Aborahama le Abimeleke kgoši ya Gerara
1Aborahama o khudugile felo fala a leba nageng ya thoko ya borwa, a aga gare ga Kadese le Suri, a falalela Gerara. 2Aborahama ge a bolela mosadi wa gagwe a re: Ke kgaetšedi ya ka. Ke mo Abimeleke kgoši ya Gerara a romilego batho ba tšea Sara. 3Fela, bošego Modimo a tla go Abimeleke dilorong, a bolela le yena a re: O tsebe gore o tlo hwa ka baka la mosadi yo o mo tšerego mola a na le monna wa gagwe.
4Abimeleke o be a sešo a mmatamela, mme a re: Mongaka, naa o ka bolaya le batho ba go loka? 5Naa ga se yena a mpoditšego a re: Ke kgaetšedi ya ka? Mosadi le yena o boletše a re: Monna eo ke kgaetšedi ya ka. Dilo tše ke di dirile ke se na bomenetša, ka diatla tše di se nago bosodi.
6Ke mo Modimo a mo fetotšego dilorong a re: Le nna ke tseba ge o di dirile, pelo ya gago e se na bomenetša; mme ke go šegetše gore o se senye pele gaka. Ke ka baka leo ke sa kago ka go lesa wa mo swara. 7Bjalo bušetša mosadi yo go mong wa gagwe; yena ke moporofeta; o tlo go rapelela wa phela. Ge o sa mmušetše go monna wa gagwe, gona o tsebe gore o tlo hwa lehu, wena le bohle ba e lego ba gago.
8Ka la ka moswana Abimeleke a tsoga, a bitša bahlanka ba gagwe bohle, a ba anegela taba ye ka moka. Banna bao ba boifa ka kudu. 9Abimeleke a napa a bitša Aborahama a bolela le yena a re: O dirile taba mang? Sebe se ke go diretšego sona ke sefe, ge nna le ba mmušo wa ka o re hlolela molato o mokaakaa? O ntirile tše di sa dirwego. 10Abimeleke a botšiša Aborahama a re: O boneng ge o tlo dira taba ye?
11Aborahama a re: Ke be ke re, motseng wo ga go na poifo ya go boifa Modimo le ka go nyane; ka re, ba tlo mpolaya ka baka la mosadi wa ka. 12Le gona, ka kgonthe ke kgaetšedi ya ka; ke morwedi wa tate, le ge e se ngwana wa mme; gomme ke mo tšere. 13Bjale mohla wola, ge Modimo a nkhuduša ngwakong wa tate, ke boletše le mosadi wa ka ka re: Lerato le o tlogo ntira ka lona šele: Mo go fela mo re tlogo fihla ntshe, o mpolele o re: Ke kgaetšedi ya gagwe.
14Ke mo Abimeleke a tšerego dihuswane, le dikgomo, le balata ba banna le ba basadi, a neela Aborahama, a mmušetša Sara mosadi wa gagwe; 15Mme Abimeleke a re: Lebelela, naga ya ka e ahlame pele ga gago; dula mo e go kgahlago. 16A bolela le Sara a re: Lebelela, kgaetšedi ya gago ke mo nea sekele tše sekete; o tsebe gore ke seširo sa mahlong a bohle ba ba nago le wena; bjale ga go na e a tlogo go bea molato.
17Gomme Aborahama a rapelela Abimeleke; Modimo a fodiša Abimeleke le mosadi wa gagwe, le balata ba gagwe ba basadi, mme ba buša ba belega. 18Ka gobane Modimo o be a thibetše ruri go belega ka moka mo motseng wa Abimeleke ka baka la Sara mosadi wa Aborahama.
