Letago la Ntlokgethwa ya bobedi
1Ka tšatši la masome a mabedi a motšo o tee la kgwedi ya go šupa gwa tšwelela lentšu la Morena ka moporofeta Hagai, la re: 2Botša Serubabele mokgoma wa Juda morwa wa Sealathiele, le Joshua morwa wa Jotsadaka moperisita e mogolo, le mašalela a setšhaba, o re: 3Mo go lena mašalela, ke mang e a bonego Ntlo ya mola e na le letago la yona la pele? Bjalo le e bona e le bjang? A ga ke re le e bona e se selo? 4Bjale wena Serubabele, tia maatla! -- O realo Morena. -- Le wena Joshua morwa wa Jotsadaka moperisita e mogolo, tia maatla! Le lena setšhaba ka moka sa naga, tiang maatla! Dirang gobane ke na le lena. -- O realo Morena wa mašaba. 5Lentšu lela le ke le tlemilego le lena mola le etšwa Egipita, le sa tiile; le Moya wa ka o mo go lena. Se boifeng!
6Ka gobane Morena wa mašaba o re: Go sa šetše lebakanyana, ke mo ke tlo go šišinya legodimo le lefase, le lewatle le naga. 7Le ditšhaba ka moka ke tlo di šišinya, gwa tsebo tla matsaka a ditšhaba ka moka; mme Ntlo ye ke tlo e tlatša letago. -- O realo Morena wa mašaba. -- 8Gobane disilifera le digauta ke tša ka. -- O realo Morena wa mašaba. 9Letago la Ntlo ye e tlo ba le legolo, le le fetišago lela la ya kgale. -- O realo Morena wa mašaba. -- Mme felo fa ke tlo bea khutšo. -- O realo Morena wa mašaba.
10Ka la masome a mabedi a metšo e mene la kgwedi ya senyane, ka ngwaga wa bobedi wa Dario, Lentšu la Morena la tlela moporofeta Hagai la re: 11Morena wa mašaba o re: Botšiša baperisita tša molao, o re: Ge motho a ka rwala nama e kgethwa a e phuthetše nthleng ya kobo ya gagwe; ge ntlha yeo ya kobo ya gagwe e kgwatha bogobe, goba dijo, le ge e le sedila le makhura, goba dilewa tše dingwe, afa bokgethwa bja nama yeo bo ka selela go dilo tšeo? --
Baperisita ba fetola ba re: Aowa!
12Hagai a re: Ge motho a tšhilafetše ka setopo, mme a swara se sengwe sa dilo tšeo, a di tlo tšhilafala? --
Baperisita ba re: Di tlo tšhilafala.
13Hagai a fetola a re: Le go setšhaba se go dutše bjalo, le go batho ba, ge ke ba bona. -- O realo Morena. -- Go dutše bjalo medirong ka moka ya matsogo a bona; le tše ba di tlišago fa, di tšhilafetše.
14Bjale hlokomelang, le thome ka la lehono, le ye le tše di sago tla, le gopole le tša mehla yela le sešo la hlatlaganya maswika a Ntlokgethwa ya Morena. 15Go be go le bjang? Motho o be a etla moolong wa mabele a re e tlo ba diroto tše masome a mabedi; a hwetša e le tše lesome fela; a tla bofotlelong a re: E tlo ba meeta e masome a mahlano, a hwetša e le masome a mabedi fela. 16Ke le otlile ka phori le ka megwelema le ka sefako medirong ka moka ya diatla tša lena; mme ga le boele go nna. -- O realo Morena. -- 17Bjale le hlokomeleng tše di tlogo thoma bjale, tša ba gona mehleng e tlago, go tloga ka letšatši le la masome a mabedi a metšo e mene la kgwedi ya senyane, le Ntlokgethwa ya Morena e theilwego ka lona. Le hlokomeleng! 18Le tle le bone ge peu e sa tlo šala e bolokilwe; le bone ge merara le mego le merapa le mehlware e sa tlo šita. Lehono ke thoma go le šegofatša.
19Lentšu la Morena la buša la tlela Hagai ka lona tšatši leo la masome a mabedi a metšo e mene la kgwedi yeo la re: 20Botša Serubabele mokgoma wa Juda, o re: Ke nna ke tlogo šišinya legodimo le lefase, 21Ke tlo tekolanya dibulo tša bogoši tša mebušo; ke tlo fefiša maatla a mebušo ya bantle; ke tlo tekolanya dikoloi le banamedi ba tšona, ka uša dipitsi le banamedi ba tšona; ba tlo tekolana ka marumo. 22Mohlang woo -- o realo Morena wa mašaba, -- ke tlo tšea wena Serubabele morwa wa Sealathiele mohlanka waka, -- o realo Morena, -- ka go dira palamonwana ya ka; gobane ke kgethile wena. -- O realo Morena.
