ESERA 1

₁Ka ngwaga wa pele wa Korese kgoši ya Peresia gwa na gwa phethega lentšu la Morena le a le boletšego ka molomo wa Jeremia, ge Morena a phafošitše moya wa Korese kgoši ya Peresia, a iša lentšu go bohle ba mmušo wa gagwe, le ka lengwalo, a re:

₂Korese kgoši ya Peresia o re: Morena Modimo wa legodimo o nneetše mebušo ka moka ya lefase, gomme o ntaetše gore ke mo agele Ngwako kua Jerusalema nageng ya Juda. ₃Bjale mang le mang yo e lego wa setšhaba sa gagwe, a Modimo wa gagwe a be le yena, a rotogele Jerusalema kua nageng ya Juda, a age Ngwako wa Morena Modimo wa Isiraele, yena Modimo wa Jerusalema. ₄Bjale mang le mang e lego lešalela, e a diiletšego motseng ofe le ofe, a a thušwe ke banna ba motse woo a lego go wona ka disilifera le ka digauta, le ka dithoto le ka dikgomo, le ka dimpho tša go ithapa; di ntšhetšwe Ngwako wa Modimo wa Jerusalema.

₅Ke mo go tsogilego bagolo ba moloko wa Juda le wa Benyamini, le baperisita le Balefi, le bohle ba Modimo a phafošitšego dipelo tša bona, gore ba boele Jerusalema, ba age Ngwako wa Morena wa kua Jerusalema. ₆Gomme bohle ba ba agišanego nabo, ba ba thuša ka dibjana tša silifera le tša gauta, le ka dithoto le ka dikgomo, le ka tše ba bego ba di ntšha ka go ithapa.

₇Yena kgoši Korese a ntšha dibjana tša Ngwako wa Morena, tše Nebukadinetsara a bego a di rebotše kua Jerusalema a di bea ngwakong wa modimo wa gagwe. ₈Korese kgoši ya Peresia a laela Mithiredathe molakamahumo a re a di ntšhe; yena a di bala a di nea Sesebatsara mokgoma wa Bajuda. ₉Palo ya tšona še: Meruswi ya gauta e be e le e masome a mararo; ya silifera e be e le e sekete; mefaka e be e le e sekete; mefaka e be e le e masome a mabedi a metšo e senyane; ₁₀dinwelo tša gauta e be e le tše masome a mararo; tša silifera e be e le tše makgolo a mane, le dibjana tše dingwe tše sekete.

₁₁Ka moka ga tšona e be e le dibjana tše dikete tše tlhano le makgolo a mane tša gauta le tša silifera. Ke tšona tše Sesebatsara a tlilego natšo ge a rotoga le ba ba boetšego Jerusalema ba etšwa Babele bothopša.