JEREMIA 11

₁Lentšu le le tletšego Jeremia le etšwa go Morena, šele: ₂Kwang mantšu a kgwerano yela, le a botše banna ba Juda le baagi ba Jerusalema. ₃Ba botše o re: Morena Modimo wa Isiraele o itše: Motho e a sa kwego mantšu a kgwerano ye, o tlo lahlwa. ₄Ke ona a ke a laetšego botataweno mola ke ba ntšhitše nageng ya Egipita, leubeng la tshipi, ka re: Kwang lentšu la ka, le dire tšohle tše ke le laelago tšona. Ke mo le tlogo ba setšhaba sa ka; mme nna ka kgona ke eba Modimo wa lena, ₅gore ke tiiše keno ye ke e enetšego botataweno, ke le nee naga e elago maswi le dinose, ka mokgwa wo wa lehono.

Nna ka re: Go bjalo, Morena.

₆Morena a re: Goelela mantšu a ka moka mo metseng ya Juda le mo mekgobeng ya motse wa Jerusalema, o re: Kwang mantšu a kgwerano yeo, le dire ka ona. ₇Gobane botataweno e sa le mola ke ba ntšha nageng ya Egipita le nankhono ke fela ke ba kgothatša ka mehla ke re: Kwang lentšu la ka! ₈Fela ga ba ka ba kwa, ga ba ka ba theetša; ba ile le bonganga bja dipelo tše mpe tša bona; nna ka ba ka ba tlišetša tše ke di boletšego mola ke gwerana le botataweno, ka gobane ke laetše, mme bona ba se dire.

₉Morena o mpoditše a re: Mo go banna ba Juda, le go baagi ba Jerusalema go hwetšwa go na le molaka o mobe. ₁₀Ba boetše masenying a botatabo ba kgale, ba ba bego ba gana go kwa mantšu a ka, ba latela medimo e šele ba hlankela yona. Ba moloko wa Isiraeli le wa Juda ba sentše kgwerano ye ke e dirilego le botatabo. ₁₁Bjale Morena o re: Tsebang, ke ba tlišetša bošula, bjo ba ka se kego ba kgona go tšwa mo go bjona. Ba tlo mpitša, mme nna nka se ke ka kwa. ₁₂Metse ya Juda, le baagi ba Jerusalema, ba tlo ya ba goeletša medimo ya bona ye ba bego ba e thuntšhetša diorelo; mme yona e ka se ke ya ba namolela mehleng yeo ba le bošuleng. ₁₃Gobane wene Juda, medimo ya gago e atile boka metse ya gago; le dialetare tša dihlong, tša go thuntšhetša Baali diorelo, di atile bjalo ka mekgolokgotha ya Jerusalema. ₁₄Bjale wene, o se ke wa rapelela tšhaba se, o se ke wa hlaboša legoa le thapelo ka baka la bona; gobane nka se ke ka kwa ge ba mpitša ba le bošuleng.

₁₅Moratwa wa ka ntlong ya ka o sa dira eng mola e le mmatadikganyogo? A o re: Bobe bjago bo go tloga ka bontši le ka namakgethwa wa tlo ba wa hlalala? ₁₆Morena o be a go reile leina la Mohlware motalana, Monkgahlakagotagakenyo. Bjalo o o goleditše mollo ka mokgoši o mogolo, mme dithabe tša wona di a robega.

₁₇Gobane Morena wa mašaba, yena e a go šemilego, o go reretše bošula; molato e le dibe tša moloko wa Isiraele le wa Juda, ge ba nthumola ka go thuntšha diorelo tša Baali.

₁₈Morena, o ntsebetše ka di tseba; ke mola o ntšhupetša tiro tša bona. ₁₉Mme nna ka etša kwanyana ye e thapilego e išwago go hlabja, ke sa tsebe ge ba ntakane ba re: A re se senyeng sehlare se le dienywa tša sona; a re se tlošeng mo nageng ya ba phelago; leina la sona a le se hlwe le tsebja.

₂₀Morena wa mašaba, moahlodi wa go se hlaole motho, mofenyi kat swalo le dipelo, a nke ke bone ge o lefetša bona bao; gobane taba ya ka ke e gafetše wene.

₂₁Bjale Morena o bolela bona banna ba Anathothe, ba ba ratago go mpolaya ba re: Se porofete ka leina la Morena, o se tlo hwa ka diatla tša rena. ₂₂Morena wa mašaba o re: Tseba, ke nna ke tlogo ba lefetša. Masogana a tlo hwa ka tšhoša, barwa ba bona le barwedi ba bona ba tlo hwa ka tlala. ₂₃Go tlo hlokwa le mašalela a bona, gobane banna ba ba Anathothe ke tlo ba tlišetša bošula ka ngwaga wa go tlo ba lefetša.