HESEKIELE 6

₁Lentšu la Morena le ntletše la re: ₂Ngwana motho! Lebišetša sefahlogo dithabeng tša Isiraele, o di porofetele. ₃O re: Hee lena dithaba tša Isiraeli! Kwang lentšu la Morena Mong wa bohle! Morena Mong wa bohle o bolela a era dithaba le meboto le dinoka le meedi, o re: Ke nna e! Ke le tlišetša lerumo; ke senya madulo a lena a a phagamilego. ₄Ke phušola dialetare tša lena, ke pšhatla medimo ya lena ya letšatši; ditoto tša lena ke tlo di kanamiša gona moo pele ga medimo ya lena. ₅Ditoto tša Baisiraele ke tlo di lahlela pele ga medimo ya lena, mme mašapo a lena ke tlo a phatlalatša gona moo dialetareng tša lena. ₆Mo gohle mo le agilego, metse e tlo šwalalanywa, madulo a a phagamilego e tlo ba marope, gore dialetare tša lena di tlogelwe di phušotšwe, medimo ya lena e pšhatlwe e fedišwe, dikokwane tša lena di ušwe, go senyege tše le di dirilego. ₇Ba ba hlabilwego ba tlo kanama mo gare ga lena, le tle le tsebe gobane Morena ke nna.

₈Fela, ke tlo šadiša mašalela a lena, gore le be le ba ba phonyokgilego lerumo gare ga ditšhaba, ge le tšitlanyetšwa dinageng tša tšona. ₉Bona baphonyokgi bao ba lena, ba le gare ga bantle bao ba ba thopilego, ke bona ba ba tlogo nkgopola, ba lemoga go hlokoga ga ka ga mola dipelo tša bona di ntlhanogela ka bootswa, mola mahlo a bona a bootswa a lebeletše medimo ya bona; mme bona ka noši ba tlo hlaswa mabobe ao ba bego ba a dira, le ditšhila tša bona ka moka. ₁₀Ke mo ba tlogo lemoga ge Morena e le nna, le gobane e be e se go fo bolela, ge ke re ke tlo ba tlišetša kotsi ye.

₁₁Morena Mong wa bohle o re: Phaphatha diatla, o tibe ka leoto, o re: Joo makgapha a mabe ka moka a moloko wa Isiraele, joo! Ba tlo ba ba fela ka lerumo le ka tlala le ka dinkhu! ₁₂Wa kgole o tlo hwa ka dinkhu; wa kgauswi o tlo hwa ka lerumo; ba go šalela ba rakeletšwe ba tlo hwa ka tlala. Kgalefo ya ka ke tlo e feletša mo go bona ka mokgwa o bjalo. ₁₃Ke mo ba tlogo tseba ge Morena e le nna, ge ditoto tša ba gabo di rapaletše medimong ya bona, di dikaneditše dialetare tša bona mebotong ka moka, le dintlheng ka moka tša dithaba, le dihlareng tše tala ka moka, le mo meruleng ka moka e teteanego, mo ba bego ba thuntšhetša medimo yohle ya bona diorelo tše monate. ₁₄Ke tlo akalatša letsogo la ka godimo ga bona, naga ka e dira ya marope le lešoka mo gohle mo ba agilego gona, ya tlo befa ya fetiša lešoka la Dibilatha. Ke mo ba tlogo bona ge Morena e le nna.