GENESI 43

₁Gomme tlala ya imela lefase. ₂Ya re ge ba feditše dijo tšela tše ba boilego natšo Egipita, tatabo a re: Boelang le yo re rekela dijwana.

₃Juda a fetola a re: Monna yola o re laile a tiiša a re: Sefahlogo sa ka le ka se ke la se bona, ge ngwaneno le se na nae! ₄Ge o ka dumelela ngwanabo rena a ya le rena, gona re tla ya ra go rekela dijo. ₅Fela, ge o ka gana go roma le yena, gona re ka se ke ra ya, ka gobane monna yola o boletše a re: Sefahlogo sa ka le ka se ke la se bona, ge ngwaneno le se na nae.

₆Ke mo Isiraele a itšego: Le be le reng ge le ntlholela mahloko ka go botša monna yola la re: Re sa na le ngwanabo rena?

₇Bona ba re: Monna yola o re botšolodišitše tša rena le tša metswalo ya rena, a re: Tataweno a o sa phela? A re: A le sa na le ngwanabolena e mongwe? Ke gona ra mmotša tše a bego a re botšiša. Le gona re be re tlo tseba bjang gore o tlo re: Tlišang ngwanabo lena?

₈Le Juda a bolela le Isiraele tatagwe a re: Lesa lesogana le sepele le nna re tlo tsoga ra sepela, gore re phele, re se hwe ka tlala, rena, le wena, le bana ba rena. ₉Molato e tlo ba wa ka ge a sa boe; o tlo mo lata go nna. Ge ke sa mmušetše go wena, ka mo tliša fa wa mmona, gona o tlo fela o mpea molato ka mehla le mehla. ₁₀Ka gobane mola re se ke ra diega, re ka be re šetše re boile la bobedi.

₁₁Ke mo Isiraele tatabo a boletšego a re: Ge go dutše bjalo, gona dirang se: Tlogang le rwele dienywa tša naga ye ka mekotla ya lena, le di iše go monna eo, e be dineo. Tšeang boroku, le nose, le dinoko, le ditlolo, le ditloo, le dikoko. ₁₂Tšhelete le sware ye e lekanego go reka gabedi; gore tšhelete yela, ye le e hweditšego melomong ya mekotla ya lena le kgone go e bušetša ka diatla tša lena. Mohlomong go fošitšwe fao. ₁₃Tlogang le ngwanabo lena; mme le tsoge le boele go monna eo. ₁₄Gomme Modimo Ramaatlaohle a a dire gore le hwetše monna eo a na le kgaugelo, gore a hunolle ngwanabolena, a mo lese a boe le lena, le Benyamini. Joo nnaa mohlakogabana, ke sa fela ke hlakoga!

₁₅Bjale banna bao ba phuthela dineo tšeo, le tšhelete e lekanego go reka gabedi, ba tšea Benyamini, ba wela tsela ba ya Egipita, ba ema pele ga Josefa. ₁₆Josefa ge a bona ba na le Benyamini, a laela molaki wa gagwe a re: Banna ba ba iše lapeng, o hlabe se o se hlabago, o lokiše, ka gobane ka meriti banna ba ba tlo ja le nna. ₁₇Monna eo a dira se Josefa a mmoditšego sona, a iša banna bao lapeng la Josefa.

₁₈Ge ba išwa lapeng la Josefa, ba boifa ba re: Re išwa gona ka baka la tšhelete yela ye e boetšego mekotleng ya rena mohla wola; ba tlo re tsogela ba re swara, ba re dira bahlanka, le dipokolo tša rena. ₁₉Ba batamela molaki wa Josefa, ba bolela le yena ba sešo ba tsena ka lapeng, ₂₀ba re: Hle Morena! Re kile ra tla fa mola la pele, ra reka dijo. ₂₁Ra re go fihla makhutšong ra tlemolla mekotla, ra hwetša tšhelete ya e mongwe le e mongwe e le mo molomong wa mokotla wa gagwe, e le yona e lekanego go reka. Bjalo re boa re e swere; ₂₂mme re tla re swere le e nngwe ya go reka dijo. E a tsentšego tšhelete ya rena mo mekotleng ya rena, rena ga re mo tsebe.

₂₃Monna eo a re: Beang dipelo! Ke Modimo wa lena, Modimo wa borraweno e a le beetšego lehumo mo mekotleng ya lena. Nna tšhelete ya mohla wola ke e amogetše. A realo, mme a tliša Simeone go bona.

₂₄Monna eo bjale a ba iša ka lapeng la Josefa; a ba gela meetse, ba hlapa maoto; mme dipokolo tša bona a di nea dijo. ₂₅Bona ba beakanya dineo tšela tša bona, ba letela Josefa ge a tlo tla mosegare; ka gobane ba be ba kwele ge a re o tlo ja le bona gona moo lapeng. ₂₆Josefa ge a tlile lapeng, ba mo tlišetša dineo tšeo ba di swerego, ba tla natšo ba tsena ka ngwakong, ba lotšha. ₂₇Josefa a ba botšiša maphelo a re: Tata weno, yo le mmoletšego mohla wola, o sa thabile naa? A o sa le gona?

₂₈Bona ba re: Rrawešo mohlanka wa gago o sa thabile, o sa le gona. Ba khunama ba lotšha.

₂₉Josefa a iša mahlo a bona Benyamini monnagwe, ngwana wa mmagwe, mme a re: A ke yena ngwanabo lena, yo le mmoletšego? Mme a re: Modimo a a go dire ka botho, ngwanaka. ₃₀Moo Josefa a tloga ka go akgofa; a kwa megokgo e le kgauswi ka ge pelo ya gagwe e šokwa ka baka la monnagwe; a ya phapošing a llela gona. ₃₁A kgona a hlapa sefaghlogo, a tšwa a itiišitše, a re: Tlišang dijo! ₃₂Ba tliša; mme tša gagwe ba mmeela gošele; le bona ba ba beela tša bona gošele; le Baegipita ba ba jago le yena, tša bona ba ba beela gošele, ka gobane Baegipita ba ila go ja le Bahebere. ₃₃Bana babo, bona ba dudišwa pele ga gagwe ka go hlatlamana ga bona go tswalweng, go tloga ka mogolo wa bona go goma ka e monyane; mme ba lebellana ba tlabegile. ₃₄Ge ba tlišetšwa dikabelo tše di tšwago meruswing ya Josefa, kabelo ya Benyamini ya ba e lekanago le dikabelo tše tlhano tša bona. Mme ba nwa ba na nae, ba hora.