HAGAI 1

₁Ka ngwaga wa bobedi wa kgoši Dario, ka kgwedi ya go selela, ka tšatši la pele la yona, lentšu la Morena le tletše Serubabele morwa wa Sealathiele mokgoma wa Juda, le Joshua morwa wa Jotsadaka moperisita e mogolo; le ba tletše ka moporofeta Hagai, la re:

₂Morena wa mašaba o re: Setšhaba se se re: Lebaka la go aga Ntlo ya Morena ga le ešo la fihla. ₃Bjale go tšweletše lentšu la Morena ka moporofeta Hagai, la re: ₄Anthe go fihlile lebaka la bolena la go dula mo nywakong ya lena ya mamati a matsaka mme Ntlo ya Morena e ka fo dula e phušogile! ₅Bjale Morena wa mašaba o re: Hlokomelang ditsela tša lena. ₆Le bjetše peu e ntši, la buna di se kae; le lle, mme la se hore; le nwele, mme le se kgolwe; la apara, le se ruthele; wa go direla moputso, a o hweletša mokotlana wa nthoba. ₇Morena wa mašaba o realo; o re: Hlokomelang ditsela tša lena. ₈Namelang dithaba le boe le dikwata, le tle le age Ngwako wo. Ke sona se se tlo go nkgahla, ka kgona go ithetiša. -- O realo Morena.

₉Le be le hutša go rua tše ntši gomme šefa, ke tše nyenyane; la di goroša, mme nna ka tšitlanya, molato ke eng? Ke ka gobane Ntlo ya ka e sa le lešope, mola bolena, le mang le mang, a kganyela ntlo ya gagwe. ₁₀Molato ke wona woo ge legodimo le le tima pula, mme naga e gana go bea dienywa. ₁₁Komelelo e biditšwe ke nna, ya wela naga le dithaba le mabele le merara le mehlware, le dimela tšohle tša mašemo, le batho le dikgomo, le mediro yohle ya diatla.

₁₂Ba di kwele, boSerubabele morwa wa Sealathiele, le Joshua morwa wa Jotsadaka moperisita e mogolo, le mašalela ka moka a setšhaba, ba theetša lentšu la Morena Modimo wa bona, le tše a di boletšego ka moporofeta Hagai, ka mo Morena Modimo wa bona a bego a mo laetše. Gomme setšhaba sa boifa Modimo. ₁₃Hagai motseta wa Morena a botša setšhaba malaeledi a Morena a re: Morena o re: Ke na le lena! ₁₄Morena a phafoša pelo ya Serubabele morwa wa Sealathiele mokgoma wa Juda, le pelo ya Joshua morwa wa Jotsadaka moperisita e mogolo, le dipelo tša mašalela ka moka a setšhaba; ba tla ba swara modiro wa Ntlo ya Morena wa mašaba Modimo wa bona. ₁₅E be e le ka letšatši la masome a mabedi a metšo e mene la kgwedi ya go selela, ka ngwaga wa bobedi wa pušo ya Dario.