JESAYA 6

₁Ka ngwaga wo kgoši Usia a hwilego ka wona, ka na ka bona Morena a dutše sedulong se se rotobetšego, se phagamilego, morumo wa seaparo sa gagwe wa tlala Ntlokgethwa. ₂Barongwabatuki ba be ba eme ka tletlolo ga gagwe, bao ka o tee ba bego ba na le diphego tše di selelago; ka tše pedi ba ipipa difahlogo, ka tše pedi ba ikapeša maoto, ka tše pedi ba fofa. ₃Ba goeletšana ba re: Mokgethwa, Mokgethwa, Mokgethwa, ke Morena wa mašaba. Naga tšohle di tletše letago la gagwe!

₄Ka lentšu la bona, ge ba goeletša, gwa šišinyega direpodi tša mejako, Ntlo ya tlala muši.

₅Nna ka re: Joo nna! Ke a felela, ka ge ke le motho wa melomo ya ditšhila, ke dutše le setšhaba sa melomo ya ditšhila, gomme mahlo a ka a bone Kgoši Morena wa mašaba!

₆Ke ge e mongwe wa Barongwabatuki a fofela go nna, a swere legala la mollo ka seatla, a le tšere ka letlao aletareng. ₇A kgwathiša molomo wa ka ka lona, a re: Bjale ge le kgwathišitše melomo ya gago, molato wa gago o tlogile, le dibe tša gago di lebaletšwe!

₈Ka kwa lentšu la yena mong a bohle le re: Ke tlo roma mang? Ke mang a tlogo re ela?

Nna ka re: Ke nna e nthome!

₉Yena a re: Sepela, o bolele le setšhaba se, o re: Go kwa le tlo kwa, mme le ka se hlaologanye; go bona le tlo bona gomme le ka se lemoge. ₁₀Retetša pelo tša setšhaba se, tsebe tša bona di thibane; o se foufatše mahlo, gore ba se hlwe ba bona ka mahlo, gore ba se hlwe ba bona ka mahlo a bona, mme ba se hlwe ba ekwa ka tsebe tša bona, ba se ke ba hlaloganya ka pelo tša bona, gore ba se ke ba sokologa ba fodišwa.

₁₁Mme nna ka re: Mongaka, go tlo feletša kae?

Yena a re: Di tlo feletša ge metse e thubilwe, e se sa na moagi, ge nywako e se sa na motho, ge naga e senyetše e le ya marope. ₁₂Di tlo fela, ge batho ba Morena a ba khudušitše, ge go atile matlawa mo gare ga naga. ₁₃Gomme ge go ka šala o tee go ba lesome, le yena o tlo lewa. Go tlo etša, mola morula le morulana ge e remilwe, mme gwa šala thito. Yona thito yeo e tlo ba peu e kgethwa.