Moporofeta o išwa Jerusalema a bona tša gona
1Ka tšatši la bohlano la kgwedi ya go selela ya ngwaga wa go selela, ke dutše ngwakong wa ka, ke na le bagolo ba Juda, ka welwa ke seatla sa Morena ke le gona fao. 2Ka bona motho e kego ke monna; matheka a gagwe go iša tlase ka bona eke ke a mollo; go tloga moo mathekeng go iša godimo ka bona eke ke phadimo ya bohwibidu bja mphiri. 3A ntšha se e kego ke seatla, a ntshwara ka meriri ya hlogo, moya wa nkuka ke le sebakeng; wa nkiša kua Jerusalema ke le diponong tša Modimo; wa mphihliša mojakong wa kgoro ya ka gare e lebilego thoko ya leboa, mo go lego seswantšho sela sa tsheleko sa go selekiša.
4Ke le moo ka bona letago la Modimo wa Isiraele, le le etšago lela ka go le bona mola molaleng. 5A bolela le nna a re: Ngwana motho, gadia o lebelele thoko ya leboa! Ka lebelela thoko ya leboa, ka bona swantšo seo sa tsheleko, se eme thoko yeo kgorong ye ba tlago aletareng ka yona.
6Mme yena a re: Ngwana motho! Tše ba di dirago a o a di bona? Ke makgapha a magolo a a dirwago fa ke ba moloko wa Isiraele. Ke ona a ntlogelanyago le Ntlokgethwa ya ka. Fela, o sa tlo bona a mangwe a magolo.
7A nkiša seferong sa lapa. Ge ke lebelela ka bona go na le lešoba lebotong. 8A re: Ngwana motho! Huhumela ka lešoba le! Ka huhumela ka hwetša go na le kgoro e nngwe. 9A re: Tsena, o tle o bone makgapha a mabe a ba a dirago fa. 10Ka tsena ka bona diswantšo tša mehutahuta tša digagabi di ilago, le tša diphoofolo di ilago, le medimo ya diswantšho ka moka ya ba moloko wa Isiraele, di swantšhitšwe lebotong ka thoko tše go fela. 11Ka bona banna ba masome a šupago, e le ba bagolo ba moloko wa Baisiraele, ba eme pele ga tšona; mme Jesanya morwa wa Safane a eme le bona; bohle ba swere meruswi ya go thuntšha diorelo; gwa rotoga muši o mogolo wa dihlare. 12A re: Ngwana motho! A o bone tše bagolo ba moloko wa Isiraele ba di dirago leswiswing? Ba di dira bohle ba le phapošing tša medimo ya diswantšho, ba re: Morena ga a re bone! Morena o tlogetše naga ye!
13A re: O sa tlo bona makgapha a mangwe a magolo a ba a dirago. 14A nkiša mojakong wa kgoro ya Ngwako wa Morena e lebilego thoko ya leboa, ka bona go dutše basadi ba llela Thamusi.
15A re; Ngwana motho! A o a di bona? A o di bone? -- Fela, o sa tlo bona makgapha a mangwe a magolo a a fetago a. 16A nkiša ka lapeng la gare la Ngwako wa Morena, ka bona ka mo mojakong wa Ntlokgethwa ya Morena, mo gare ga mathudi le aletare go le banna ba masome a mabedi a metšo e mehlano; ba fularetše Ntlokgethwa ya Morena, difahlogo di lebile bohlabela; ba lotšha letšatši ba lebile bohlabela.
17A re; Ngwana motho! A o di bone? A fa ke taba e nyenyane ge ba moloko wa Juda ba dira makgapha ao gona fa; le gona ba buša naga ka bošoro, ya ba go nthumola. Sebao ba išitše matlakala a morara mo dinkong tša bona. 18Le nna bjalo ke tlo ba dira ke befetšwe, leihlo la ka le sa ba kwele bohloko, ke sa hlwe ke setša. Le ge ba ka ntlhodia ka mekgoši e megolo, nka se ke ka ba kwa.
