. Morena o re: Tsogang, le tšwele Kedara dira, le yo thula ba bohlabela. ₂₉Ba tlo thopa mekutwana le mehlape ya bona; ba tlo rebola mašela le thoto ya bona ka moka; ba tlo goelelwa ba thwe: Le dikilwe ke tše šiišago!

₃₀Tšhabang le tiišeng lebelo, le yo utama dikoting, lena ba Hatsora! O realo Morena. Gobane Nebukadinetsara kgoši ya Babele o le reretše morero, o le logetše maano. ₃₁Tsogang le yo thuba setšhaba se ituletšego ka molao, o realo Morena, se se se nago magoro le dipheko, se agile se le nnoši.

₃₂Dikamela tša bona, le mehlape e mentši yabo, a e thopše, bona bao bomaphulatlopo ke ba tšitlanyetše thoko tšohle; ke tlo tliša kotsi ya ba wela wa go dika. O realo Morena. ₃₃Hatsoro go tlo ba segola sa phukubje, lešope la go ya go ile. Go ka se hlwe go aga motho gona; go ka se hlwe go diilela ngwana motho.

₃₄Leela Elama la go tlela moporofeta Jeremia ke la mola Tsedekia kgoši ya Juda a thoma go buša; šele: ₃₅Morena wa mašaba o re: Tsebang, bora bja Elama nna ke tlo bo roba; wona modu wa maatla a bona. ₃₆Elama ke tlo mo tsošetša timo tše nne, tše di tšwago mo leratadima le gomago; ke tlo ba tšitlanyetša thoko tše nne tšeo; mme go ka se hlwe go eba le setšhaba se hlokago bafaladi ba Elama. ₃₇Ba Elama ke ba nola moko ge go fihla manaba a bona, ge go fihla ba ba ratago go ba bolaya. Ke tlo ba tlišetša kotsi, bogale bja sehutla sa ka; o realo Morena; ka roma lerumo la tlo ba hwarihla, ba tlo ba ba fela.

₃₈Kua Elama ke tlo bea dulo sa ka sa bogoši, ka fediša kgoši le bakgoma ba gona. O realo Morena. ₃₉Ge e le mehleng e tlago, mathopša a Elama ke tlo a gomiša. O realo Morena.