Jeremia o ngwalela mathopša a kua Babele
1Šedi ditaba tša lengwalo le moporofeta Jeremia, a le motseng wa Jerusalema, a kilego a le romela ba bagolo ba mašalela a ba ba išitšwego bothopša, le go baperisita le go baporofeta, le go setšhaba ka moka se Nebukadinetsara a se hlaotšego Jerusalema a se iša bothopša. 2Ke mola kgoši Jekonya le mohumagadi le dikala le bakgoma ba Juda le Jerusalema ba šetše ba khudušitšwe Jerusalema, le babetli le barudi. 3Lengwalo le o le rometše ka Eleasa morwa wa Safani, le Gemaria morwa wa Hilkia, bao kgoši Tsedekia a bego a ba romela Babele go Nebukadinetsara kgoši ya Babele. Lengwalo leo la re:
4Morena wa mašaba Modimo wa Isiraele o botša ba ba thopilwego Jerusalema ba išwa Babele, o re: 5Agang nywako le dule; lemang mašemo le je dienywa tša ona. 6Tšeang basadi le tswale barwa le barwedi; barwa ba lena le ba tšeiše basadi; barwedi ba lena ba tšewe ke banna; ba tswale barwa le barwedi, gore le ate le le moo, le se notlege. 7Motse woo ke le išitšego go wona, le o nyakele tetlego, le o rapelele go Morena; gobane le lena le tlo letlega go letlegeng ga wona. 8Gobane Morena wa mašaba Modimo wa Isiraele, o re: Le se forwe ke baporofeta ba le nago le bona, le didupe tša lena; le se ke la ya ka diloro tše ba di lorago. 9Gobane ba a le fora, ge ba le porofetela ka leina la ka; ga ba rongwa ke nna. O realo Morena.
10Se Morena a se bolelago sese: Ka kgonthe, ge go šetše go fetile nywaga e masome a šupago le le moo Babele, ke mo ke tlogo le hlola, ka tsebo phetha mantšu a ke le boletšego ka ona, a botho, ka tlo le bušetša felo fa. 11Gobane megopolo ye ke le gopolago ka yona, ke a e tseba. O realo Morena. Ke megopolo ya molao, ga se ya bošula; ke ya gore ke le nee tše di tlago, tše le di holofetšego. 12Le tlo mpitša, la ya la nthapela, mme nna ka le kwa. 13Le tlo nnyaka, la nkhwetša; gobane le tlo ba le nnyaka ka dipelo tša lena ka moka. 14Mme nna nka se gane go hwetšwa ke lena. O realo Morena. Ke tlo le ntšha bothopša. Ke tlo le phutha ka le ntšha ditšhabeng ka moka le gohle mo ke le leleketšego gona. O realo Morena. Ke tlo le bušetša felo fa, mo ke le lesitšego la thopša gona.
15Ge le ka re: Morena o re beetše baporofeta mono Babele, 16Gona le tsebe ge go na le tše a di boletšego a era kgoši ye e dutšego sedulong sa Dafida le batho ka moka ba ba dutšego motseng wo, e lego bana ba bolena ba ba sa kago ba ya bothopya le lena. 17Morena wa mašaba o boletše a re: Tsebang, ke tlo ba romela lerumo le tlala le dinkhu; ke tlo ba sema mago a befilego, a a sa jegego ka go befa ga ona. 18Ke tlo ba hlomara ka lerumo le ka tlala le ka dinkhu; ke tlo ba dira setšhošetši mo go mebušo yohle ya lefase; ina la bona e tlo ba leroga; e tlo ba ba go tšhogwa, le go kwerwa, le go rogwa mo ditšhabeng tše ke tlogo ba ke ba raketše go tšona. 19E tlo ba go lefetša ge ba ganne go kwa lentšu la ka; o realo Morena, mola ke le rometše go bona gantši ka batseta ba ka ba baporofeta; ba tla go bona; mme ba gana go kwa lentšu laka. O realo Morena. 20Bjalo lena mathopša ka moka, ba ke le ntšhitšego fa Jerusalema ka le iša Babele, kwang tše Morena a di bolelago.
21Morena wa mašaba Modimo wa Isiraele o boletše a era Ahaba morwa wa Kolaya, le Tsedekia morwa wa Maasea, bona bao ba go le porofetela maaka leineng la ka, a re: Tsebang gore ke tlo ba gafela seatleng sa Nebukadinetsara kgoši ya Babele, yena o tlo ba bolaya le lebeletše. 22Mme go mathopša ohle a Juda a a lego moo Babele go tlo tsoga leroga ka bona, ge go thwe: Morena a go dire tše a dirilego Tsedekia le Ahaba, bao kgoši ya Babele e ba bešitšego ka mollo. 23E tlo ba go lefetša tša bošilo tše ba di dirilego mo go Isiraele, ge ba dira bootswa le basadi ba gabobona, mme ba bolela taba tša maaka ka leina la ka, ba sa laelwa ke nna. Nna ke a di tseba; ke hlatse ya tšona. O realo Morena.
24Ge e le Semaya wa Nehelame o mmotše o re: 25Morena wa mašaba Modimo wa Isiraele o re: Ke lefetša tše o di dirilego ge o rometše batho ka moka ba Jerusalema mangwalo ka leina la gago, le go Tsefanya morwa wa Maaseya moperisita wa re: 26Morena o go beile moperisita bakeng sa moperisita Joyada, gore Ngwako wa Morena o be le balaki, ba go lebelela mang le mang e a kago gafa mme a iporofetela, gore e mobjalo o mo tleme o mo iše kgolegong. 27O reng o sa ka wa kgala Jeremia wa Anathothe e a itirago moporofeta moo go lena? 28O dirwa ke tšona ge a re rometše lengwalo mono Babele a re: Agang nywako le dule! Lemang mašemo le je dienywa tša ona. 29Bjale moperisita Tsefanya ge a baletše Jeremia lengwalo leo, 30lentšu la Morena la tlela Jeremia la re: 31Romela ba ba lego kua bothopša bohle lengwalo la go re: Morena o bolela Semaya wa Nehelame, o re: Ke lefetša tše Semaya a di dirilego ge a porofeta a sa rongwa ke nna, a le ruta go holofela maaka. 32Molato ke wona woo ge Morena a re: Tsebang! Semaya wa Nehelame ke tlo mo otla le bana ba gagwe. A ka se be le setlogolo se se tlogo dula mo setšhabeng se. Tše botse tše ke tlogo di direla batho ba ka, a ka se ke a di bona, ka gobane a boletše la go hlanogela Morena. O realo Morena.
