JESAYA 47

₁Fologa, o dule leroleng, wena morwedi wa Babele. Dula fase mo go sego sedulo sa bogoši, wena ngwanana wa Bakaladea. O ka se hlwe o bitšwa yo senatla le yo tsoro. ₂Tšea tšhilo ya go šila bupi. Apola lešira la gago, o gare diaparo mehlahu e be fela, o sele dinoka. ₃Tšola o bonwe dihlong. Ke a lefetša, ga ke gaugele motho. ₄Monamoledi wa rena ke Morena wa mašaba; ina la gagwe ke Mokgethwa wa Isiraele.

₅Dula fase o ikhomolele, o tsene leswiswing, wena ngwanana wa Bakaladea. O ka se hlwe o bitšwa mohumagadi wa mebušo. ₆Mola ke befetšwe ke setšhaba sa ka, ke nyatšišitše naga ya ka, ka e gafela diatleng tša gago; mme wena wa se gaugele motho, le bakgalabje wa ba rweša joko yago e robago. ₇O be o re: Ke tlo dula e le nna mohumagadi go ya go ile, wa se eletše tše o di dirago, le mo di tlogo iša gona. ₈Bjale theetša, wena modulaserena o itebetše, o rego pelong ya gago: Ke nna e; ga go sa ne yo mongwe; nka se be mohlologadi; nka se hloke bana. ₉Tše pedi tšeo o tlo tšhoga di go tletše ka tšatši le tee, wa hloka bana, wa ba mohlologadi. Di tlo go tlela ka botlalo, le ge boloi bjago e le bjo bontši, le ge go godile boupi bja gago. ₁₀Gobane o botile bohlola bja gago, o re: Ga go e a mponago. Bohlale bja gago le tsebo ya gago ke tšona di go timetšago, ge mo pelong ya gago o re: Ke nna e; ga go ne yo mongwe. ₁₁Bjale o tlo ribegetšwa ke bošula bo sa phemegego ka boloi; o tlo welwa ke dikotsi di sa šegelwego. O tlo tšhoga tšhwalalanyo e go tleše o sa tsebe. ₁₂Napo iše pele ka boupi bja gago, le ka boati bja boloi bjago bjo o bo dirišago e sa le mola o le ngwana; mohlomong o tlo kgaya wa kgona, mohlomong o tlo ralela. ₁₃O itapišitše ka go loga maano a mantši. A ba eme ge, ba go namolele bona bao batsinkelamagodimo, baboni ba dinaledi bao e rego e sa balama ba bolela di tlogo go tlela. ₁₄Sebala, ba etša mahlaka a swago, ba šitwa go phonyokga kgabo. Ga e sa hlwe e le magala a go orwa, ga se mollo wa go ka dulelwa. ₁₅Ke tše di tlogo diregela wena le ba go dirišana nago, ba go rekelana nago e sa le mola o le ngwana. Ba tlo palakana, motho a ya mo a yago; ga go monamoledi.