HOSEA 1

₁Lentšu la Morena le le tletšego Hosea morwa wa Beeri mehleng ya Usia le Jothama le Ahasi le Hiskia dikgoši tša Juda, mehleng ya Jerobeama morwa wa Joasi kgoši ya Isiraele.

₂Mohla wo Morena a thoma go bolela ka Hosea, o mmoditše a re: Sepela o yo tšea mosadi wa seotswa le bana ba bootswa; gobane naga e fela e dira bootswa ka go hlala Morena.

₃Hosea a ya a tšea Gomere morwedi wa Dibilaima; yena eo a ima a mmelegela ngwana wa lesogana. ₄Morena a bolela le yena a re: Mo reele leina la Jeseriele, ka gobane go sa šetše lebakanyana fela, ke mo ke tlogo latiša madi a Jeseriele go moloko wa Jehu, ke fediše mmušo wa moloko wa Isiraele. ₅Mohlang woo ke mo ke tlogo roba bora bja Isiraele molaleng wa Jeseriele.

₆Mosadi yo a boela a ima, a belega ngwana wa mosetsana. Morena a bolela le nna a re: Mo reele la Mosegaugelwe, ka gobane ba moloko wa Isiraele nka se hlwe ke ga gaugêla, nka se hlwê ké ba lebalela. ₇Ke tlo gaugela ba moloko wa Juda; ke tlo ba phološa ka Morena Modimo wa bona. Nka se ke ka ba phološa ka bora le ka lerumo le ka ntwa le ka dipitsi le ka banamedi ba tšona.

₈Ya re Mosegaugelwe ge a tshwešitšwe, mmagwe a ima gape a belega lesogana. ₉Morena a re: Mo reele leina la Gasebaka, ka gobane ga le batho ba ka, le nna ga ke wa lena.

₁₀Le ge go le bjalo, go ata ga Baisiraele go tlo ba bjalo ka lešabašaba la lewatle le le sa elwego, le le sa balwego. Gomme mo go bego go thwe, ga se setšhaba sa ka, go tlo thwe: Ke bana ba Modimo yo a phelago. ₁₁Gobane Bajuda le Baisiraele ba tlo phuthelwa gotee ba ipeela o tee ya ba yena hlogo. Ba tlo ba ba etšwa mafaseng, gobane letšatši la Jeseriele e tlo ba le legolo.