JEREMIA 13

₁Morena o mpoditše a re: Sepela o yo reka mohlantšhu wa leokodi, o itleme letheka; o se ke wa o ina meetseng. ₂Ka ya ka dira tše Morena, a di boletšego ka reka mohlantšhu, ka itlema letheka. ₃Ke ge lentšu la Morena le ntlela la bobedi, la re: ₄Tšea mohlantšhu woo o o rekilego, o lego lethekeng la gago, o nanoge o ye Forate; gona kua o o ute mo mphatšeng wa leswika. ₅Ke moka ka ya ka o uta gona kua Forate ka mo Morena a ntaetšego ka gona.

₆Ya re ge go fetile matšatši a mantši Morena a bolela le nna a re: Nanoga o ye kua Forate, o yo tšea mohlantšhu wola, wo ke go laetšego ka re o o ute gona. ₇Ka ya gona kua Forate, ka fata, ka ntšha mohlantšhu wola ke o utilego; mme ka hwetša o bodile, e sa hlwe e le wa selo.

₈Ke ge lentšu la Morena le ntlela la re: ₉Morena o re: Ke wona mokgwa o tlogo fediša boikgogomošo bja Juda, le boikgogomošo bja Jerusalema bjo bo godilego gakaakaa. ₁₀Setšhaba se sebe se, se se ganago go kwa lentšu la ka, sa ya le bonganga bja pelo ya sona, sa latela medimo e šele, sa hlankela yona sa e khunamela se tlo etša mohlantšhu woo e sa hlwego e le wa selo. ₁₁Gobane ke be ke re moloko wohle wa Isiraele le moloko wa Juda o tlo nkgomarela bjalo ka mohlantšhu ge o gomarela letheka la monna. O realo Morena. Ke be ke re e tlo ba setšhaba sa ka, le leina la ka la go retwa, le botšhepi bjaka. Mme bona ba gana go kwa.

₁₂Ba botše lentšu le, o re Morena Modimo wa Isiraele o re: Dipitša ka moka di tlo tšhelwa sebela tša tlala! Gona ba tlo re: A o re ga re tsebe ge dipitša tšohle e le tša go tšhelwa sebela di tlale? ₁₃Ke mo o tlogo fetola wa re: Morena o re: Tsebang gore bohle ba ba agilego nageng ye, le dikgoši tše di dutšego sedulong sa Dafida, le baperisita le baporofeta, le bohle ba ba agilego fa Jerusalema, ke tlo ba tšhelela ba tlala ba buiwa. ₁₄Ke tlo ba thulanya, monna a thulana le wa gabo; ke tlo thulanya botatago bana le bana. O realo Morena. Nka se ke ka ba namola, nka se ke ka ba setša, nka se ke ka gaogela motho; nka se lese go ba fediša.

₁₅Kwang, le theetšeng; le se ke la ikgodiša, gobane go bolela Morena. ₁₆Lobang Morena Modimo wa lena e sa le bjale, leswiswi le sešo la swara, dinao tsa lena di sešo tša kgopša dithabeng, leswiswing, le hlologetšwe seetša, se le fetogetše thiti ya lehu, leru la leswiswi. ₁₇Fela, ge le sa kwe, pelo ya ka e tlo itelela e utame, ka baka la boikgodišo; mme mahlo a ka a tlo šiphola megokgo, a tlo ela megokgo, ge mohlape wa Morena o thopiwa.

₁₈Botša kgoši le mohumagadi o re: Ikokobetšeng le dule fase, gobane mefapahlogo ya lena e wile hlogong. ₁₉Metse ya thoko ya borwa e tswaletšwe, ga go e a e bulago, Bajuda ba thopilwe ka moka ga bona, ba thopetšwe ruri.

₂₀Lebelela, o bone ba ba tlago go wene ba etšwa leboa. O kae mohlape wo o bego o gafetšwe wene, wa dinku tšela tše dibotse? ₂₁O tlo reng ge a tlo tšea baratwa bago bala o ba lemaditšego, a ba bea ba go buša? A o ka se šonopege bjalo ka mmelegi? ₂₂Ge o tlo eletša wa re: Dilo tše di reng di ntlela? Gona o tsebe gore ge o amogilwe diaparo, ge nao tšago di ekwa bohloko, molato ke dibe tšago tše dikgolo. ₂₃A Mokushe a ka fetola mmala wa gagwe? A nkwe e ka tlogelana le mebalabala ya yona? Ge di ka kgonega, gona le lena ba le tlwaetšego bošaedi, le ka be le kgona go dira tše botse. ₂₄Ke ka baka leo ke ba gogolago boka mooko, ge o tšewa ke ledimo la lešoka. ₂₅Ke tšona di tlogo wela wena, tše nna ke tlogo go elela. O realo Morena. Ke ka gobane o ntebetše, o botile maaka. ₂₆Ke tlo ba ka go tšola le ditšwaro, ka go apeša sefahlogo ka tšona, wa bonwa dihlong tša gago, ₂₇Tša bootswa bja gago, tša dikganyogo tšago, tša bohlola bjago bja bootswa. Makgapha a gago ke a bone mebotong le mo mašemong. Joo Jerusalema! O ka se be wa hlapa. Di tlo feletša kae?