ESERA 10

₁Esera a sa rapela ka mokgwa wo a bobola a lla a itahletše fase pele ga ngwako wa Modimo a phuthegelwa ke phuthego e kgolokgolo ya Baiseraele, ya banna le basadi le bana; gobane sello setšhabeng e be e le se segolo. ₂Sekanya morwa wa Jehiele wa ga Elama a bolela le Esera a re: Re hlanogetše Modimo wa rena ka go tšea basadi ba šele ba ditšhaba tša naga ye. Fela, kholofelo e sa le gona ya gore Baisiraele ba tšwe molatong wo. ₃Go rata gore re dire kgwerano le Modimo wa rena, ya gore re gomiše basadi ba ka moka gotee le ba ba tswetšwego ke bona; e be go ya ka keletšo ya gago, Mong a ka, le ka keletšo ya ba ba tšhogilego ditaelo tša Modimo wa rena; mme go dirwe ka molao. ₄Tsoga, gobane taba ye e na le wena; mme rena re tlo ema nago; tia maatla o dire!

₅Ke moka Esera a tsoga, a eniša bagolo le baperisita le Balefi, le Isiraele ka moka, gore ba dire ka lentšu leo; mme ba ena. ₆Gomme Esera a tsoga moo pele ga Ngwako wa Modimo, a ya phapošing ya Johanani morwa wa Eliyasiba; a tsena mme a se ke a ja bogobe, a se ke a nwa meetse, gobane a nyamile pelo ka baka la karogo ye ya ba ba boilego bothopša.

₇Bjale ba hlaba mokgoši mo nageng ya Juda le Jerusalema, ba re ba ba boilego bothopša ba phuthegele Jerusalema ka moka ga bona. ₈Ba re: Mang le mang e a sa tlego, e tlo re ge go fela matšatši a mararo a a bewago ke bagolo le bakgoma, go tlo tšwa thoto ya gagwe ka moka ya dirwa segafiwa, mme yena mong a kgaolwa mo phuthegong ya baboabothopša. ₉Bajuda ka moka le Babenyamini ba phuthegela Jerusalema ka matšatši ao a mararo, ba tla ka la masome a mabedi la kgwedi ya senyane, mme setšhaba ka moka sa dula lepatlelong la Ngwako wa Modimo, sa thothomela ka baka la molato woo, le ka baka la go newa ke pula.

₁₀Ke ge go ema Esera moperisita, a bolela le bona a re: Le arogile; le tšere basadi ba šele, mme ya ba go godiša molato wa Isiraele. ₁₁Bjale ipoboleng molato wo go Morena Modimo wa botataweno, le dire se se mo kgahlago; le ikaroganye le ditšhaba tša naga ye le basadi bao ba šele.

₁₂Setšhaba ka moka sa fetola, sa hlaboša mantšu sa re: Go lokile, go swanetše ge re dira se o se bolelago. ₁₃Fela, setšhaba ke se segolo; mme ke lebaka la dipula di re šitišago go ema ntle; le gona ga se modiro wa letšatši letee le ge e le a mabedi; ka gobane dikarogo tšeo di atile mo go rena. ₁₄A bagolo ba rena ba eme legatong la phuthego ka moka; gore bohle ba ba tšerego basadi ba šele metseng ya rena, ba tle ka mabaka ao a beilwego mme bagolo ba motse, gotee le baahlodi ba gona, ba fediše taba ye e re hlolelago kgalefo ya Modimo wa rena. ₁₅Ba ba gannego taba ye e be e le Jonathane morwa wa Asaele, le Jehasia morwa wa Thikifa; ba tlatšwa ke Mesulama le Sabathai ba Balefi.

₁₆Gomme baboabothopša ba dira ka mokgwa woo; moperisita Esera a hlaola banna ba bagolo ba meloko ka go ya ka dilete tša bona, ba bolelwa ka maina a bona; bona bao ba dulela taba ye ka tšatši la pele la kgwedi ya lesome. ₁₇Mme ditaba tše tša banna ba ba bego ba tšere basadi ba šele, ba di feditše ka letšatši la pele la kgwedi ya pele.

₁₈Mo go ba moloko wa baperisita go hweditšwe ba ba bego ba tšere basadi ba šele; mo go ba ga Jeshua morwa wa Jotsadaka le bana babo e be e le Maaseya, le Eliesere, le Jariba, le Gedalia. ₁₉Bona ba ba itlema ka go fana diatla le ba bagolo, ba re ba tlo hlala basadi bao ba bona, ba ntšha kgapana ya seloba sa molato wa bona. ₂₀Go ba ga Imere e be e le Hanani le Sebadia. ₂₁Go ba ga Harima e be e le Maaseya, le Eliya, le Semaya, le Jehiele, le Uria. ₂₂Go ba ga Pašuri e be e le Elioenai, le Maaseya, le Isimaele, le Nethaniele, le Josabadi, le Eleasa. ₂₃Go Balefi e be e le Josabadi, le Simei, le Kelaya (ke Kelita), le Petaya, le Juda, le Eliesere. ₂₄Go baopedi e be e le Eliyasiba. Go baletakgoro e be e le Salume, le Telema, le Uria. ₂₅Go Baiseraele ba ga Pareose e be e le Ramia, le Jesiya, le Malakia, le Benaya. ₂₆Go ba ga Elama e be e le Mathanya, le Sekaria, le Jehiele, le Abadi, le Jeremothe, le Eliya. ₂₇Go ba ga Sathu e be e le Elioenai, le Eliyasiba, le Mathanya, le Jeremothe, le Sabadi, le Asisa. ₂₈Go ba ga Bebai e be e le Johanani, le Hananya, le Sabai, le Athalai. ₂₉Go ba ga Bani e be e le Mesulama, le Maluka, le Adaya le Jasuba, le Seale, le Jeramothe. ₃₀Go ba Phahathe-Moaba e be e le Adini, le Kelale, le Benaya, le Maaseya, le Mathanya, le Betsaliele, la Binui, le Manase. ₃₁Go ba ga Harima e be e le Eliesere, le Jisiya, le Malakiya, le Semaya, le Simeone, ₃₂le Benyamini, le Maluka, le Semaria, ₃₃Go ba ga Hasuma e be e le Mathanai, le mathathe, le Sabadi, le Elifelethe, le Jeremai, le Manase, le Simei. ₃₄Go ba gaBani e be e le Maadai, le Amorama, le Uele, ₃₅le Benaya, le Bedeya, le Keluhi, ₃₆le Fanya, le Meremothe, le Eliyasiba, ₃₇le Mathanya, le Mathanai, le Jasai, ₃₈le Bani, le Binui, le Simei, ₃₉le Selemia, le Nathane, le Odaya, ₄₀le Makanadibai, le Sasai, le Sarai, ₄₁le Asiriele, le Selemia, le Semaria, ₄₂le Salume, le Amaria, le Josefa. ₄₃Go ba ga Nebo e be e le Jeiele, le Mathithya, le Sabadai, le Sebina, le Jadai, le Joele, le Benaya. ₄₄Ke bona bao ka moka ba ba bego ba tšere basadi ba šele; gomme mo go basadi bao ba bona ba bangwe ba be ba šetše ba belege bana.