BAGALATIA 6

₁Bana bešo, ge motho a tšhoga a wetše molatong, lena ba le lego ba Moya, le mo tsoše ka moya o bonolo; gomme le lena le itote, gore le se wele molekong. ₂Hlatlolanang merwalo; ke wona mokgwa wo le tlogo phetha molao wa Kriste ka wona. ₃Ge motho a ka itshema a re: Ke selo, mola e se selo, o a iphora. ₄Motho a a šetše modiro wa gagwe; ke mo a tlogo retwa ka tša gagwe, e sego ka tša e mongwe. ₅Gobane motho ka o tee ka o tee o rwešwa morwalo e lego wa gagwe.

₆E a rutwago lentšu, a a fele a ntšha go tše botse ka moka, a abela eo a mo rutago.

₇Le se ke la timela; Modimo ga a kwerwe. Se motho a se bjalago, ke sona se a tlogo se buna. ₈E a bjalago mo nameng ya gagwe, se a tlogo se buna nameng ke tshenyego. E a bjalago Moyeng, se a tlogo se buna Moyeng ke bophelo bjo bo sa felego. ₉A re se ke ra lapa go dira botse; gobane ge re sa lesetše, re tlo buna ka lebaka la gona. ₁₀Bjale ge re sa na le lebaka, a re direng botse; re bo direle batho bohle, gagolo re bo direle batho baborena ba tumelo.

₁₁Bonang bogolo bja mangwalo a ke le ngwaletšego ona ka seatla sa ka. ₁₂Batho bao ba ratago go kgahla batho ka tša nama, ke bona ba ba le gapeletšago ba re: Bollang, le gore ba se ke ba tlaišetšwa sefapano sa Kriste. ₁₃Gobane le bona ba go bolla, Molao ga ba o lotole. Ba rata ge le ka bolla, gore ba kgantšhe mebele ya lena. ₁₄Gomme nna, go ikgantšha a go be kgole le nna, ge e se go kgantšha sefapano sa Mong wa rena Jesu Kriste, yo lefase le mpapoletšwege ka yena, mme nna ka bapolelwa lefase. ₁₅Gobane mo go Kriste go bolla le go se bolle ga se selo; se segolo ke go ba mmopša e mofsa. ₁₆Gomme ka moka ba ba tšeago ka tsela ya thuto ye, a khutšo le kgaugelo di ba okamele, bona Baisiraele ba Modimo.

₁₇Bjalo ge, go se ke gwa hlwa go eba e a ntapišago, gobane mmeleng wa ka ke na le mabadi a Morena Jesu.

₁₈Kgaugelo ya Mong wa rena Jesu Kriste a e be le meoya ya lena, bana bešo. Amene.