BAHEBERE 10

₁Bjale Molao, sa wona ke moriti fela wa tše di tlogo tla; ga se wona sebele sa dilo tšeo. Ka ngwaga o mongwe le o mongwe ba fela ba batamela ka didimo tšona tšeo, mme ba ba di tlišago ga ba kgone go hlatswiwamoka. ₂Bjale ge ba sa kgaotše go tliša didimo, a ga ke re ke ka gobane ba ba direlago Modimo ka tšona ba kwa letswalo le sa fela le tseba sebe? Ge ba ka be ba hlatswiwa gatee ya ba moka, go ka be go sa dirwe ka mokgwa woo. ₃Bjale ka go tliša didimo ka ngwaga o mongwe le o mongwe ba fela ba eletšwa gore sebe se sa le gona. ₄Go bjalo, ka ge madi a dipoo le a diphoko a sa kgone go tloša dibe.

₅Ke gona go tleng ga gagwe lefaseng a rego: Ga o kgahlwe ke didimo le dibego; se o nthakgetšego sona ke mmele. ₆Ga o nyake sehlabelo le selefa. ₇Ke mo nna ke rego: Ke nna e, ke a tla, Modimo; ke dira tše di go kgahlago; matlakaleng a puku go ngwadilwe tše di ntebanego. ₈O thoma ka go re: Ga o kgahlwe ke didimo le dibego le sehlabelo le selefa, mola e le tšona di tlišwago ge go iwa ka Molao. ₉A tla a re: Ke nna e, Modimo; gore ke dire tše di go kgahlago. Ke mo a fedišago tšela tša pele, gore a tle a bee tše dingwe. ₁₀Tše di kgahlago Modimo ke gore re be bakgethwa ka sedimo sa mmele wa Kriste se se tlišitšwego gatee ya ba moka.

₁₁Baperisita bohle ba be ba beilwe gore ba direle Modimo ka mehla, ba tliša tšona didimo tšeo gantši, tše di bego di sa kgone go tloša dibe le gannyane. ₁₂Gomme Jesu a tliša sedimo se tee sa go tloša dibe, a yo dula ka letsogong le letona la Modimo go ya go ile. ₁₃Se se šaletšego o sa se letetše, ke gore manaba a gagwe, a dirwe bogato bja nao tša gagwe. ₁₄Ka sedimo se tee seo o phethile go bopa bakgethwa ka botlalo bja go ya go ile.

₁₅Le Moya o Mokgethwa o re hlatsela moo wa bolela wa re: ₁₆Kgwerano ye ke tlogo e dira ge go fetile mehla yeno še; Ke tlo bea melao ya ka dipelong tša bona; ke tlo o tloka dipelong tša bona. O realo Morena. ₁₇Nka se ke ka hlwa ke gopola dibe tša bona le makgopo a bona. ₁₈Gomme mo go nago le tebalelo ya dibe, ga go sa nyakwa sedimo sa go di hlatswa.

₁₉Bjale bana bešo! Re na le mafolofolo a go tsena Sekgethwakgethweng ka madi a Jesu. ₂₀Ke yona tsela e mpsha, tsela ya go phela ye a re buletšego yona ka mmele wa gagwe; e iša kua go bego go širilwe ka sešireletšo. ₂₁Re na le Moperisita e Mogolo e a beilwego gore a buše Ngwako wa Modimo. ₂₂A re batameleng ge ka pelotumelo e tletšego, re hlatswitšwe dipelo tša tloga moetlo, re hlapišitšwe mmele ka meetse a a sekilego. ₂₃A re gomareleng moeno wa kholofelo ya rena re sa šišinyege; gobane e a re holofedišitšego o a botega. ₂₄A re hlokomelaneng seng sa rena, re išane leratong le medirong e botse. ₂₅Re se ngale phuthego ya gešo ka mokgwa wa ba bangwe; sa rena a e be go eletšana, gagolo ka ge letšatši le le kgauswi; le lena le a di bona.

₂₆Gobane ge re senya ka boomo ge re šetše re filwe go tseba therešo, gona ga go sa na sedimo sa go hlatswa sebe seo. ₂₇Se se tlogo šala ke go letela kahlolo ka poifo le go letela bogale bja mollo wo o tlogo ja baganyetši. ₂₈Ge motho a nyaditše Molao wa Moshe o be a bolawa a sa gaugelwe, ge go le dihlatse tše pedi le ge e le tše tharo. ₂₉A le re kotlo e tlo ba e nyenyane ye e tlogo wela motho e a gataketšego Morwa wa Modimo ka maoto, madi a kgwerano a go mo dira mokgethwa a re ga se selo, a nyatša Moya wa kgaugelo? ₃₀Rena re tseba e a boletšego a re: Tefetšo ke ya ka; le kotlo ke ya ka! O realo Morena. A buša a re: Morena o tlo ahlolela tšhaba sa gagwe. ₃₁Go wela diatleng tša Modimo e a phelago go a šiiša.

₃₂Gopolang mehla yela ya ge le sa tšo bonegelwa, la kgotlelela ntwa e kgolo ya ditlaišego. ₃₃Mo gongwe ba le bokela ka mahlapa le ka dihlokofatšo, mo gongwe la ba ba tee le ba ba bego ba dirwa tše bjalo. ₃₄Ba ba golegilwego le ba kwetše bohloko; ge ba le hlakola dilo tša lena, la kgotlelela le thabile, le tseba gobane kua magodimong le ithuetše lehumo le le fetago dilo tšeo, lehumo le le dulago le le gona. ₃₅Ke gore le se ke la lahla kholofelo ya lena, ye e nago le moputso o mogolo. ₃₆Go rata gore le se fele pelo, gore ka go dira thato ya Modimo le tšee se le se holofedišitšwego. ₃₇Go šetše lebakanyana le sego le kae ke mo go tlogo tla e a boletšwego a thwe: O etla! Gomme a ka se diege. ₃₈Mme moloki wa ka o tlo phela ka tumelo; e a gomelago morago, yena pelo ya ka e ka se mo thabele. ₃₉Gomme rena ga re ba go gomela morago le go yo lahlwa; re ba tumelo ya go yo rua bophelo.