GENESI 35

₁Modimo a bolela le Jakobo a re: Tsoga o rotogele Bethele, o age gona; mme o direle Modimo aletare gona, ya Modimo e a iponaditšego go wena mola o tšhaba Esau mogolwago.

₂Ke mo Jakobo a boletšego le ba lapa la gagwe, le bohle ba ba bego ba na le yena, a re: Lahlang medimo e šele ye e lego mo go lena, le hlape, mme le apare diaparo tše dingwe. ₃Gomme a re tsogang re rotogele Bethele, ke yo dira aletare ya Modimo e a kilego a nkwa mohla ke tlaletšwe, mme a ba le nna tseleng ye ke e sepetšego. ₄Ke mo ba neetšego Jakobo medimo e šele ka moka ye ba bego ba na nayo, le mangina a a bego a le ditsebeng tša bona, mme Jakobo a di epela ka tlase ga sehlare se segolo sa gona fao Sikeme.

₅Gomme ba khuduga. Ge barwa ba Jakobo ba sa ka ba hlomarelwa ke motho, e be e le ka gobane metse ya thoko tšohle e be e wetšwe ke tšhogo e tšwilego go Modimo. ₆Jakobo a fihla Lusi nageng ya Kanana gona kua Bethele, a na le batho ba gagwe ka moka. ₇A aga aletare gona fao, mme felo fao a re Ke Modimo wa Bethele, ka gobane e be e le gona moo Modimo a iponaditšego go yena mohla wola a tšhaba mogolwagwe. ₈Debora mofepi wa Rebeka o hwile mehleng yeo, a bolokwa sehlareng se segolo sa ka tlase ga Bethele; ba se reela ba re ke Sehlare sa Sello.

₉Mehleng ya ge Jakobo a sa tšo boa Mesopotamia, Modimo o iponaditše go yena gape, a mo šegofatša. ₁₀Modimo o boletše le yena a re: Leina la gago ke Jakobo. Bjalo leina la gago ga e sa hlwe e le Jakobo, e tlo ba Isiraele. A mo reela la Isiraele. ₁₁Le gona a re: Ke nna Modimo Ramaatlaohle. Ata o ntšhifale. Go wena go tlo tšwa setšhaba le bontši bja ditšhaba; le dikgoši di tlo tšwa go wena. ₁₂Naga ye, ye ke e filego Aborahama le Isaka, ke tlo e nea wena, ke tlo e neela bana ba gago ba mehleng e tlago. ₁₃Gomme Modimo a rotoga a mo tlogela felo fao a bego a bolela le yena. ₁₄Mme Jakobo a tsema leswika la seka gona moo a bego a bolela le yena, mme a le tšhela sebego, a le tšhela le makhura. ₁₅Gomme ke Jakobo e a reetšego felo fao Modimo a boletšego le yena, a re ke Bethele.

₁₆Ge ba khuduga Bethele, ba šetše ba batametše Efurata, Rahele a belega, mme a belega ka bothata. ₁₇Pelego ge e thatafile, mmelegiši a mmotša a re: O se ke wa boifa; le yena yo e tlo ba mošimanyana. ₁₈Ya re ge moya wa gagwe o felela, e šetše e le go hwa, a mo reela la Benoni (Morwa-bohloko-bjaka); fela tatagwe o mo reetše la Benyamini (Morwa wa le letona la ka).

₁₉Gomme Rahele a hwa, a bolokwa mo tseleng ya go ya Efurata, ke gona Betlehema. ₂₀Jakobo a tsema leswika leo la seka sa lebitla la Rahele le sa lego gona le lehono. ₂₁Isiraele ge a khuduga moo o ile a hloma mošaša wa gagwe sebong sa Edere.

₂₂Mehleng ya ge Isiraele a agile nageng yeo, Rubeni o kile a robala le Biliha, serethe sa tatagwe, mme Isiraele a kwa taba yeo.

₂₃Barwa ba Jakobo e be e le ba lesome le metšo e mebedi. Barwa ba Lea e be e le Rubeni, wa leitšibulo la gagwe; a hlatlangwa ke Simeone, le Lefi, le Juda, le Isashara, le Sebulone. ₂₄Barwa ba Rahele ke Josefa le Benyamini. ₂₅Barwa ba Biliha molata wa Rahele ke Dani le Nafutali. ₂₆Barwa ba Silipa molata wa Lea, ke Gada le Asere. Ke bona barwa ba Jakobo ba ba mo tswaletšwego a le kua Mesopotamia.

₂₇Gomme Jakobo a ba a fihla go Isaka tatagwe kua Mamure motseng wa Kiryate-Araba, ke gona Heburone, mo Aborahama le Isaka ba diiletšego gona. ₂₈Lebaka la bophelo bja Isaka e be e le nywaga e lekgolo le lesome le metšo e seswai. ₂₉Ya ba gona a feletšego, a hwa, a gorogela go ba gabo, a tšofetše, a tennwe ke go phela; mme Esau le Jakobo barwa ba gagwe ba mmoloka.