1Hee lena ka moka, ba le nyorilwego, tlang meetseng! Ba le se nago sa go reka ka sona, tlang le reke le je! Tlang le reke morara le maswi go se tšhelete, go se sa go reka ka sona. 2Tše e sego bogobe le reng le di ntšhetša tšhelete? Le reng le ntšha tše le itapišeditšego tšona, la reka se sa horišego! Kwang se nna ke se bolelago, ke mo le tlogo ja tše bose, la ipshina ka mahura. 3Sekegang ditsebe le tle go nna, le kwe, gore meoya ya lena e phele, gore ke dire kgwerano le lena, kgwerano ye e sa felego ya maboleta a makgonthe a Dafida. 4Le tsebe, ke beile yena, gore e be hlatse ya ditšhaba, e be yena ketapele le molai wa ditšhaba. 5Ke yena a tlogo bitša setšhaba o sa se tsebego; mme tšhaba se sa go se tsebege, se tlo tla go wena ka baka la Mokgethwa wa Isiraele, ka ge a go tagišitše. 6Nyakang Morena e sa le lebaka la go ka mmona, le mmitšeng a sa le kgauswi. 7E mobe a a lahle tsela yagwe; motho yo kgopo a lahle dikelelo tšagwe, a boele go Morena, a mo gaugele; a boele go Modimo wa rena, gobane ke wa tebalelo e ntši. 8Gobane tša ka dikelelo ga se kelelo tša lena; mme tša lena ditsela ga se ditsela tša ka! O realo Morena. 9Boka magodimo a le kua godimo kgole le lefase, le ditsela tša ka di godimo kgole le ditsela tša lena; le kelelo tša ka di godimo kgole le tša lena. 10Boka pula le leswela di etšwa legodimong, mme di se hlwe di boela gona, ya ba tša go nošetša lefase gore le hlogiše dibjalo, di mele, di fe mobjadi peu, le moji bogobe, -- 11le lentšu la ka le le tšwago molomong wa ka, le ka se boele go nna le le fela; le tlo dira se nkgahlago, le tlo phetha se ke le rometšego sona. 12Ka kgonthe, le tlo wela tsela le thabile, la iketla le etetšwa, dithaba le meboto ge le fihla di le hlalalela ka mekgolokwane, magoswi a opša ke mere ka moka ya naga. 13Bakeng sa meetlwa go tlo mela hlare tša megobogobo, le mehlakolane bakeng sa ditshehlo.
