BAHEBERE 3

₁Bjale lena bana bešo ba bakgethwa, ba le lego ba tee le nna ka go bitšwa magodimong, hlokomelang Motseta yo le Moperisita e mogolo yo re mmolelago, yena Kriste Jesu. ₂E a botegetšego E a mmeilego, boka Moshe ge a mmotegetše lapeng la gagwe ka moka. ₃Ge e le Kriste o swanetšwe ke borena bjo bo fetago bja Moshe, gobane mothei wa lapa o swanetšwe ke go retwa go fetiša ba lapeng. ₄Gobane malapa ka moka a na le baagi ba ona; gomme Moagatšohle ke Modimo. ₅Bjale Moshe o botegetše Modimo lapeng leo la gagwe ka moka e le mohlanka wa go hlatsela tše di bego di tlo bolwa. ₆Kriste yena o botegetše Modimo e le Morwa wa go buša lapa la gagwe; mme lapa la gagwe ke borena ge re tiiša mafolofolo, ge re kgantšha kholofelo go fihla bofelong.

₇Bjale šedi tše Moya o Mokgethwa o di boletšego wa re: E ka be lehono le ekwa lentšu la gagwe. ₈Se reteleng dipelo boka mohla wola wa kgalako, boka mohla wola wa moleko lešokeng, ₉mo botataweno ba kilego ba nteka ba etšiša, le ge mediro ya ka ba e bone nywaga e masome a mane. ₁₀Ka befelwa ke moloko wo, ka re: Ke setšhaba sa dipelo tše di felago di timela; mme ditsela tša ka ga ba di lemoge, ₁₁ka ba ka ena ke befetšwe ka re: Ba ka se ke ba tsena makhutšong a ka.

₁₂Lebelelang ge, lena bana bešo, gore mo go lena go se ke gwa ba wa pelo e mpe ya go se dumele, e a kago hlanogela Modimo e a phelago. ₁₃Sa lena a e be go eletšana bjale ge go sa le la “Lehono”, gore le se be le e a kago retella ka go forwa ke dibe. ₁₄Gobane re ba tee le Kriste, ge re swara ra tiiša se re thomilego go ba sona, ge re realo go fihla bofelong.

₁₅Ge go thwe; Lehono ge le ekwa Lentšu la gagwe, le se ke la retela pelo boka mohla wola wa kgalako,

₁₆Ba go galakela Modimo mola ba kwele e be e le bomang? A e be e se bohle ba go khudušwa Egipita ke Moshe? ₁₇Gomme ba a ba ngadilego gwa ba gwa fela nywaga e masome a mane ke ba fe? A ga se bao ba sentšego, mme ditoto tša bona tša rapalatšwa lešokeng? ₁₈Ke bafe ba a ba enetšego a re: ba ka se ke ba ba ba tsena khutšong ya gagwe? A ga se bao ba gannego go kwa? ₁₉Se re se bonago sese: Se se ba šitišitšego go tsena khutšong ke go se dumele.