JESAYA 52

₁Phafoga, hee Tsione! Phafoga, o apare maatla a gago. Hee Jerusalema motsemokgethwa, apara diaparo tšago tša botšhepi; gobane mo go wena go ka se hlwe go tsena wa lethoko le wa tšhila. ₂Jerusalema, itlhohlore lerole o tsoge o dule. Itlemolle ditlemo tša mo molaleng wa gago, wena motlengwa ngwanana wa Tsione!

₃Gobane Morena o re: Ga la rekišwa ka theko; ge le tlo lokollwa, e ka se be go rekwa. ₄Gobane Morena Mong wa bohle o re: Kgale setšhaba sa ka se kile sa falalela Egipita, sa diilela gona; le Baasuri ba se tshwenya ka lefela. ₅Mme nna bjale ke tlo reng? O realo Morena. Ke fo amogwa batho ba ka, mme bakgapeletši ba bona ba nape ba itheta. O realo Morena. Ina la ka la hlwa le gobošwa ka mehla! ₆Bjale batho ba ka ba tlo tseba ina la ka; ke gona ka mohla woo ba tlogo tseba ge e le nna ke rego: Ke nna e! ₇A ratega bjang maoto a motseta wa ditaba tse dibotse dithabeng, segoeledi sa phološo se se botšago Tsione sa re: Modimo wa gago o tšere bogoši! ₈Kwaa! -- Bahlapetši bago ba hlaboša lentšu bohle ba hlaletše, gobane ba bona ka mahlo -- ka mahlo -- ge Morena a goroša ba Tsione. ₉Hlagišang mekgolokwane, le hlalale bohle, lena marope a Jerusalema; gobane Morena o homotša setšhaba sa gagwe; o lokolla ba Jerusalema. ₁₀Morena o ntšhitše letsogo le lekgethwa la gagwe; bantle bohle ba a di bona; magomo ohle a lefase a bona phološo ya Modimo wa rena. ₁₁Tlogang! Tlogang! Tšwang moo! Le se sware tšhila! Le tšwe mo go bao! Hlapang lena barwadi ba dibjana tša Morena. ₁₂Gobane ga le wele tsela ka lehwidihwidi, ga le e sepele wa motšhabo; gobane le etilwe pele ke Morena; le wa go le šala nthago ke yena Modimo wa Isiraele.

₁₃Mohlanka wa ka šoo, o tlo letlega a phagama a godišwa, a ba e mogologolo. ₁₄Boka mola go tšhoga ba bantši ge ba bona fahlogo sa gago se senyegile, se se sa etša sa motho, o se sa swana le ngwana wa motho. ₁₅Bjale o tlo tlaba tšhaba tše dintši, le dikgoši di tlo itshwara melomo, ge ba bona tše ba sešogo ba di botšwa, ge ba lemoga tše ba sešogo ba di kwa.