Kgoši Korese ke mohlanka wa Modimo. Ditšhaba di tlo lahla medimo, tša khunamela Morena
1Morena o bolela le Motlotšwa wagwe, ke Korese a mo rego: Ke mo swere ka letsogo lagwe le letona, gore ditšhaba ke di digele pele ga gagwe; ke hlamolla dikgoši, ke mmulela mejako, di se sa tswalelwa. 2O re: Ke nna ke go etago pele; ke latša makukuno; ke pšhatla mamati a mphiri, ke thokga mapheko a tshipi. 3Ke go nea matlotlo a fihlilwego, le matsaka a a utilwego, gore o tsebe gobane ke nna Morena ke go biditšego ka leina lago, nna Morena Modimo wa Isiraele. 4Ge ke go bitša ka leina lago, ka go hlaola o sešo wa ntseba, ke ka baka la Jakobo mohlanka wa ka, le Isiraele mohlaolwa wa ka. 5Morena ke nna, ga go e mongwe e lego Modimo, ge e se nna; ke go hlamile ka marumo o sešo wa ntseba. 6E be e le gore kua bohlabela le kua bodikela le kua bodikela go tsebje gobane ga go ne yo mongwe; Morena ke nna, ga go sa ne yo mongwe. 7Ke nna mmopi wa seetša, mohlolaleswiswi, ke tliša molao; ke hlola mabošula; ke nna Morena ke dirago tšeo tšohle. 8Hee wena legodimo, rotha, o le moo godimo; maru a a neše toko, lefase le bulege le mediše phološo, le hlogiše toko. Ke nna Morena ke dirago tšeo. 9Kotsi e tlo wela molwalemmopi wa gagwe, etšwe e le lekopelo la sebopiwa sa mmu. Afa letsopa le ka ra mmopi wa lona la re: O dirang? Le sebopiwa sa gago a se ka re: Ga o na diatla? 10Kotsi e tlo wela yo a rego rragwe, a re: O reng o tswala? A ra mosadi a re: O reng o belega? 11Morena Mokgethwa wa Isiraele, Mmopi wa gago o re: Tša mehla e tlago botšišang nna; tša bana ba ka, le tša dibopša tša diatla tša ka, di laelwa ke nna. 12Lefase ke nna ke le dirilego, ka bopa motho mo go lona; ke nna ke bapilego magodimo ka diatla tša ka, ka bitša makoko ka moka a ona. 13Ke nna ke tsošago Korese, a tsoga ka toko; ke mo lokišetša tsela tša gagwe ka moka; ke yena a tlogo tsoša motse wa ka; o tlo hunolla batlengwa ba ka go se selopolla le seloba. O realo Morena wa mašaba.
14Morena o re: Lehumo la Baegipita, le maruo a Bakuše, le a ba Seba, banna bala ba batelele, di tlo tla go wena, e be tša gago. Ba tlo go šala nthago, ba tlo feta ba tlemilwe ka ditshipi, ba tlo go lotšha ba rapela ba re: Modimo ke wa gago, ga go sa na yo mongwe e a kago ba Modimo. 15Ka kgonthe, o Modimo mosebonwe, Modimo wa Isiraele, o Mophološi. 16Ba tlo lewa ke dihlong ba nyatšegile, ba sepela ba le nyatšegong, babetli bao ba medimo ya diswantšho. 17Ge e le Isiraele, yena o tlo phološwa ke Morena ka phološo ye e sa felego. Lena le ka se lewe ke dihlong; le ka se nyatšege go ya go ile. 18Gobane Morena Mohlolamagodimo, yena Modimodimo Mmopi wa lefase, a le dira a le thekga, a se le bope ya ba la lefela, a le direla go dulwa ke batho, ke yena a rego: Morena ke nna, ga go sa ne yo mongwe. 19Tše ke di boletšego ga nka ka di dira thopa ke le felo ga naga ya leswiswi; ga nka ka botša bana ba Jakobo, ka re: E tla ba lefela ge le nnyaka. Nna Morena ke boletše toko, ke kwaditše tše bolo.
20Bokanang le tleng, lena baphonyokgaditšhabeng, le batamele bohle. Bao ba go rwala swantšho tša dikwata ba kgopela go modimo o sa phološego, bona ga ba tsebe selo. 21Bolelang, le botšaneng ditaba, le eletšane seng! Dilo tše ke mang e a kwaditšego e sa le kgaleng, a di bolela mehleng yela? A ga se nna Morena? Ga go Modimo, ge e se nna Modimo wa toko, Mophološi; ke nna fela, ga go e mongwe. 22Boelang go nna le phološwe, lena ba magomo ohle a lefase; gobane Modimo ke nna, ga go sa ne yo mongwe. 23Ke enne ka nna; molomong wa ka go tšwile therešo ka lentšu le ka se kego la gomišwa, la go re: Matolo ohle a tlo nkhunamela; maleme ohle a tlo ena ka nna! 24Ba tlo mpolela ba re: Toko le maatla, di mo go Morena a nnoši. A go tliwe go yena. Bohle ba ba lwago le yena ba tlo lewa ke dihlong. 25Peu yohle ya Isiraele e tlo lokafala ka Morena, e tlo itheta ka yena.
