JESAYA 50

₁Morena o re: Le kae lengwalo la tlhalo ya mma weno, le ke mo hladilego ka lona? Ke mang wa go mpeela molato, ka lefa ka go ntšha bolena? Aowaa, le rekišitšwe ka molato wa lena; mma weno o hladilwe ka baka la karogo tša lena. ₂Ke ka baka lang ke sa ka ka hwetša motho ke etla? Ka bitša, gwa hlokwa e a arabago? A letsogo la ka le hlaetše ka šitwa go phološa? Hleng ke pšheša lewatle ge ke kgalema, dinoka ke di dira naga ye e omilego, le dihlapi tša tšona di nkge ka go hloka meetse, di hwile ka lenyora. ₃Ke nna ke apešago magodimo boso, ka a rulela ka mankgeretla. ₄Morena Mongaka o mphile leleme la ba rutegilego, gore ke tsebe go thekga molapi ka go bolela nae. Ka mehla o ntsoša e sa le ka moswana, o mphafoša tsebe gore ke theetše bjalo ka morutiwa. ₅Morena Mongaka o nthibolotše tsebe; nna ke se gane, ke se boele morago. ₆Mokokotlo wa ka ke o neetše baotli: dithama tša ka ke di neetše ba go ntlhotha maledu, sefahlogo sa ka ga ka se šegela mahlapa le mare. ₇Morena Mongwaka a nthuša, ke se šegamišwe, ka thatafatša sefahlogo sa ka boka lentswetshipi, ka tseba gobane nka se lewe ke dihlong. ₈Monkahloledi o kgauswi; ke sa tlo sekišwa ke mang? A re yo gahlana; mompegi ke mang? A a batamele fa. ₉So Morena Mong wa ka, o ema le nna; ke mang a kago ntahla? Tsebang gobane ka moka ga bona ba tlo onala boka kobo, ba tlo lewa ke tshwele. ₁₀Mo go lena e a šiago Morena, a kwe lentšu la mohlanka wagwe. E a sepelago maswiswing a sa bone seetšanyana, a holofele ina la Morena, a ithekge ka Modimo wa gagwe. ₁₁Ka kgonthe, lena bafehlamollo ka moka, baithlamakadirumula, yang le tsene dikgabong tša mollo wa lena le tša dirumula tše le di gotetšago. Di le tlela ka seatla sa ka; le tlo rapalala mahlokong.