Dikotlo di tlišwa ke Morena ka ge a bone molato
1Lentšu la Morena le ntletše la re: 2Bjale wene ngwana motho! Morena Mong wa bohle o bolela a era naga ya Isiraele, o re: Bofelo bo fihlile, bofelo bja dikhutlo tše nne tša naga yeo.
3Bjale bofelo bo go fihletše! Bogale bja ka ke tlo bo roma bja go tlela, ka go lefetša ditsela tša gago, ka go rolela makgapha a gago ka moka. 4Leihlo la ka le ka se ke la go kwela bohloko, nka se ke ka go setša; Ke tlo go rolela mekgwa ya gago, wa tlo boelwa ke makgapha a gago. Ke mo le tlo tseba ge Morena e le nna.
5Morena Mong wa bohle o re: Dikotsi di tlo hlatlamana. 6Bofelo bo etla; bo e tla bofelo! Bo tla bo lebile wena! Sebo, bo etla! 7O tlelwa ke tšatši la gago, wene moagi wa naga ye. Lebaka le kgauswi, letšatši la go hloboga, e sego la tlhalalo dithabeng.
8Ke tlo tloga ke go thenolela kgalefo ya ka, ke feletša bogale bja ka go wene, ke lefetša ditsela tša gago, ke go rolela makgapha a gago ka moka. 9Leihlo la ka le ka se ke la go kwela bohloko, nka se hlwe ke go setša; ke tlo go tlišetša tše di lebanego ditsela tša gago; tša makgapha a gago di tlo ba le wene. Ke mo le tlogo lemoga ge a le otlago e le nna Morena.
10Seleo letšatši Šeleo le etla! Go tla lebaka la gago. Thupa e hlogile; go palegile tšoba la boikagodišo. 11Bošoro bo le hloletše thupa ya bokgopo; ba ka se šalelwe ke selo; go ka se be le mogobo; go ka se be le legoa; go ka se be le wa go ba llela.
12Lebaka la tšona le etla; letšatši le kgauswi. Moreki a ka se ke a thaba; morekiši a ka se ke a lla; gobane mahumo a bona ka moka a tšhumilwe ka mollo wa bogale. 13Gobane morekiši a ka se ke a hlwa a boela go tše a di rekišitšego, le ge a sa na le ba phelago; gobane kutollo e bolelago mahumo a, e ka se bušetšwe morago; gobane motho e a phelago sebeng, a ka se ke a tia. 14Ba letša phalafala ba itlhamile bohle; fela, ga go e a tšwelago go hlabana; gobane bogale bja ka bo tuketše botšhephi bja bona ka moka.
15Kua ntle go lerumo; ka gare go dinkhu le tlala; e a lego nageng o tlo hwa ka lerumo; e a lego motseng o tlo lewa ke tlala le dinkhu. 16Ba ba tšhabilego mo go bona ba phonyokga, ba tlo dula dithabeng bjalo ka maebathaba; ba tlo lla ka moka ga bona ka baka la makgopo a bona. 17Matsogo ka moka a tlo repha; matolo ka moka a tlo nolega, a ela boka meetse. 18Ba tlo apara mankgeretla, ba tlo welwa ke go tšhoga; difahlogo ka moka di tlo lewa ke dihlong; dihlogo tša bona ka moka e tlo ba tše di mafatla. 19Silifera ya bona ba tlo e lahlela mekgobeng; gauta ya bona e tlo ba maudi; gobane mohla wa bogale bja Morena silifera ya bona le gauta ya bona di ka se hlakodiše, di ka se rake tlala; di ka se kgone go horiša, ka gobane e le tšona di ba kgopišitšego ba wela sebeng. 20E be e le tša botšhephi; bona ba di dira tša go ikgantšha, le tša go bopa medimo ya makgapha le ditšhila. Ke lefetša tšona tšeo ge ke di dira maudi.
21Ke tlo di gafela diatleng tša bantle, gore ba di thope; ya tlo ba dithebola tša bona ba babe lefaseng, ba di tšhilafatše. 22Mme nna ke tlo ba gerula, Sekgethwa sa ka se tlo goboga; se tlo tsenwa ke mahodu sa gobošwa.
23Dirang ditlemo, gobane naga e tletše melato ya madi; go buša bošoro motseng. 24Ke ka baka leo ke tlišago sona setšhaba se sešoro, gore se tle se tšee nywako ya bona; ke tle ke fediše boikgogomošo bja ba maatla, go goboge madulo a makgethwa a bona. 25Go tla tše di šiišago. Ba tlo nyaka khutšo ba e hloka. 26Mabošula a tla ka go hlatlamana; mekgoši e hlatlangwa ke mekgoši. Ba tlo nyaka pono ya mmoni; mme tayo e tlo hlokwa go bomphamodimo, go se keletšo go bagolo. 27Kgoši e ja pelo: bakgoma ba apere tšhogo; matsogo a setšhaba sa naga a rephile. Ke tlo lefetša ditsela tša bona. Ke tlo ba ahlolela ka moahlolelo wa bona. Ke mo ba tlogo tseba ge Morena e le nna.
