GENESI 17

₁Ya re ge Aborama e le monna wa nywaga e masome a senyane le nywaga e senyane, Morena a iponatša go yena, a bolela le yena a re: Ke nna Modimo Ramaatlaohle; sepela pele ga sefahlogo sa ka, o be e a se nago bosodi. ₂Kgwerano ya ka ye ke e dirilego le wena ke tlo e tiiša ka go atiša gagologolo. ₃Aborama a lotšha; Modimo a bolela le yena a re: ₄Nna ge ke gwerana le wena, ke go re o tlo ba tatagobontšhi bja ditšhaba. ₅Bjalo leina la gago e ka se hlwe e eba Aborama; leina la gago e tlo ba Aborahama; ka gobane ke go beile go tlo ba tatago bontši bja ditšhaba. ₆Ke tlo go atiša gagologolo, ke go dire ditšhaba; go wena go tlo tšwa dikgoši.

₇Ke tlo tiiša kgwerano ya ka le bana ba gago, le bana ba gago ba mehleng e tlago, le ditlogolo tša bona, gore e be kgwerano ya neng le neng, gore ke be Modimo wa gago le wa bana ba gago ba mehleng e tlago. ₈Mme wena le bana ba gago ba mehleng e tlago, ke tlo le nea naga ye ya madiilelo a gago, naga ka moka ya Kanana, e be ya bona neng le neng; mme nna ke tlo ba Modimo wa bona.

₉Le gona Modimo a bolela le Aborama a re: Le wena o gomarele kgwerano ya ka, wena le bana ba gago ba mehleng e tlago, go iša ditlogolong tša bona. ₁₀Gomme kgwerano ya ka ye le tlo e gomarela e le ya ka le ya lena, le ya bana ba gago ba mehleng e tlago, še: Ba batona ba lena ka moka a ba bolotšwe. ₁₁Le bolotšwe, e be leswao la kgwerano ye ke e dirago le lena. ₁₂Go lena, mošimanyana ge a na le matšatši a seswai, a bolotšwe, ba batona ka moka, go iša le ditlogolong tša lena, ba ba tswaletšwego gae, le mang le mang e a rekilwego ka tšhelete, e le o šele, e se ngwana wa gago. ₁₃A a bolotšwe, le ge a tswaletšwe motseng wa gago, le ge o mo rekile ka tšhelete ya gago. Ke mo kgwerano ya ka e tlogo ba mebeleng ya lena, ya ba kgwerano ya neng le neng. ₁₄Ge e le monna wa lešoboro e a sa bolotšwago mo mmeleng wa gagwe, motho eo a a kgaolwê mo setšhabeng sa gabô; ó sentše kgwêranô ya ka.

₁₅Modimo o boletše le Aborahama a re: Sarai mosadi wa gago o se ke wa hlwa o mmitša ka leina la Sarai, ka gobane leina la gagwe ke Sara. ₁₆Ke tlo mo šegofatša; le ka yena ke tlo go nea morwa; ke tlo mo šegofatša a ba mmago ditšhaba; go yena go tlo tšwa magoši a ditšhaba.

₁₇Aborahama a lotšha mme, a sega; mo pelong ya gagwe a re: Afa monna wa nywaga e lekgolo a ka tswalelwa ngwana! Le Sara a ka belega mola e le mosadi wa nywaga e masome a senyane! ₁₈Mme Aborahama a kgopela Modimo a re: Hle le Isimaele a phele o mo lebeletše.

₁₉Modimo a re: Go tlo ba bjalo. Sara mosadi wa gago ke yena e a tlogo go belegela morwa e o tlogo mo reela leina la Isaka, e ke tlogo tiiša kgwerano ya ka le yena, ya tlo ba kgwerano ya neng le neng, le ya bana ba gagwe ba mehla e tlago. ₂₀Le ka baka la Isimaele ke go kwile. O tsebe gore ke mo šegofaditše; ke tlo mo atiša a ba bontši bjo bogologolo; o tlo belegelwa magoši a lesome le magoši a lesome le magoši a mabedi; ke tlo mo dira setšhaba se segolo. ₂₁Kgwerano ya ka yona ke e tiišetša Isaka, e a tlogo belegwa ke Sara išago pakeno. ₂₂Ya re ge Modimo a feditše go bolela nae, a rotoga, a tlogela Aborahama.

₂₃Ke mo Aborahama a tšerego morwa wa gagwe Isimaele, le bohle ba ba tswaletšwego motseng wa gagwe, le bohle ba ba rekilwego ka tšhelete ya gagwe, ba batona ka moka mo go batho ba motse wa Aborahama, mme a ba bolotša ka mo Modimo a mmoditšego ka gona. ₂₄Aborahama yena e be e le monna wa nywaga e masome a senyane le nywaga e senyane ge a bolotšwa. ₂₅Isimaele morwa wa gagwe e be e le wa nywaga e lesome le metšo e meraro ge a bolotšwa. ₂₆Aborahama le Isimaele morwa wa gagwe ba boloditšwe ka 'tšatši letee. ₂₇Le banna ka moka ba motse wa gagwe, ba ba tswaletšwego gae, le ba ba rekilwego ka tšhelete go bašele, ba boloditšwe le yena.