ESERA 7

₁Ya re ge ditaba tše di diregile, ge go buša Arithasasitha kgoši ya Peresia, gwa rotoga Esera morwa wa Seraya morwa wa Asaria morwa wa Hilikia, ₂morwa wa Salume morwa wa Tsadoko morwa wa Ahitobo ₃morwa wa Amaria morwa wa Asaria morwa wa Merayothe ₄morwa wa Serakia morwa wa Usi morwa wa Buki ₅morwa wa Abisua morwa wa Pinease morwa wa Eleasara morwa wa Arone moperisita e mogolo.

₆Esera yo a na a rotoga a etšwa Babele. E be e le moruti wa makgonthe wa mangwalo a molao wa Moshe, e a beilwego ke Morena Modimo wa Isiraele. Kgoši e be e mo neile tšohle tše a bego a di kgopetše, ka gobane seatla sa Morena Modimo wa gagwe se be se na le yena. ₇A tla a na le ba bangwe ba Baisiraele, le ba baperisita, le Balefi, le ba baopedi, le ba baletakgoro, le ba bahlanka ba Ntlokgethwa; ba tla Jerusalema ka ngwaga wa go šupa wa kgoši Arithasasitha. ₈Ba goroga ka kgwedi ya bohlano ya wona ngwaga woo wa go šupa wa pušo ya kgoši yeo. ₉Kua Babele o be a tsogile ka letšatši la pele la kgwedi ya pele; Jerusalema a fihla ka la pele la kgwedi ya bohlano, ka gobane o be a ukametšwe ke seatla se botho sa Modimo wa gagwe. ₁₀Gobane Esera pelo ya gagwe e be e sa lese go hlwa e nyaka molao wa Morena, le go dira se se bolelwago ke wona, le go ruta Isiraele melao le ditshwanelo.

₁₁Šedi ditaba tša lengwalo le kgoši Arithasasitha a le neilego Esera moperisita, moruti wa mangwalo, moruti wa mantšu a Morena le ditaelo tša gagwe, le wa melao ye Modimo a e neilego Isiraele; šedi: ₁₂Nna Arithasasitha kgoši ya dikgoši, ke ngwalela Esera moperisita, moruti wa makgonthe wa mangwalo a molao wa Modimo wa legodimo. ₁₃Ke laetše gore mang le mang wa setšhaba sa Isiraele, e a lego mo mmušong wa ka, wa baperisita ba sona le wa Balefi, e a kago rata go ya Jerusalema, a sepele nago; ₁₄ka gobane o romilwe ke kgoši le ditona tša yona tše di šupago, gore o hlahlobe ditaba tša Juda le tša Jerusalema ka go ya ka molao wa Modimo wa gago, ₁₅le go iša disilifera le digauta, tše kgoši le ditona ba di ntšheditšego Modimo wa Isiraele, yo bodulo bja gagwe e lego Jerusalema, ₁₆le disilifera ka moka le digauta, tše o di newago dileteng tša Babele ka moka, gammogo le dineo tša go ithapa, tše setšhaba le baperisita ba di ntšhetšago Ngwako wa Modimo wa Jerusalema. ₁₇Le gore o akgofe o reke dipowana le dikgapana ka tšhelete yeo, le dikwana le dibego tša go ya le tšona tša dilewa le dinwewa, o yo di hlabela aletareng ya Ngwakong wa Modimo wa lena gona kua Jerusalema. ₁₈Disilifera le digauta tše di kago šala, wena le bana beno le dire ka tšona ka mo le bonago e le se Modimo wa lena a se ratago. ₁₉Dibjana tše o di neilwego gore e be tša go dira Ngwakong wa Modimo wa gago, le tšona o di dige pele ga Modimo wa Jerusalema. ₂₀Le dilo tše dingwe tše di kago hlokwa ka mo o bonago, o di tšhe mo polokelong ya mahumo a mošate. ₂₁Nna kgoši Arithasasitha ke laela lena balaki ka moka ba mahumo mošowe wa noka, gore tše Esera moperisita moruti wa mangwalo a molao wa Modimo wa legodimo a kago di kgopela, tšohle le di dire ka go akgofa. ₂₂Le ntšhe tše di kago fihlela ditalente tše lekgolo tša silifera, le mekotla e lekgolo ya mabele, le meeta e lekgolo ya makhura; letswai lona le se balwe. ₂₃Tšohle tše di nyakwago ge go iwa ka molao wa Modimo wa legodimo, di direlwe Ngwako woo wa Modimo wa legodimo ka go akgofa, gore mmušo wa kgoši le wa bana ba gagwe o se tlo welwa ke kgalefo. ₂₄Le gona le tsebiše gore: Baperisita ka moka, le Balefi, le baopedi, le baletakgoro, le bahlanka ba Ntlokgethwa ba ba hlankelago Ngwako woo wa Modimo, ba se ke ba ntšhišwa lekgetho, le ge e le dibego le motšhelo wa tsela. ₂₅Gomme wena Esera, ka bohlale bja Modimo wa gago bjo bo lego mo go wene, o bee balaki le baahlodi ba go ahlolela setšhaba sa moka mošola wa noka; e be ba ba tsebago molao wa Modimo wa gago; ba ba sa o tsebego o ba rute. ₂₆Ba ba sa dirego ka molao wa Modimo wa gago le ka molao wa kgoši, o ba sekiše thata; o ka ba ahlolela le lehu, le ge e le go rakwa, le ge e le go lefišwa ka ditšwammele, goba ka go ba iša kgolegong.

₂₇A go lebogwe Morena Modimo wa botatawešo, gobane ke yena a beilego tše bjalo pelong ya kgoši, gore e thakge Ngwako wa Morena o lego Jerusalema ka mokgwa woo. ₂₈Gomme nna a nkhwetšiša botho go kgoši le go ditona tša yona le go bakgoma ka moka ba maatla ba kgoši; ka kwa ke na le maatla ka ge seatla sa Morena Modimo wa ka se na le nna se nkukametše. Ka botha ba e lego ba bagolo ba Isiraele, gore ba ye le nna kua Jerusalema.