Kotlo e tlogo tlela Egipita. Tshokologo ya gona
1Moeno moleba Egipita. Ruri Morena o etla ka leru le lebelo, o tlela Egipita; mme medimo ya kua Egipita e a roromela ge a fihla; le dipelo tša Baegipita di gakanegile teng ga bona. 2Ke lohlanya Baegipita gore ba lwe seng, motho a lwe le ngwanabo le wa gabo, motse o lwe le motse, mmušo o lwe le mmušo. 3Baegipita ba tlo hwa dipelo ge ke senya maano a bona; ba tlo botšiša medimo, le ba malopo, le maphala, le didupe. 4Egipita ke go gafela matsogong a marena a mašoro, ba tlo bušwa ke dikgoši tše sehlogo. O realo Mong a bohle Morena wa mašaba.
5Meetse a tšwago letsheng a tlo gopa, noka e tlo pšha ya omelela. 6Dinokana di tlo nkga ya ba tše tshesanyane, le meela ya go epša e tlo pšha gwa pona thlakanoka le mohlahla. 7Mafulo a nokeng, le mašemo ohle a nokeng, a tlo hwa a omelela, a se hlwe a eba gona. 8Barei ba dihlapi ba tlo nyama; go tlo šegama bohle ba ba lahlelago kgwega mo nokeng; le ba go rea ka malokwa ba tlo nyama. 9Le baohli ba leokodi le balogi ba mašela ba tlo dumala. 10Dikokwane tša gona di tlo robagana bathwalwa bohle ba kgarametšega.
11Bakgoma ba Tsoane ke mašilo ruri; bahlale, baeletši ba Farao ba tlaetše. Le sa reng le botša Fararo la re: Nna ke morwa wa bahlale, ke setlogolo sa dikgoši tša bogologolo? 12Ba kae bahlale ba gago? A ba ke ba go botše se Morena wa mašaba a se reretšego Egipita. 13Bakgoma ba Tsoane ba tlaetše, bakgoma ba Nofe ba foregile. Baegipita ba arošitšwe ke balaki ba dilete tša bona. 14Morena o ba tšhetše moya wa mantiko, gore Baegipita ba phokaele medirong ya bona yohle, boka letagwa ge le redimoga ka mahlatša a lona. 15Gomme Egipita go ka se hlwe go eba le modiro o dirwago wa hlogo goba wa mosela, le wa molala le wa mohlahla.
16Mohla woo Baegipita ba tlo swana le basadi; ba tlo tšhoga ge ba bona Morena wa mašaba a emišitše tsogo lagwe godimo ga bona. 17Ke mo Baegipita ba tlogo boifa naga ya Juda; ba tlo tšhoga ge ba kwa ge e bolelwa ka tše Morena wa mašaba a e reretšego tšona.
18Mehleng yeo nageng ya Egipita go tlo ba le metse e mehlano ye e bolelago mmolelo wa Kanana, e enago ka Morena wa mašaba; o mongwe wa yona, ba tlo re ke motse wa Herese.
19Mehleng yeo nageng ya Egipita go tlo ba le aletare ya Morena, mellwaneng ya gona go tlo tsengwa sekasegopotši sa Morena. 20E tlo ba seeletši sa bohlatse bja Morena wa mašaba nageng ya Egipita, bja go re: Ge ba tlo bitša Morena ge ba bona batlaiši, o tlo ba romela Mophološi. Ba tlo hlakodišwa ke yo e lego yo mogolo. 21Morena mo nageng ya Egipita o tlo tsebja; mme Baegipita ba tlo mo tseba mehleng yeo; ba tlo loba ka didimo le dibego; ba tlo enela Morena dikeno ba di phethe. 22E tlo re ge Morena a otlile Baegipita mme a buša a ba fodiša ke mo ba tlogo boela go Morena, yena a ba kwa ge ba mo rapela, a ba fodiša.
23Mehleng yeo go tlo ba le mmila o tšwago Egipita wa ya Asuri; Baegipita ba tlo eta Asuri, Baasuri ba eta Egipita. Baegipita ba tlo loba gotee le Baasuri. 24Wa boraro, e a tlogo kopana le Egipita le Asuri ke Isiraele; ya tlo ba tšhegofalo mo gare ga dinaga. 25Ke mo Morena a tlogo šegofatša a re: O wa lehlogonolo wene setšhaba sa ka Egipita, lena babopša ba ka ba Asuri, wene naga ya ka ya Isiraele.
